NAALAKKERSUISUT
Tusilartunut atugassarititaasut pitsanngorsarneqassasut neriorsuutigineqarpoq
Meeqqanut inuusuttunullu Naalakkersuisoq, ilanngullugulu innarluutillit sullinneqarnerinut naalakkersuinikkut akisussaasuusoq, maanna suliniuteqalerpoq siussarluttunut tusilartunullu atugassarititaasut pitsanngorsarniarlugit. Taanna suleqatigiinnik pilersitsiniarpoq siunnersuutissanik aaqqiissutissanillu saqqummiussiumaartussamik, pingaartumik siussarluttut tusilartullu pisortanut saaffiginnissinnaanissaminnut periarfissarissaarneruleqqullugit.
Nunarsuarmi siussarluttunut tusilartunullu atortorissaarutit ineriartortinneqarput, maanna atortorissaaruteqalernikuuvoq tusilartut nipinik tigusisinnaanngorlugit taamaalillutillu tusaasaqalersinnaanngorlutik. Kisianni ineriartorneq tamanna ersarissumik Kalaallit Nunaannut suli apuunneqanngilaq, nunatsinnimi tusilartunut ussersorluni nutserissussisarneq amigaatigineqarpoq. Maanna Naalakkersuisut aamma nunatsinni tusilartut kattuffiat suleqatigiillutik, nunatsinni siussarluttut tusilartullu atugaannik aaqqiissutissanik ujartuisoqalerluni.
Ole Lind/Jyllands-Posten/Ritzau Scanpix
Meeqqanut inuusuttunullu Naalakkersuisoq, Aqqaluaq Biilmann Egede (IA) nassuerpoq, siussarluttunut tusilartunullu ussersorluni nutserisoqarneq, pingaartumik pisortanut saaffiginnissatillugit, nunatsinni assut amigaataasoq aammalu aaqqiissutissatut maannamut iliuuserineqarsimasut naammanngitsut.
Taamaattumik Meeqqanut Inuusuttunullu Naalakkersuisoqarfini taassuma qinnuigaa, akeqanngitsumik ussersorluni nutserussisinnaaneq neqeroorutigineqarsinnaalersinnaanersoq misissoqqullugu, taamaalilluni siussarluttut tusilartullu allatulli
najugaqarfigisaminni innuttaasutut oqartussaasunut attaveqarsinnaalernissaat anguniarneqassammat.
Ussersorlutik tusilartunut nutserussisinnaaasut amigaatigineqaqisut
Kisitsisitigut uppernarsaatissaqanngilaq nunatsinni siussarluttut tusilartullu qasserpiaanersut. Taamaattorli 2017-mi amerlassusiliiniarnermi takutinneqarpoq taamani inuit 40-t tungaanut amerlassusillit tusilartuusut, taamaattorli aamma erseqqissaatigineqarpoq siussarluttoqarsimasinnaasoq tusilartoqarsimasinnaasorlu pisortatigoortumik naatsorsuinermi ilaanngitsunik.
Siussarluttunut tusilartunullu ungasianiit ussersorluni nutserisoqarsinnaanermik ajornartorsiuteqarneq nunatsinni ukiuni qulikkaani arlalinni aaqqinniarneqartaraluarpoq aammalu politikkikkut eqqumaffiginninneq takkuttaraluarluni, mannali tikillugu suli aaqqiissutissanik ataavartussanik naammassinnittoqarnikuunngilaq.
- Ussersorluni siussarluttunut tusilartunullu nutserussisinaasunik Kalaallit Nunatsinni pisariaqartitsivugut iliuuseqarfigisariaqarlutigulu, aammalu ataatsimut isigalugu siussarluttunut tusilartunullu nunatsinni innuttaasutut allatulli nunatsinni peqataatitsineq aammalu pisortanut saaffiginnissinnaaneq periarfissaasariaqarput, Aqaluaq Biilmann Egede oqarpoq.
Suleqatigiissitaq nutaaq suliniutinik nutaanik innersuusiussaaq
- Taamaattumik suleqatigiissitamik suliniuteqartussamik pilersitsivunga, naalakkersuisoqarfiit assigiinngitsut siussarluttunut tusilartunullu attuumassuteqarsinnaasut tamarmik peqataassapput, taakkulu tusilartut kattuffiannit KTK-mit ataatsimeeqatiginerini ajornartorsiutitut saqqummiunneqartut misissuiffigissavaat, meeqqanut Inuusuttunullu Naalakkersuisoq, Aqqaluaq Biilmann Egede (IA) Sermitsiamut oqarpoq.
Naggataatigut Naalakkersuisoq erseqqissaavoq, suleqatigiissitaq siunnersuutissanik saqqummiussisassasoq qanoq iliuuseqartoqarsinnaaneranik. Tamatuma saniatigut neriorsuivoq siussarluttut tusilartullu kattuffiat KTK qanimut suleqatigineqassasoq.
