Tuukkaq utertoq

Tuukkaq marlunngornermi ullup qeqqartoq Københavnimiit timmisartuussilluni qangatut Kangerlussuarmut mippoq.

Tuukkaq akunnerni sisamani ajoquteqanngitsumik timmisartuussereerluni nal. 12.45 mippoq – ilaasullu Kangerlussuarmi silaannarik aliannaarfigalugu timmisartumiit niupput.

Minnerata nalaani sila -20 gradinik issillunilu anoreqanngingajappoq, – 3m/s.

Minnera Kangerlussuarmi najugaqartorpassuarnit malinnaavigineqarpoq – aamma mittarfimmi sulisuunngitsunit. Taakkununnga ulloq nuannaarfiuvoq. Air Greenlandip Atlantiku qulaallugu timmisartuussisarnini qaammatit marluk matuma siorna Nuummut nuummagilli Kangerlussuaq nipaaqaaq.

Mittarfik quatsersimasoq Mittarfiup quatsersimanera pissutigalugu Nuummi mittarfittaaq sisamanngornermi tallimanngornermilu kiisalu sapaatip akunnera kingulleq ataasinngornermi matoqqammat Atlantiku qulaallugu timmisartuussisarnermi Kangerlussuarmut mittoqaqqinnissaa aalajangerneqarpoq. Taamaattoqarmat Tuukkaq pilersaarutit malillugit Nuummut minngitsiarluni Københavnimut uterpoq. Taamaalilluni timmisartuussineq katillugit akunnernik qulinik sivisussuseqarpoq, tamannalu ilaasunut – ingammik meeralinnut - ilungersunangaatsiarpoq.

- Marlunngornermi Atlantiku qulaallugu Tuukkamik Jettimemiillu Boeing 737-imik timmisartuussinerit Kangerlussuarmukartussanngorlugit aalajangerpugut, Air Greenland oqaluttuarpoq.

Nuummi qularnaveeqquteqanngitsoq

- Nuummi mittarfik timmisartorsuarnik ilaasartaatinit miffigineqarnissaminut piareeqqanersoq Greenland Airportsimiit amigaatigineqarnera tunngavigalugu aalajangiisoqarpoq – taamatuttaaq taamaatitseqqinnissamut aarlerinartut minnerpaaffissaaniitinniarlugit.

- Timmisartugut Dash-8, mittarfimmik naannermik pisariaqartitsigamik ajornaquteqanngitsumik Nuummut missinnaasut atorlugit ilaasut apuuffissaannut timmisartuutissavagut.

Tuukkap Jettimellu Kangerlussuarmut mikkunik isumagineqarnissaat qulakkeerniarlugu Air Greenlandip sulisut 15-it assartukkanik nassatanillu isumaginneriaannanngorlugit marlunngornermi Nuummiit Kangerlussuarmut timmisartuussineq siulleq aqqutigalugu Kangerlussuarmukartippai.

Nilakkartarnera ajornartorsiutaangaatsiartoq

Nilakkartarnera, sialuk annikippallaamik nillusarneqarsimasoq suulluunniit qaavanut tukkaangat pilersartoq pissutigalugu Nuummi mittarfik quatseqqavoq. Mittarfimmi siorarterisoqaqqusaananilu taratsumik siaruarterisoqaqqusaanngimmat atortut allat atorneqartariaqarput.

- Assersuutigalugu piffissami kingullermi naatsorsuutigisatsinniit sermiiaatinik atuineruvugut. Tamanna sermiiaatinik sunniuteqarluarnerpaanik uninngasuuteqarnermi anigorniagassaqartitsivoq aammalu immikkut ittumik silarlunneranut ulluni makkunani misigisatsinnut ataqatigiissillugu pisunut pisariunerulersitseqataalluni, Greenland Airports Facebookimi allappoq.

- Tassunga ilanngutissaaq, Nuummi mittarfiup atortullu nutaajunerat, aammalu suli misilittakkat sungiusimasassallu ilanngussorneqartussaallutik ilinniarneqartussaallutillu.

Sermitsiap Greenland Airportsimiit paasissutissat ingeniørit peqatigiiffianni IDA-mi timmisartuussinermi isumannaallisaaneq pillugu immikkut ilisimasalimmut Paul Hulme Harrisonimut, ilaatigut Købanhavnip mittarfiani nakkutilliisutut isumannaallisaanermilu siunnersortitut sulisimasumut, saqqummiuppai.

Paul Hulme Harrisonip Nuummi pissutsit ilisarisinnaavai.

- Mittarfinni sermiaanermut atortoq atorneqarnerpaaq tassaavoq Urea, tassaasoq kvælstoffit ilaat taratsutupajaaq sunniuteqartartoq, timmisartunulli manngertornititsineq ajortoq.

Aaqqiissut akisooq iluaqutaasorli

- Aaqqiissut akisuvoq, eqqortumilli atoraanni iluaqutaasaqaaq. Ureali atorlugu pisariuvoq, tassami piffissaq eqqoqqissaarneqartariaqarpoq. Mittoqanngitsiarnerani piffissaq eqqoqqissaarlugu siaruarterneqartussaagami imaaliallaannarneqarsinnaanngilaq.

- Københavnip mittarfiani sulisut tatiginartut ikittunnguit ukiorpassuarni suliamik suliaqarsimasut ukiorpassuarni misilittagaqangaatsiarsimapput. Najukkami pissutsit sukumiisumik ilisimavaat – mittarfiullu nakkutiginerani atortorissaarutit tamaasa atortarpaat. Ilaatigut Amagerimi Aqquserngit pillugit Aqutsisoqarfimmiit aqqusinernik nakkutiginnittunit sila pillugu paasissutissarpassuit atortarpaat, taamaalillutik Nuummut sanilliullugu paasissutissarpassuaqarnerusut isumaqarpunga.

- Piffissap eqqoqqissaarnissaa pingaaruteqarluinnarpoq. Urea mittarfimmut panertumut sunniuteqarneq ajorpoq, aatsaat mittarfik masassimappat siaruarterneqarsinnaavoq. Ureali sialummiit peerneqannginniassammat mittoqanngitsiarneranili piffissaq kingullipajaaq atorlugu siammarterneqartussaavoq.

Pissutsit nutaat

Paul Hulme Harrison aamma illersornissaqarfimmiinnikuugami Kalaallit Nunaanni timmisartortarnikuuvoq. Sulili Nuummi mittarfittaamiissimanani erseqqissarpaa.

- Nuummi pissutsit soorunami Kangerlussuarmitut pitsaatigisinnaanngillat. Nuuk sinerissamiippoq, Kangerlussuaq nunap timaani panertumiittoq. Taamaammat sorpassuit allaanerupput – tamannalu piffissaq sivisooq atorlugu sunngiunniagassaavoq.

Timmisartuussinermi isumannaallisaanermut immikkut ilisimasalittaaq Air Greenlandip Kangerlussuarmukarnani Keflavikkimukarnaniluunniit Københavnimut utiinnarusuttarnera paasisinnaavaa.

- Timmisartoq passunneqarlunilu nakkutilliiffigineqarniassammat aallarfimminut utertarnissaa kingorna angallassinissaq eqqarsaatigalugu isumannaannerpaavoq. Assersuutigalugu kingoraartsissamik taarsiisoqassappat aallarfimmi suliarissallugu sukkanerullunilu ajornannginnerpaavoq – kingoraartissallu mittarfimmi pineqartumi pigineqarnissaa qanoq ilinikkulluunniit qulakkeerneqarsinnaanngilaq.

-Biilitulli biilileriffiaanneqaannarsinnaanngilaq, Paul Hulme Harrison Sermitsiamut oqarpoq.