TV-mi aallakaatitassiaq ministerimut apeqqutinik pilersitsisoq
DR-ip aallakaatitassiaata ’De arktiske reddere’-p takutinneqareernerata kingorna Aaja Chemnitzip annaassiniartartut qulimiguuliata kissartumik ujaasisartuanut tunngatillugu killiffik apeqqutigaa.
- DR1-imi tv-kkut aallakaatitassiami Arktiske Reddere-mi takuneqarsinnaavoq ujaasinermi assiliiviit FLIR-it pisariaqartinneqartut, ujaasineq inuilaarsuarmi pisarmat, Aaja Chemnitz ministerimut apeqquteqaammini allappoq.
Assiliisoq: IA Folketingimi
- Qulimiguulimmi FLIR-imik atortorissaaruteqaraanni inuit pinngortitami angalaartut immamulluunniit nakkarsimasut nassaarineqarsinnaapput. Annaassiniartartut suliassaannut oqilisaataangaatsiassaaq, Aaja Chemnitz Sermitsiamut oqarpoq.
DR-ip aallakaatitassiaa De arktiske reddere, Kalaallit Nunaanni ujaasinermik annaassiniarnermillu sulialinnut tunngasoq, isiginnaareernerata kingorna illersornissamut ministerimut apeqquteqarpoq.
Qulimiguulimmut ujaasinermut annaassiniarnermullu atortunik FLIR-imik taaneqartartunik ikkussisoqarsimanersoq Aaja Chemnitzip paaserusuppaa. FLIR tassaavoq filmiliuut kissartunik ujaasisartoq, inunnik pinngortitamiittunik inuilaarsuarmiittunilluunniit ujaasinermi iluaqutaarujussuarsinnaasoq.
Pisariaqartinneqartoq takuneqarsinnaavoq
- DR1-imi tv-kkut aallakaatitassiami Arktiske Reddere-mi takuneqarsinnaavoq ujaasinermi assiliiviit FLIR-it pisariaqartinneqartut, ujaasineq inuilaarsuarmi pisarmat, Aaja Chemnitz ministerimut apeqquteqaammini allappoq, nangillunilu:
- Aammattaaq takuneqarsinnaavoq annaassiniartartut pikkorissut annerusumik ikiueqqaarnissamik piginnaasaqanngitsut. Tamanna ajornartorsiutaavoq ilisimaneqartoq apeqquteqartup siornatigut apeqqutilliissutiginikuusaa. Kalaallit Nunaanni qulimiguulimmut annaassiniartartumut atortunik FLIR-imik ikkussinissaq sumut killippa, Illersornissaqarfillu qulimiguulimmik annaassiniartartut ikiueqqaarnermik annertusisamik piginnaanngorsaanissamik qulakkeeriniarlutik pilersaaruteqarpa?
Aaja Chemnitz naapertorlugu politikkikkut siusinnerusukkut aalajangerneqarpoq qulimiguullit annaassiniarnermik suliaqartut FLIR-imik atortorissaaruteqassasut:
- Sumiginnaaneq akuersaarneqarsinnaanngitsoq
- Sakkutuut umiarsuaat Kalaallit Nunaata eqqaani angalasut eqqarsaatigalugit aamma takuneqarsinnaavoq atortorissaarutit atorneqalertussat politikkikkut aalajangiiffigineqareeraluartut ukiut arlallit qaangiuttut suli timitalerneqarsimanngitsut.
- Tamanna Kalaallit Nunaanni suliassanik sumiginnaanermik akuersaarneqarsinnaanngitsumik ersersitsivoq, Aaja Chemnitz oqarpoq.
Taassuma illersornissamut ministeri ataatsimeeqatigileruniuk suliaq killiffissiorniarpaa:
- Kalaallit Nunaannit politikkikkut tatisinissaq pisariaqarpoq, Sermitsiamut oqarpoq.
