Tyskeq ilisimasassarsiortoq Tunumi nannumit saassunneqartoq
Tallimanngornermi angut tyskeq ilisimasassarsiortoq Nunatta Kangiani nannumit saassunneqarpoq. Angut ajunngitsoq nalunaarutigineqarpoq.
Angut Tysklandimeersoq ilisimatusartutut suleqatigiinni peqataasoq, Tunumi Traill Ø-mi Mestersvigimiittumiitilluni nannumit saassunneqarpoq.
Toqqorsivimmit assilisaq: Leiff Josefsen
Angut Tysklandimeersoq tallimanngormat Tunumi nannumit saassunneqarpoq.
Kalaallit Nunaanni Politiini nakkutilliisuutitat pisortaat Anette Ostenfeldtip KNR-imut uppernarsarpaa.
Tallimanngornermi nalunaaqutaq 11.34 Kalaallit Nunaanni Politiinut saassussineq pillugu nalunaarutiginnittoqarpoq.
Angut taanna tyskit ilisimatusartuni ilaasoq, Traill Ø-mi Mestersvigimi nunatta kangiani, nannumit saassunneqarpoq.
Angut pineqartoq kisimi ajoquserpoq. Mestersvigimut timmisartuunneqarpoq taavalu Islandimut napparsimmaviliaanneqarluni. Arfininngornermi saassunneqarnerminit aniguisimasoq ajunngitsorlu nalunaarutigineqarsimasoq, KNR allappoq.
Nannup saassissinermi kingorna aallaaneqarluni pisarineqarpoq.
Aasaq manna nannut ikigisassaanngitsut Kalaallit Nunaanni inunnut inoqarfinnullu qaninniartorujussuupput.
Sisamanngornermi nannunik alapernaarsuisartut WWF-meersut Ittoqqortoormiini alapernaarsuinerminnik aallartitsipput.
Nalinginnaasumik alapernaarsuineq aallartinneqartaraluarpoq augustip qiteqqunnerani januarilu tikillugu ingerlanneqartarluni, piffissamilu tassani nannunniarneq aallarteqqinneqartarluni.
Ukiorli manna nannunik alapernaarsuisartut sioqqutsillutik aallartipput, pisuni marlunni nannut inoqarfimmut qanippallaalerlutik toqunneqartariaqarnerisa kingunerisaanik.
Nannunik alapernaarsuisartut ATV-mik angallassissuteqartarput aammalu aallaaseqartarput gumminik imassalinnik, taakku iluaqutigalugit nannut qimaatinniarneqartarput, taamaalilluni pinngitsoortinniarneqartarluni imassanik ilumoortunik imalinnik aallaaneqarnissaat toqunneqarnissaallu.
/ritzau/