Ujaasineq: Tammaaneqartut pingasut suli ujaarineqarput

Inuit pingasut maqaasineqartut sapaatiummat unnukkut nalunaarutigineqarmata Qeqertarsuup Tunuani ujaasineq aallartinneqarpoq.

Issittumi Sakkutooqarfik ujaasinermik aqutsisuuvoq, Kalaallit Nunaannilu Politiit aamma peqataapput. Umiatsiaq nassaarineqarpoq, inuttaqanngimmalli ataasinngornermi ujaasineq nanginneqarpoq.

Ujaasineq marlunngornermi nanginneqartoq timmisartorlu Challenger marlunngornermi ullaap tungaani sumiiffimmut tassunga tikiuttoq Issittumi Sakkutooqarfik Sermitsiamut ilisimatitsivoq.

Timmisartumit ujaasineq nalunaaqutaq 10.30 missaani nangeqqissaaq.

Oqartussaasut namminnerlu kajumissutsiminnik ujaaseqataasut sumiiffimmi ataasinngornermi ujaasipput, tassani umiatsiaq inuttaqanngitsoq nassaarineqarluni, ullumikkulli ujaasineq annertusineqarpoq.

Umiatsiaararsortut arlallit ujaasisut marlunngornermilu ujaasinermut ikiuuteqqittut Issittumi Sakkutooqarfik nalunaarpoq.

Ajoraluartumik inuit pingasut taakku suli ujaarineqarput.