Ukiorpassuarni qanimut suleqatigiinneq

- Aalborgip Nuullu akornanni aasaru toqqaannartumik timmisartuussisoqartalernissaa nalaatsornerinnaanngilaq, tassami Greenland Airportsilu/Mittarfeqarfiillu ukiorpassuarni pitsaasumik suleqatigiissimavugut, Kim Bermann, Aalborgip mittarfiani pisortap tullia ingerlatsinermullu pisortaq, oqarpoq.

- Ukiorpassuarni Mittarfeqarfiit qanimut suleqatigisimavavut. Arlaleriarluta Kangerlussuarmiit Nuummiillu tikeraartoqartarsimavugut, ilaatigut isumannaallisaanermut atortuvut takuniarneqartarlutik. Aammattaaq Mittarfeqarfiit isumannaallisaanermut tunngasunik ilinniartitsinerini misilitsinnerinilu ikiuisarnikuuvugut.

- Mittarfissap nutaap pilersaarusiorneqarnera aallartillualeruttortoq Greenland Airports 2019-imi suleqatigilerparput. Atortut qarasaasiatigullu aaqqiissutissat pillugit apersorneqarpugut – aamma sulisunit tikeraarneqartarpugut, taakkualu mittarfitsinni assigiinngitsorpassuartigut qanoq ingerlatsinersugut takusarpaat, ilaatigut isumannaallisaanermut, timmisartornermi isumannaallisaanermut pitsaassutsimillu nakkutilliinermut tunngatillugu.

Suleqatigiinneq pissusissamisoortoq

- Kalaallit Nunaanni mittarfinnik suleqateqarneq Aalborgip mittarfianut pissusissamisuuginnarpoq, Jyllandimmi avannaani Kalaallit Nunaannilu inuussutissarsiortut ataqatigiilluartuaannarmata – najukkamilu inuussutissarsiortut attaveqaqatigiinneranni suleqataajuaannarpugut, tamannalu ilaatigut Air Greenlandip Aalborgimit Kalaallit Nunaannut timmisartuussinermik misileeqqaarneranik 2024-mi kinguneqarpoq.

- Inuussutissarsiortut suleqatiginissaat mittarfimmut pingaaruteqarpoq, inuussutissarsiortummi ilaasutigut nassiussatigullu mittarfiup kaaviiaartitaanut tapertaapput.

- Tamanna maannakkut kinguneqarluarpoq, minnerunngitsumimmi najukkami inuussutissarsiortut suliniuteqangaarnerat pissutigalugu ingerlatseqatigiiffik Ruby Rejser AirSeven suleqatigalugu sapaatip-akunneranut marloriarluni aasaanerani Nuummit Aalborgimut toqqaannartumik timmisartuussisarnissap nutaap ammarneqarnera ukioq manna siusinnerusukkut nalunaarutigisinnaasimavarput. Inuussutissarsiortut aqqut tamanna tapersersorpaat ilaatigut timmisartuussinermut billetsinik pisinikkut, aammattaaq nassiussanik pitsaanerpaamik atuinissamik neriorsuinermikkut.

- Tamatuma kingorna Air Greenland Ruby Rejserimik suleqateqalerpoq, Jettimellu timmisartuutaanik sapaatip-akunneranut ataasiarluni timmisartuussisalerniarluni, taamaalilluni Aalborgip mittarfia aasaru sapaatip-akunneranut pingasoriarluni Nuummut timmisartuussisarnissamik neqerooruteqalissaaq. Tamanna pingaaruteqarluinnarpoq – timmisartuussisarnerummi annertusiartornera inuussutissarsiortunut pingaaruteqarluinnarmat.

- Greenland Airportsimik suleqateqarnerput nuannaarutigeqaarput, Nuummilu mittarfissap nutaap naammassineqarnera nuannaarutigaarput, Kim Bermann oqarpoq.

Kommunit mittarfii

Aalborgip mittarfia aktiaatileqatigiiffiuvoq Jyllandip avannaani kommuninit ataatsimoortumik pigineqartoq. 1951-imiilli mittarfik Illersornissaqarfiup Mittarfia Aalborg-imut atalersimavoq, tassanilu timmisartut assartuutit Herculesit, timmisartut Challengerit, Siriusip alapernaarsuisuisa assartuinermut qitiusoqarfia kiisalu Jægerkorpsit inissisimapput.

Illersornissaqarfik ilaatigut qatserinermik aputaajaanermillu kiffartuussisarpoq, mittarfillu illersornissaqarfiup timmisartuinut aputaajaatitigut mitsitsinissamullu atortorissaarutitigut kiffartuussisarluni.

Aalborgimi timmisartoqarfik Kangerlussuup pisimaneratut sorsunnersuup aappaata nalaani sananeqarpoq, tyskit sakkutuui Danmarkimi pissutsinut naleqqussakkanik timmisartoqarfissuarmik sanaartormata, tyskit timmisartuisa Norgemi sorsugiartut mittarfigalugu.