Ukiukkut umimmanniarneq sivitsorneqassanngilaq

- Naternami umimmattassat amerlineqarnissaat pilersaarutingineqarpa?, Inatsisartuni ilaasortaq Kristian Jeremiassen §-37 naapertorlugu Naalakkersuisunut apeqquteqarpoq.

-  Naalakkersuisut maannakkut Naternami umimmattassat amerlineqarnissaat pillugu pilersaaruteqanngillat, Aalisarnermut Piniarnermullu Naalakkersuisoq, Kim Kielsen apeqqummut akissuteqarpoq.

Naalakkersuisut maannakkut Naternami ukiuunerani qimussimik umimmanniarnissap sivitsorneqarnissaa pillugu aamma pilersaaruteqanngillat.

Umimmaat amerlassusaannik kisitsineq

Pinngortitaleriffiup Kalaallit Nunaanni uumasoqatigiit umimmaat aamma tuttut piniarneqarsinnaasut piffissami 2025-2029-mi tamaasa kisinneqarnissaat siunertaralugu pilersaarut suliarisimavaa.

- Suliap taassuma aningaasaliiffigineqarnissaa aningaasanut inatsisip suliarineqarneranut ilanngunneqassaaq. Aningaasaliinissaq anguneqassappat Naternami umimmaat tuttullu 2025-mi upernaakkut kisinneqarsinnaalissapput. Kisitsineq tamanna nunaminertami Kangerlussuarmi/Sisimiuni tuttunik umimmannillu kisitsinermut ilanngullugu iluaqutaasumik suliarineqarsinnaavoq, Aalisarnermut Piniarnermullu Naalakkersuisoq, Kim Kielsen, Kristian Jeremiassenimut akissummini allappoq.

Naternami inuussutissarsiutigalugu sunngiffimmilu umimmanniarnissamut maannakkut 120-nik pisassiisoqarsimavoq, aqutsiveqarfinnut tallimanut agguataarneqarsimalluni: Ilulissat, Qasigiannguit, Qeqertarsuaq, Aasiaat aamma Kangaatsiaq. Piniarneq aggustip aallaqaataaniit oktobarip 15-ata tungaanut pissaaq.

Aamma Naternami aggustip aallaqqaataanit oktobarip 31-ata tungaanut umimmaat 15-it pisassiissutigineqarput, aaqqissuussisartoq akuerisaasoq ilagalugu tammajuitsussanik piniarnissamut periarfissaqarput. 

Qaanaami, Siggumi Sisimiunilu ukiaanerani tammaviutsussarsiorluni piniartitsisoqartanera Naternamitulli ingerlasarpoq, Sisimiunili ukiuunerani piniartoqartarnera sivikinneruvoq, marsip aallaqqaataaniit apriilip qulinganiit, Naternamilu februaarip 15-ianiit apriilip qulinganiit.