KL

DK

Ukiumi nutaami qinnut: Kangerlussuaq Kalaallit Nunaannut ilaali

Kangerlussuup ineriartortinnissaa inuussutissarsiortut soqutigivaat. Nunaqarfiup ineriartortinnissaanut suli periarfissaqarluartoq, ilaatigullu nunaqarfimmi illut inoqanngitsut inuussutissarsiortunut tuniniarneqarnissaat kajumissaarutigineqartoq Arctic Circle Businessip erseqqissarpaa.

Kangerlussuarmi illut sulisullu inissiaat arlallit inoqanngillat. Taakkua ineriartorneq siuarsarniarlugu akikinnerusumik tunineqarsinnaannginnerpat, Arctic Circle Business aperivoq.
KASSAALUK KRISTENSEN
Digitalredaktøri
Saqqummersinneqarpoq

Kangerlussuarmi innuttaasut ukiumi 2025-mi allaanerulluinnartumik aallartipput. Innuttaasut ikileriarput, Tusassip immikkoortortaqarfia nunaqarfimmiittoq matuneqarpoq, illut arlallit inoqanngitsut aseroriartornissaat aarlerinarpoq.

Nuummi mittarfik ammarneqareerlunilu atorneqaraluartoq Arctic Circle Business nunaqarfiup ineriartornissaanut periarfissaqarnerulernissaa anguniarlugu maanna politikerinut ukiumi nutaami qinnuteqarpoq.

- Politikkerinut qinnutiga, tassa imaappoq Kangerlussuaq Nunatta ilaatulli pineqarnissaa, nunaqarfiullu ikaarsaarfimmiinnera tapersersuiffigissagaat, misigissutsillu aqqusaagaat pillugit.

- Politikkerit piffissani ilungersuanartuni aamma najuuttassapput, aatsaallu nuisaratik nuannersumik aatsaat pisoqartillugu. Taamaammat neriuppugut sumiginnaasimaneq aaqqiissuteqarfiginiarlugu qinnutitta tusaaneqarnissaa, ACB-mi pisortaq Jesper Schrøder tusagassiuutinut nalunaarummi oqarpoq.

Nuummi mittarfik ammarneqarmat Kangerlussuarmi innuttaasut annaasaqaatigingaarsimagaat taassuma erseqqissaatigaa.

Ineriartornissamut periarfissat amerlanerusut takusinnaagai

ACB-mi pisortap ukiortaami qinnummini Kangerlussuup aseroriartornera erseqqissarpaa. Inissiat niuertarfiillu inuerupput, Kangerlussuullu siunissaa pillugu aalajangersimasumik pilersaarusiortoqanngilaq:

- Kangerlussuaq uani ikaarsaarfimmi eqqortumik atugassaritinneqartariaqarpoq, sanaartorfiit imaqanngitsut aserfallatttullu kikkunnut iluaqutaassammata/kimulluunniit iluaqutaanavianngillat. Ukiorpassuit periarfissaqarnikuupput pilersaarusiussallutik illorsuit sussanerlugit.

Illut tunineqarpata nunaqarfik uummarteqqinneqarsinnaasoq, taamaalillunilu Kangerlussuup ineriartornera siuarsarneqarsinnaasoq ACB-p erseqqissarpaa.

ACB-p ukiumi nutaami qinnutaani nangilluni allassimavoq:

1. Kangerlussuup nittarsaanneqarnissaanut Visit Greenland aqqutigalugu aningaasaliissutissanik immikkut ittunik pilersitsisoqassasoq.

2. Nunat tamalaanut aqqutit assigalugit Kangerlussuarmut aqqut aamma taamatut nittarsaanneqarnissaa.

3. Naalakkersuisumik aggertoqarluni ikaarsaarneq pillugu oqaloqatiginnittoqarnissaa taamaasilluni soqutiginninnermik takutitsinnerussammat.

Maanna Kangerlussuaq Nunatsinnit sumiginnarneqarpoq, taamaakkaluartoq inuussutissarsiornerup iluaneersut periarfissanik takusaqarsinnaapput, aningaasaleerusullutillu – peqataatitsigut. Kangerlussuarmi misigisassanik immikkuullarissunik aammalu pinngortitamik peqarmat, tamannalu akilerluarsinnaanerminik takutitsinikuuvoq. Sooruna tamanna pinngitsoortinniarneqartoq/naqisimaneqartoq, ACB-p pisortaa allappoq.

nye lufthavne samfund arctic circle business kangerlussuaq inuiaqatigiit

ATORFIIT Se alle jobs

Powered by Labrador CMS