Nalunaaqutaq marlup qaangerlugu tanneq
pinngasunngortoq Nuummi mittarfimmiippugut. Tamaani Akileraartarnermut Aqutsisoqarfiup ilanngaaserisui allaffeqarput.
Ilanngaaserisut ullaatungaani ulapputitik qanorlu suleqqinnissartik oqaluttuaraat.
Aningaasaqarnermut akileraartarnermullu naalakkersuisoq Múte Bourup Egede
tusarnaartunut ilaavoq, ilanngaaserisullu ataasiakkaarlutik ilaseritinneranni
malinnaalluaqqissaarluni.
Nalunaaqutaq marlup qaangerlugu tanneq
pinngasunngortoq Nuummi mittarfimmiippugut. Tamaani Akileraartarnermut Aqutsisoqarfiup ilanngaaserisui allaffeqarput.
Ilanngaaserisut ullaatungaani ulapputitik qanorlu suleqqinnissartik oqaluttuaraat.
Aningaasaqarnermut akileraartarnermullu naalakkersuisoq Múte Bourup Egede
tusarnaartunut ilaavoq, ilanngaaserisullu ataasiakkaarlutik ilaseritinneranni
malinnaalluaqqissaarluni.
Ilanngaaserisut angalasunik pisattanillu
misissuillutik ullaatungaani ulapissimaqaat. Aaqqissuussaasumimmi
misissueqatigiinneq aatsaat taama annertutigisoq pivoq. Timmisartut imarpik
qulaallugu angalasut sisamat ullaatungaani mipput, Nuummi mittarfik novembarimi
2024-mi atulermalli aatsaat taama amerlatigisut ullup ataatsip iluinnaani tikimmata
ulapputissaaleqisimanngeqaat.
Piffissap taamaalinerani, angalasut
pisattallu Nuummi misissorneqarneranni Københavnimi, Aarhusimi, Aalborgimi
Billundimilu ilanngaaserisut nunatsinnukartussanik aamma misissuipput. Nunat
taakkua marluk sungiusaatigalutik misissueqatigiinnerat Operation Nordlysimik
taaneqarsimasoq sisamanngornermi misissueqatigiinnersuarmut tunngaviuvoq.
Nassiussallu misissorneqannginneranni
anngiortumik eqqussuinianut misissuinermi pingaarutilik takusaqqaarparput.
- Ilaanni allaaneq ajorpoq ivikkani
qaleriissani meqquteeqqamik ujaasilluni, ilanngaaserisut ittannerit ilaat timimut
skannerip, tassa bodyscannerip alakkannginnerani taama oqarpallappoq.
Angalasut ilaat nunatsinnut eqquteqqusaanngitsunik timiminiititaqarpa? Taama pasitsaassisoqartillugu bodyscanneri una atorneqartarpoq.
Assiliisoq: Oscar Scott Carl
Ini iserfipput anngiortumik eqqussuisunik
nassaarfiusarpoq. Iioraallunimi ikiaroornartunik anngiortumik eqqussuiniat
ilaat tamaani paasisaasaramik. Bodyscanneri tunngavissalimmik
pasillertoqartillugu aatsaat atorneqartarpoq. Angalasut pissusilersuutaat ilanngaaserisullu
maluginiagaat tunngavissalimmik pasilliinermut tunngavissanut ilaasarlutik.
Bodyscanneri ulloq taanna siusinnerusukkut
pingasoriarluni atorneqarsimavoq, iioraasimasunilli nassaarfiunani.
Naalakkersuisoq Múte Bourup Egede scanneri
pillugu nassuiaasoqarnerani malinnaaqqissaarpoq. Scannerinerit siulianni
assilisaq sulisut ilaata takutippaa, tassani angalasut ilaat ikiaroornartumik graminik hunnorujulikkaanik iioraasimasoq paasineqarpoq.
OPERATION NORDLYS
Piffissaq :
Juuni 2024 – Juuni 2025
Sumiiffinni ukunani : Nuuk,
Billund, Aalborg, Aarhus aamma København
Peqataasut : Nunatsinni Akileraartarnermut Aqutsisoqarfik aamma Danmarkimi Ilanngaaserinermut Aqutsisoqarfik.
Siunertaa : Anngiortumik eqqussuisut akiornissaat suleqatigiinnerullu pitsaanerulernissaa.
Immikkut ittumik nunatsinni ilanngaaserisunut aningaasaliissutit : 2028 ilannngullugu ukiumut 5 mio. koruunit.
Nassiussat misissoqqissaarneqarput. Misissuinermi poortukkat ilaat ammartiterneqartarput, scannerilu assip tunuatungaani takuneqarsinnaasoq aamma atorneqartarluni. Ikiaroornartunik anngiortumik eqqusseriartut scanneri iluaqutigalugu paasineqartarput.
Assiliisoq: Oscar Scott Carl
Miliuunilikkaanik immikkut
aningaasaliiffigineqartut
Akileraartarnermut aqutsisoqarfik ukioq
manna aallarnerfigalugu ukiumut 5 mio. koruuninik aningaasanut inatsit aqqutigalugu aningaasaliiffigineqarnerulerpoq. Aningaasaliineruneq 2028 ilanngullugu
atuutissaaq.
Aningaasaliissutit taakkua angallattoqarnerulernerani
ilanngaaserisut misissuinerunissaanut iluaqutaassapput. Angallattoqarnerulerneralu
malugineqarlualereerpoq. Ulloq taanna malinnaanitsinni imarpik qulaallugu
timmisartut sisamat tikipput. Nuup mittarfissuartaava ammarmalli aatsaat taama
amerlatigalutik.
- Nunatsinnukaartut amerliartuinartillugit
suliassat ikiliartornavianngitsut kialluunniit takusinnaavaa,
aningaasaqarnermut akileraartarnermullu naalakkersuisoq Múte Bourup Egede
oqarpoq.
Silaannakkulli aqqutit kisimik anngiortumik
eqqussuiviusanngillat. Nunarput isorartummat eqqussuiniarsarisunik
tamakkiisumik misissuisinnaaneq ajornakusoortartoq Akileraartarnermut Aqutsisoqarfimmi pisortaq Kim Neumann Nielsen nassuiaavoq.
Nassiussat imarpik qulaallugu timmisartut apuuteqqammisaat misissoqqissaarneqarput. Ilanngaaserisut ikiaroornartunik narajuisinnaasunik sisamanik qimmeqarput, aana ilaat Liili nassiussanik narajuilluni ulapittoq.
Assiliisoq: Oscar Scott Carl
- Sineriangaatsiarujussuuvoq. Sumiiffiillu
ilaat qanoq ilioraluaruttaluunniit nakkutigisinnaasanngilagut. Quleriaammilluunniit
amerligaluarutta angummaffigisinnaanngisaannartussaallutigit.
Scannerinerit narajuinerillu
Misissuisut malinnaaffiginerat nangillugu
Air Greenlandip nassiussaleriffianut ingerlaqqippugut. Ilanngaaserisut
scannerut atorlugu qimmillu narajuinerat iluaqutigalugu nassiussanik
misissuipput. Anngiortumimmi eqqussuiniat putusiuillutik nassiussinikkut
eqqusseriarsinnaasarput, nassiussallu suugaluilluunniit imassarinngisaminnik
imaqariaannaallutik.
- Nassaaqanngikkaangatta tamanna
nassaassaqannginneranik pissuteqartoq soorunami neriuutigisarparput.
Ullumikkulli nassaanngikkutta tullissaani allatigut ujaasiniartarpugut, Akileraartarnermut
aqutsisoqarfimmi immikkoortortami pisortaq Thomas Holm Jensen oqarpoq.
Uani takusinnaavarput nunatsinnut angalasut ilaat ikiaroornartumik iioraalluni eqqusseriaraluartup assilinera. Bodyscanneri atorlugu assilisami ammalortuaqqat takuneqarsinnaapput, taakkulu tassaapput ikiaroornartut iiorakkat.
Assiliisoq: Oscar Scott Carl
ILANNGAASERISUT 2024-MI ARSAARINNISSUTAAT
Hash : 72,5
kg.
Kokain : 420
g.
LSD : 1.038-t.
Ecstasy / MDMA : 101-it katillugit 200 g.
Aningaasat arsaarinnissutigineqartut : 2,3 mio. koruunit missaat.
Nassaartoqanngikkaluartoq ujaasineq
ingerlaannarpoq
Soraarfissap nalaa nalleraalu mittarfimmi
ullormut misissuineq naammassinialerpoq. Angalasut, pisattat nassiussallu misissoqqissaarneqaraluartut
anngiortumik eqquteriakkanik nassaartoqanngilaq.
Aningaasaqarnermut akileraartarnermullu
naalakkersuisoq Múte Bourup Egede misissuinermi takuniaanermini
nassaartoqassasualugu pissangalaarsimalluni isumaqatigiissumminut allamut
ingerlaqqinnginnermini oqarpoq.
- Soorunami pissangaginikuuara
peqariasaassanersoq.
- Kisiannili sulineq ingerlasariaqarpoq,
aamma nassaartoqanngippat uniinnarfiusussaanngilaq.
Múte Bourup Egedep ilanngaaserisut sulineranni malinnaaqqissaaraluartoq piffissap ilaani qungujulaartoqarlunilu illalaartoqartarpoq.
Assiliisoq: Oscar Scott Carl
Akileraartarnermut aqutsisoqarfimmi
immikkoortortami pisortap Thomas Holm Jensenip ullormut nassaartoqannginnera
qanoq nalilissanerlugu nalornisigilaarpaa.
ILANNGAASERISUT 2023-MI ARSAARINNISSUTAAT
Hash : 73,6
kg.
Kokain : 397
g.
Aningaasat arsaarinnissutigineqartut : 3,8 mio. kr.
- Tamaat isigissagaanni ingerlalluarpugut. Ilanngaaserisutut
oqassaguma nassaarnissaq kissaatiginaraluarpoq. Illuatungaanili nassaanngitsoornerput
ajunngitsumik aamma takutitsivoq.
Misissuinersuup malinnaaffiginera uatsinnut
naammassilerpoq, imaanngilarli ilanngaaserisut naammassisut. Umiarsuarmi
Danmarkimiit tikeqqammisoq misissoriartussamaaramikku ulapikkallassapput.
Umiarsuup misissornerani nassaartoqarsimanngitsoq kingorna paasitinneqarpugut.
Sungiusaatigalunili misissueqatigiinnersuaq pissarsiaqarfiuvoq.
- Misissueqatigiinnitsinni Kalaallit Nunaat
pinngitsoorata eqqaamasussaavarput. Siornatigut taamaattuaannarnikuunngilaq,
Danmarkimi Ilanngaaserinermut aqutsisoqarfimmi misissuinermut pisortaq Jeppe Kjærgaard
oqarpoq.
Operation Nordlys suli
naammassivinneqanngilaq. Misissueqatigiinnersuaq naammassimmat nalilersueqatigiinnissaq
tullinnguutissaaq. Tassani siunissami sutigut suleqatigiilluartoqarnerusinnaanersoq ilanngullugu
eqqartorneqassalluni.
