Ulloq unnuarlu angerlarsimaffimmi sulisuusimasoq kannguttaatsuliorsimasutut eqqartuunneqarpoq
Angut maanna 67-inik ukiulik Nuummi ulloq unnuarlu angerlarsimaffimmi sulisuusimasoq niviarsiaqqanut marlunnut kannguttaatsuliorsimasutut eqqartuunneqarpoq. Angut qaammatini pingasuni pineqaatissinneqarsimasut inissiisarfianniittussanngortinneqarpoq, niviarsiaqqanullu katillugit 15.000 koruuninik taarsiisussanngortinneqarluni.
Leiff Josefsen
Angut Nuummi ulloq unnuarlu angerlarsimaffimmi sulinermi nalaani niviarsiaqqamik atoqateqarniaraluarpoq. Angut taamani 65-inik ukioqarpoq.
Angut maanna 67-inik ukiulik pisimasunut katillugit tallimanut unnerluutigineqarpoq, ilaatigut ulloq unnuarlu paaqqinnittarfimmi sulisuulluni meeqqamik 18-it inorlugit ukiulimmik kinguaassiuutitigut atornerluiniarsimasutut kannguttaatsuliorsimasutullu allatigullu kinguaassiuutitigut atornerluisimanermut.
Unnerluussummi allassimasut naapertorlugit angutip niviarsiaqqat ilaat aallaarsimaanerata nalanni atoqatiginiarsimavaa, piffissamilu allami niviarsiaraq imigassartortissimavaa, kingornalu attuualaarlugu atoqatiginiarsimagaluarlugu.
Niviarsiaqqat angut atoqatigerusussimanngilaat.
Tatiginninneq atornerlunneqartoq
Ilisimannittutut nassuiaanermi allassimavoq niviarsiaraq angut sulisutut nuannarisimagaa tatigisimallugulu.
Aallaarsimaanermi nalaani angutip niviarsiaraq atoqatiginiaraluarpaa, piumananilu oqarmat angutip niviarsiaraq allanut oqaqqunagu akisimavaa.
Angut niviarsiaqqamut kannguttaatsuliorsimanermi saniatigut aamma niviarsiaqqap allap assianik atisaqanngitsumik allamut ingerlatitseqqiisimanerminik kannguttaatsuliorsimasutut eqqartuunneqarpoq.
Unnerluussummi allassimasut naapertorlugit pisimasut 2022-imi pisimasuupput. Angut ulloq unnuarlu angerlarsimaffimmi ukiuni arlalinni atorfeqarsimavoq. Niviarsiaqqap pisimasoq oqaluttuarimmassut angut atorfimminit soraarsitaavoq.
Angut pinngitsuunerarpoq.
Naak angut pinngitsuuneraraluartoq eqqartuussiviup angut pineqartoq pisuutinniarlugu aalajangernermini angutip niviarsiaqqallu ukiui nikingangaatsiarneri angutillu paaqqinnittarfimmi sulitillugu tatigeqatigiinnerat eqqarsaatigalugit pisuutippaa.
Assit allatallu takussutissassut
Takussutissat eqqartuussivimmut takutinneqartut, soorlu allatat atoqatigiinnermullu tunngasunik assit niviarsiaqqanut inuit attaveqatigiittarfiitigut nassiunneqarsimasut pillugit eqqartuussiviup nalilerpaa niviarsiaqqat nassuiaataat tutsuiginartuusut.
Eqqartuussineq juulimi pivoq, Sermitsiamili suliaq aatsaat kingusinnerusukkut saqqummiunneqarpoq. Meeqqanut angerlarsimaffiup avataanut inissinneqartunut tunngatillugu pissutsit annertuumik sammineqartarmata allaaserisaq saqqummiupparput.
Unnerluussisussaatitaasup angutilluunniit eqqartuunneqartup eqqartuussiviup aalajangernera suliareqqitassanngortinngilaat.
