Ulloq unnuarlu ulapaarfiusoq: Nuummi savilersortoqartoq Sisimiunilu tillinniariartoqartoq

Kalaallit Nunaanni Politiit ulloq unnuarlu ulapaarsimaqaat. Pingaartumik marlunngornerup unnuaani ulapaartoqarsimasoq, pigaartut pisortaata ulloq unnuarlu nalunaarusiaani tamanna takuneqarsinnaavoq.

Nuup illoqarfiata ilaani Nuussuarmi ataasinngornermi unnukkut nalunaaqutaq 23.00 missaani politiit inummut savilersortoq allamullu savimmik siorasaarisoq ornissimavaat.

- Pisumi tamatumani pinerluttuliortoq nukappiaraavoq 15-it inorlugit ukiulik. Suliami nakuusertoqarsimaneranik siorasaarisoqarsimaneranillu suliamik aallartitsivugut, Kalaallit Nunaata Politiivini pigaartut pisortaat Malik Olesen Sermitsiamut ilisimatitsivoq.

SAR-imik suliaqarneq iluatsilluarpoq

Angut 22-nik ukiulik Upernavimmi suli ujaarineqarpoq, politiillu aalajangerput ujaarineqartup kinaassusaa saqqummiutissallugu.

Ataasinngormalli unnukkut Upernavimmi aamma annaassiniarnermik suliamik aallartitsisoqartariaqarsimavoq.

- Umiatsiaq sikumi nikeriarsinnaajunnaarsimalluni kalerriivoq, nal. 23.00 missaani, annaassiniaanissarlu aallartipparput. Kingusinnerusukkulli umiatsiamiittut nalunaarput namminneerlutik sikumit kaanngarsinnaasimallutik, taamaattumik suliaq tamanna ajunngitsumik kinguneqarpoq, Malik Olesen oqaluttuarpoq.

ATV-nik tilleriarnerit angerlarsimaffinnilu eqqissiviilliornerit

Sisimiuni politiit aamma ATV-mik tillinniariartoqarsimaneranut tunngatillugu paasiniaanermik aallartitsipput.

Ulloq unnuarlu nalunaarut naapertorlugu inuusuttut pingasut Sisimiuni suliffeqarfimmit ATV-mik tillinniariaraluarsimapput.

- Politiit pasisamik ataatsimik kinaassusersipput, maannalu pasisat marluk allat kinaassusersinissaat misissuleruttorparput, tassami inuusuttut pingasut ATV-mik tillinniariaraluarsimasut paasivarput, pigaartut pisortaat oqarpoq.

Aamma marlunngornerup unnuaani angerlarsimaffinni aqqusinernilu eqqissiviilliornerit arlallit politiinit iliuuseqarfigineqarput.