Umiarsuarnik niueqatigiinnermi akunnermiliuttoq aningaasaleerujussuarneq pillugu: – Royal Greenlandip kilisaatisiai akigissaarluinnarput

- Royal Greenland akigissaaqisunik Spaniami kilisaatiliortitsivoq. Taamaaliornera isumatusaartuliornerulluinnarsoraara.

Københavnimi suliffeqarfiup Atlantic Shippingip pisortaanera Tore Korsager Sermitsiamut taama oqarpoq. Suliffeqarfik taanna ilaatigut kilisaaterujussuarnik niueqatigiinnermi akunnermiliuttuunermik immikkut ilisimasaqarfiuvoq.

Namminersorlutik Oqartussat suliffeqarfissuat aalisakkanik qalerualinnillu aalisarnermik tunisassiornermillu aallutalik Royal Greenland 2 milliardit koruunit missarluinnaannik aningaasaliilluni ukiut arfinillit ingerlaneranni tallimanik kilisaatiliortitsinermigut sinerissap qanittuani aalisarnissamut piareersimalluarpoq.

Suliffeqarfissuarmi tassani pisortaanerugallartoq Preben Sunke taama erseqqissavoq. Taanna Toke Binzerimit decembarip aallaqqaataani paarlanneqassaaq.

Kilisaatitaavi pisinnaassuseqarnerusuusut

Preben Sunke Susanne Rajamand Arfeltip soraarsitaanerata kingorna pisortaanerugallanngortinneqarpoq.

- Aalisariutit nutaat pisinnaassuseqarnerusuusut Royal Greenlandip ukiorpassuarni iluanaaruteqarnissaanik aningaasaleerujussuarnissamullu taarsigassarsiaminik soorunami aamma akilersuinissaanik qulakkeerinnissutaaqataapput, pisortaanerugallartoq Sermitsiamut oqarpoq.

Royal Greenland aningaasarsiornikkut ukiuni kingullerni ilungersuavoq, tamannalu akileraannginnermi 196 millionit koruuninik 2024-mi amigartooruteqarneranik kinguneqarpoq.

Taamaammat tallimanik kilisaaterujussualiortitsinermut 2 milliardit koruunit missarluinnaannik aningaasaliineq isumatusaartuliornerusoq, Royal Greenlandimit isumaqarput. Kilisaatimmi nutaanngilingaata nutaanik taarsertariaqartarmata, nutaanik assigiiaanik kilisaatiliortitsineq torrallaaneruvoq.

Kilisaatit nutaat nutaaliaalluinnartuusut tulluusimaarutigigai

Suliffeqarfissuup kilisaatitaava kingulleq Kaassassuk nunatsinnut aasaq tikiunneqareerluni Kitaata imartaani raajarniutaasoq, Preben Sunkep tulluusimaarutigaa:

- Royal Greenlandip kilisaatitaavata Kaassassuup nutaaliaalluinnartuusup pisinnaassuseqarnerunera pequsersorluagaaneralu suliffeqarfissuup unammillersinnaalluarnissaanik ajornarunnaarsitsivoq.

- Suliffeqarfissuup kilisaatitaavani tallimaasuni kingullerup tigunera siulersuisut, pisortaqatigiit sulisullu tulluusimaarutigaarput, taanna oqarpoq.

Nunatsinni, Islandimi, Norgemi Savalimmiunilu umiarsuaatileqatigiiffiit pigeriikkatik taarserniarlugit raajarniutinik aalisariutinillu nutaalianik ukiuni kingullerni kilisaatisiortorput.

Ullumikkut 40 procentimik akisunerussagaluartoq

Kalaallit umiarsuaatileqatigiiffii Pinngortitaleriffillu nutaalialluinnartunik atortorissaasersukkanik aqqaneq-marlunnik ukiualuit ingerlaneranni kilisaatisinissamut isumaqatigiissusiorsimasut, Sermitsiamit 2021-mi kingullermik misissuinitta takutippaa. Ukiut tallimat arfinillit ingerlaneranni umiarsualiortitsinerit taakku katillugit 4 milliardit koruuninik naleqarput.

Taariikkatsitut Royal Greenlandip kilisaatitaavi 2 milliardit koruunit missarluinnaannik naleqarput.

- Royal Greenlandip kilisaatitaavisa nalingi agguaqatigiissikkaanni, nalilersinnaavara ullumikkut isumaqatigiissuteqarfigissagaanni minnerpaamik 40 procentimik akisunerussagaluartut, Atlantic Shippingimeersoq Tore Korsager oqarpoq.

Polar Seafood ilaqutariillu Carl Christensenikkut nutaanik aamma kilisaatisinikuupput.

Royal Greenlandip kilisaatitaava Kaassassuk Nuup umiarsulivitoqaani sisamanngornermi pisortatigoortumik atserneqassaaq. Tamatuma kingorna tamanit alakkarneqarsinnaatillugu ikaarfigineqarsinnaajumaarpoq.