KL

DK

Immami: 

Umiarsuit attaveqatigiinnerinut atortut nutaaliat atorneqalissasut

Atortut AIS-iusut nutarsarneqartussanngorput, VHF-ikkulli attaviit ilaasa peerneqarnissaat pisariaqarpoq. Tamanna massakkut ajorutaaratarsinnaavoq, siunissarli ungasinnerusoq eqqarsaatigalugu atortut nutarsakkat oqilisaataassapput, imarsiornermik ilisimasalik oqarpoq

Atortoq nutaaq siunissaq ungasinnerusoq eqqarsaatigalugu oqilisaangaatsiassaaq, massakkoqqissaarli nutarsaanermiippugut, maannalu atortumi nutaami VHF-imut attavinnik nutaanik pilersitsisoqassammat tamanna sulitillutik VHF-ip attaviinik sungiusimasaminnik atuisartunut ajoqutaasinnaavoq, Lars Frithjof Nielsen oqarp
Trine Juncher Jørgensen
JOURNALIST
Offentliggjort

VHF-radio, aqquteqanngitsumik radiup maligaasai atorlugit attaveqatigiisitsisinnaasoq, ullumikkut tassaaginnanngilaq radio nunamiit umiarsuarnut sianerfiusinnaasoq.

Atortoq nutaaq AIS-imut atortuni saqqummiussani 2.0-jusoq VDES-imik, tassa VHF Data Exchance System-imik taaguuserneqarsimavoq. Atortoq kalerrisaarinermut, silasiornermut, paasissutissanik katersinermut ilaatigullu qaammataasat atorlugit atortunut digitaliusunut allarpassuarnut atorneqarsinnaavoq

VHF-radio ullumikkut attaveqatigiinnermut atortuuvoq tamatigoortoq, AIS-imik tigooraatitaqareersoq. AIS tassaavoq Automatic Identification System, sumiissusersiornermut apunnginnissamullu atortuusoq, taamaalilluni umiarsuarniit AIS-inik nassiussuutilinniit paasissutissanik pissarsissutaasinnaasoq. Paasissutissat soorlu atit, suussutsit, sumiiffiit, ingerlaarfiit nunamit suminngaanneerfiit, sumunngarfiit umiarsuullu ilisarnaatitut normui pissarsiarineqarsinnaapput. Annermik ingerlaarfiit sukkassutsillu pingaaruteqarput. Radiummi paasissutissat taakku atorlugit umiarsuarnut allanut aportoqalernersoq naatsorsorsinnaavaa.

Attaviit VHF-imiit peeqquneqartut

Duplex: 24, 25, 26, 27, 28, 75, 76, 84, 85, 86

Simplex: 1024, 2025, 1026, 2026, 2084, 1085, 2085, 1086, 2086

Atortoq nutaaq attavinnik pisariaqartitsisoq

Arlalippassuilli AIS-imut atortumik atuisuulersimanerat unammillernartuuvoq, maannami attaviusinnaasut nungulerput. Saqqummiussaq 2.0 – VDES-imik (VHF Data Exchange System) taaneqartoq – atorneqalissaaq, VHF-imi attaviit ilaasa atorunnaanissaat pisariaqarpoq. Lars Frithjof Nielsen, Garminimi imarsiornermik immikkut ilisimasalik taama oqaluttuarpoq.

– Atortoq nutaaq, AIS-imut paarlattaasussaq, 32-riaammik sukkanerussaaq. Taanna umiarsuit akornanni suli toqqaannartumik attaveqartassaaq, aammali qaammataasat atorlugit attaveqartassaaq, tassa imaappoq, umiarsuit radiup maligaasaaniilluunniit anguneqarsinnaanngikkaluarunilluunniit attavigineqarsinnaassapput – tassa nunarsuaq tamakkerlugu taamatupajaarluunniit attaveqarsinnaassapput. Sikoqassuseq aamma nakkutigineqarsinnaassaaq, taamatuttaarlu assersuutigalugu avatangiisini atugassarititaasut, sumiiffinni aalajangersimasuni kissassutsit nillissutsillu assigisaaluunniit nakkutigissagaanni puttaqutit silassorissuusiallit atorneqarsinnaassapput. Atortoq nutaaq siunissaq ungasinnerusoq eqqarsaatigalugu oqilisaangaatsiassaaq, massakkoqqissaarli nutarsaanermiippugut, maannalu atortumi nutaami VHF-imut attavinnik nutaanik pilersitsisoqassaaq , Lars Frithjof Nielsen oqarpoq. 

Attaviit peerneqassasut 

Suleqatigiissitanit World Radiocommunication Conference-mit (WRC) nalunaarut tassaavoq maanna VHF-radiuniit attaviit ilaat oqaloqatigiilluni attaveqatigiinnermut atorneqannginniassammata peerneqassasut.

VHF-radiut tamarmik qarasaasiaasa atortui nutarsaaqqusissummik, attavinnik nunani tamalaani atorneqarsinnaasunik piiaasussamik, ukioq naatinnagu tigusaqassasut Garmin nalunaaruteqareerpoq.

Nunalli ilaat siunertanut akuerisaasunut attavinnik atuinissamik akuersisinnaassapput, Kalaallit Nunaannilu Nalunaarasuartaateqarnermut Aqutsisut attaviit qanoq sivisutigisumik atorneqarnissaat akuerissaneraat suli ilisimaneqanngilaq.

– Garminili ingerlatseqatigiiffittut nunani tamalaani aallussaqartutut malittarisassanik malinnittariaqarpoq, taamaammallu nutarsaanitsinni attaviit pineqartut peernikuuagut. Attaviilli ilaat sulinermut atatillugu Kalaallit Nunaanni suli atorneqarmata, Garminimiit VHF-radiusisimagaanni attaviit tuniniaasumiit ikkutseqqinneqarsinnaapput. Nutarsaanissaq aamma utaqqisinneqarsinnaavoq, Lars Frithjof Nielsen oqarpoq.

Allaaserisaq ilassutitut saqqummersitami Motoori-mi saqqummersinneqarpoq. Motoori tamaat uani atuarsinnaavat.

vdes motoori maritim kommunikation inuiaqatigiit vhf-radio garmin ais-system samfund

ATORFIIT Se alle jobs

Powered by Labrador CMS