PAUL WATSON PILLUGU SULIAQ
Unnerluussisoq naammagisimaarinnippoq - illersuisoq naammagittaalliorpoq
Mariam Khalil, Kalaallit Nunaanni Politiit unnerluussisuisa pisortaat naammagisimaarinnippoq Paul Watsonip tigummigallarneqarnerata sivitsorneqarnera pillugu: - Justitsministeria nalilersuinerminik nangitsisinnaanngorpoq Watson Japanimut tunniunneqassanersoq pillugu. Akerlianik Watsonip illersuisui qisuariarujussuarput - eqqartuussivimmi ataatsimiinneq tamarmi isornartumik ingerlanneqarpoq, Julie Stage, Watsonip illersuisuisa ilaat oqarpoq.
Watsonip qimaasinnaanera aarlerinarmat, taassuma tigummigallagaanera anstaltimi nanginneqassasoq unnerluussisut noqqaassutaat dommerip malippaa. Assimi takuneqarsinnaavoq eqqartuussivimmiinnerup kingorna Watson politiinit anstalitiliaanneqalersoq.
Assiliisoq: Jørgen Chemnitz
- Paul Watsonip tigusarineqarneranut atatillugu Kalaallit Nunaanni Politiit unnerluussisuisa oqartussaasuinit noqqaassutigineqarnikuuvoq taanna tigummigallagaassasoq. Tigummigallagaanera maanna sivitsorneqarpoq, taamaalilluni inatsisinik atortitsinermut ministeriaqarfik suliamut tunngatillugu nalilersuillunilu aalajangiisinnaaniassammat, Maannalu suliaq eqqissisimanerusumik ingerlanneqarsinnaalerpoq, tunniunneqarnissaanik noqqaassut pillugu qaquguussagaluarnersoq aalajangiisoqarnissaaata tungaanut , Kalaallit Nunaanni Politiit unnerluussisuisa pisortaat Mariam Khalil Sermitsiamut oqarpoq.
Taamaattumik hotelimiigani pineqaatissinneqarsimasunut inissiisarfimmiissaaq
Illersuisut piumasaqaateqaraluarput Watson, inatsisinik atortitsinermut ministereqarfimmit suliamik ingerlatsisoqarnerani hotelimi najugaqartinneqassasoq, taarsiullugu passini tunniukkallarsinnaammagu taamaalillunilu pineqaatissinneqarsimasunut inissiisarfimmiitinneqassanngitsoq, kisianni unnerluussisut tamanna akerlilerpaat:
- Inatsit tunngaviusoq naapertorlugu killisiuinermi ullumikkullu eqqartuussivimmi ataatsimiinnermi, naqissuserneqarpoq 2012-imi Tysklandimi tigusaasimasoq, Japanimut tunniunneqarsinnaanissani aarleqqutigalugu, Tysklandimiit qimaasimavoq, tassani aamma tigummigallagaasimagaluarluni. Taamaattumik isumaqarpugut qimaasinnaaneranut aarlerinartoqartoq, taamaattumillu pisariaqartipparput tigummigallagaasariaqarnera anstaltimi pissasoq aalajangiisoqarnissaata tungaanut, unnerluussisut pisortaat Mariam Khalil nassuiaavoq.
Kalaallit Nunaanni Politiit unnerluussisuisa pisortaat ilanngullugu nassuiaavoq Kalaallit Nunaat Danmarkilu inatsisit tunngavigalugit ingerlatsiffiummata, aammalu nunat tamalaat akornanni inatsisit malinneqarmata, taamaammat Kalaallit Nunaanni Politiit qisuariaataat taamaattoq, tassa nunat tamalaat akornanni inatsisit atuuttut maleqqissaarlugit inuit ujaarineqartut pillugit suliamik ingerlatsisoqartoq.
Pingasunngornermi septembarip sisamaani nutaamik eqqartuussivimmi ataatsimiittoqartussaammat, tigummigallagaaneralu suli sivitsorneqqinneqarsinnaammat unnerluussisoq aperaarput, qanoq sivisutigisumik tigummigallagaaneranik sivitsuisarneq pissanersoq:
- Tamanna pillugu oqaaseqarsinnaanngilanga.
Kisianni eqqartuussissuserisup aalajangiineranik naammagisimaarpit?
- Aap, unnerluussisunit kissaatigaarput Paul Watsonip tigummigallagaanera sapaatip akunnerinik pingasunik sivitsorneqassasoq, taamaalilluta justitsministeriap aalajangiinissaanut utaqqisinnaaniassagatta, taamaammat eqqartuussisup aalajangiinera naammagisimaarpara, Kalaallit Nunaanni Politiit unnerluussisartuisa pisortaat, Mariam Khalil akivoq.
Illersuisoq: Eqqartuussivimmi ataatsimiinneq tamarmi isornartorsiorneqarpoq
Eqqartuussivimmi ataatsimiinneq ullumi sisamanngornermi nal. 09:00-miit 12:00-ip kinguninnguata tungaanut ingerlanneqartumi, aallartinneraniilli teknikkikkut nutserisoqarnikkullu ajornartorsiuteqarpoq. Watsonip illersuisui aamma itigartinneqarput videoliamik takutitsinissaminnut, illersuisut isumaat malillugu videoliap uppernarsarsinnaagaa Paul Watson pillugu unnerluutigineqartut eqqortuunngitsut. Taamaalilluni Watsonip illersuisuisa eqqartuussivimmi pisut annikinngitsumik isornartorsiorpaat:
- Paarnaarullugu tigummigallagaanera pillugu Kalaallit Nunaanni eqqartussisuuneqarfimmut ullumi aalajangiineq naammagittaalliuutiginiarlugu toqqaanerput. Isumaqarpugut akuersaarneqarsinnaangitsoq uppernarsaatinik videoklippenillu takutitsinissamut akuersissuteqannginnera, Julie Stage, Watsonip illersuisuisa ilaat erseqqissaavoq.
Videoliaq pineqartoq takutinneqarusukkaluartorlu tassaavoq Animal Planet-imeersoq "Whale wars"-imeersoq piviusulikkersaarutaallunilu pisoqarfimmit aallakaatitassiaasoq, Watsonip illersuisui isumaqarput videoliap taassuma uppernarsarsinnaagaa unnerluutigineqartut eqqunngitsut.
Videomik takutitsinermut itigartitsineq kisiat naammagittaalliuutigineqanngilaq, tassami Watsonimut tuluttut oqaluttuusumut nutserisussaqartitsisoqarsimanngilaq. Eqqartuussivimmi najuuttut arlallit nutserisuuniaraluarput, kisianni iluatsinngilaq taamaalillunilu illersuisoq eqqartuussivimmi najuuttoq Paul Watsonimut nutserisuusariaqarluni.
Naammagittaalliuutigineqartut pingajuat tassaavoq Watsonip illersuisui naapertorlugit taanna pinerlunniartartutut pineqarmat saviminermillu paffequserlugu angallanneqarmat.
- Inatsisit atuutsinneqarneranut ministeriaqarfik kaammattorparput, piaarnerpaamik Japanip tunniussinissamik qinnuteqaataa itigartinneqassasoq. Paul Watsonimut unnerluutigineqartut piviusumut naapertuutinngillat, Japanimit piffissamut tulluartumik pisut ilusiligaapput, siunertarineqarluni Paul Watson taassumalu suliniutai akornuserneqassasut, Japanip inatsisinik unioqqutitsilluni arfanniartarneranik unitsitsiniaanermut tunngassuteqartut, illersuisoq Julie Stage ilaatigut taamak oqarpoq eqqartuussivimmi ataatsimiinnerup kingorna.
Eqqartuussivimmi ataatsimiinnerup nalaani pineqartoq, eqqissisimalluni pisunut malinnaavoq, qaqortumik qernertunik titarnilersukkamik tujuuloqarpoq, soorlulusooq takutikkusullugu maannakkut Nuummi pineqaatissinneqarsimasut inissiisarfimmiitinneqarluni.
