Unnerluutigineqartut tallimat pinerluttuliornernut arlalinnut Sisimiuni eqqartuussivimmi eqqartuunneqarput
Persuttaanermut, siorasaarinermut tillinniarnermullu angutit marluk arnallu pingasut ullumi eqqartuunneqarput. Taakku pinerloqqissagaluarpata pineqaatissinneqartussanngortinneqarput, ataaserlu akiliisitaasussanngortinneqarluni.
Matup matoqqasup tunuani inuit tallimat eqqartuussivilersuunneqarput. Tamanna Sisimiuni Qeqqata Eqqartuussiveqarfiani pivoq.
Dorthea Reimer-Johansen
Qeqqata Eqqartuussiveqarfia Sisimiuni sisamanngornermi inoqaaluppoq.
Sisimiuni sila nuianerata, nillernerata anorsataarneratalu nalaani inuit tallimat arlalinnut unnerluutigineqarlutik eqqartuussivilersuunneqarput.
Taakku tallimat, angutit marluk arnallu pingasut ilaatigut tillinniarnermut, hashimik tigummiarsimasutut, annersaasimasutut siorasaarisimasutullu eqqartuussivilersuunneqarput.
Pisuutinneqartut
Eqqartuussiveqarfiup suliaq pingasunngornermi aallartippaa, sisamanngornermilu ualikkut marlunngortoq eqqartuussineq naammassineqarluni nalunaarutigineqarpoq.
Inuit katillugit arfineq-pingasuusut sanileriillutik issiapput, tassani tallimat eqqartuunneqarlutik, pingasunillu illersuisoqarlutik. Unnerluussisussaatitaasoq akiani issiavoq, eqqartuussutillu inernerata tusarnissaanut piareersimalluni.
Arnani marluk niviarsiaraapput 18-it ataallugit ukioqarlutik.
Niviarsiaraq siulleq 18-it ataallugit ukioqartoq tillinniarsimanermut annersaasimanermullu pisuutinneqarluni eqqartuunneqarami aningaasanik 1.500 koruuninik akiligassinneqarluni pineqaatissinneqarpoq.
Niviarsiaqqap aappaa aamma 18-it ataallugit ukioqarpoq 1.500 koruuninik akiligassinneqarluni pineqaatissinneqarpoq. Tassani annersaasimasutut siorasaarisimasutullu pisuutinneqarpoq.
Arnat pingajuat - 26-inik ukioqartoq - tillinniarsimanermut mianersoqqussummik tunineqarpoq. Tillinniarnermut allamut pinngitsuutinneqarpoq.
Siorasaarisimasutut tillinniarsimasutullu pineqaatissiineq
Angut 28-inik ukiulik siorasaarisimasutut tillissimasutullu pisuutinneqarluni pineqaatissinneqarsimasut inissiisarfiannut ulluni 30-ini inissinneqartussanngorlugu pineqaatissinneqarpoq, ukiulli ataatsip iluani pinerlussimanngippat tamanna atorunnaarsinneqassaaq.
Tillinniarsimasutut hashimillu tigummiarsimasutut pinngitsuutinneqarpoq.
Angutip aappaa tillissimasutut pisuutinneqarluni pineqaatissinneqarsimasut inissiisarfianut ulluni 20-ini inissittussanngorlugu eqqartuunneqarpoq, ukiulli ataatsip iluani pinerloqqissimanngippat tamanna atorunnaassalluni.
Taassuma sapaatip akunneri sisamat ingerlaneranni aningaasat 25.776,50 koruunit pisiniarfimmut taarsissavai.
Eqqartuunneqartuni sisamaasuni eqqartuunneqarnerik akueraat, kingulliulli eqqaaneqartup ulluni 14-ini eqqarsarfeqarnissani piumasaraa.
