USA-mi qinersisinnaasut nalunaarsorneqarsimasut quliugaangata sisamat qinersiartorput
2020-mi coronap nunarsuaq tamakkerlugu tuniluunnerata nalaani præsidentimut qinersinissaq sioqqullugu aatsaat taama amerlatigisut qinersipput. Ukioq manna qinersiartortut ikinnerujussuupput.
Pingasunngornerup ingerlanerani USA-mi præsidentinngortussaq kinaanersoq paasineqassaaq.
BRENDAN SMIALOWSKI, PETER ZAY
USA-mi marlunngornermi præsidentimut qinersisoqarnissaa sioqqullugu inuit 78 millioninit amerlanerusut qinersipput.
Taamaasilluni qinersisartut nalunaarsorneqarsimasut quliugaangata sisamat missaat qinersiartorsimapput, tamannalu USA-mi aviisimi The New York Times-imi kisitsisit takutippaat.
Qinersisulli qassiunersut aatsaat qinersinerup kingorna kisinneqarumaarput, naalagaaffeqatigiinnimi arlalinni novembarip tallimaata kingorna allakkatigut qinersinerit aatsaat tiguneqassammata.
Ulloq qinersivik sioqqullugu qinersiartortut 2020-mut sanilliullugu ikinnerujussuupput, taamanikkummi 101 millionit qinersiartorsimapput.
Ukiut sisamat matuma siorna præsidentimut qinersineq coronap nunarsuaq tamakkerlugu tuniluunnerata nalaani pivoq, tamannalu Amerikamiorpassuit qinersinissaq sioqqullugu allakkatigut qinersiniarlutik qinersivimmulluunniit takkunniarlutik aalajangernerannut pissutaanerpaasorineqarpoq.
Allakkatigut qinersisoqarsinnaavoq, qinersivimmi immersugassaq immersorlugu qinersivimmut tunniukkiartorneqarsinnaalluni qinersivimmiluunniit qinersisoqarsinnaalluni.
Qinersinermi matumani North Carolinami novembarip tallimaanni qinersisinnaasut nalunaarsorneqarsimasut amerlanerpaat taasisimapput.
Tassani qinersisartut pingasuugaangata marluk qinersiartorsimapput. Qinersiartortut amerlanersaat qinersinissaq ulloq sioqqullugu qinersivimmut qinersiartortartut, The New York Times-imi naatsorsuinerit takutippaat.
Florida Georgialu tulliupput, taakkunani qinersisinnaasut 60 procentii 57 procentiilu marlunngorneq sioqqullugu qinersisimammata.
USA-mi innuttaasut præsidentimut qinersinermi aatsaat qinersisartutut nalunaarsorsimagunik qinersisinnaapput.
2020-mi qinersisoqarneraniilli naalagaaffiit ilaat qinersinissaq sioqqullugu qinersinissamik ajornakusoornerulersitsisunik inatsisiliorsimapput.
Ilaatigut naalagaaffiit Georgia North Carolinalu taamaapput.
Assersuutigalugu Georgiami inatsisartut republikanerinit aqunneqartut naalagaaffimmilu guvernøri allakkatigut qinersisinnaajumallutik qinersisartut qinersissutissanik qinnuteqarfigisinnaasaannik sivikillisitsinissaq pillugu inatsisiliorsimapput.
Pennsylvaniamili, qinersiartujaartartut amerlanerulersinniarlugit Republikanerit suliniuteqarsimapput.
/ritzau/
