KL

DK

USA-p aallartitaqarfia: Kalaallit Nunaanni sakkutooqarnerunissaq pilersaarutaanngilaq

Donald Trumpip Kalaallit Nunaat aningaasatigut sakkutooqarnikkullu pinngitsaaliilluni aqunniarniarlugu itigartikkusunngilaa.

USA sorsunnersuup kingulliup kingornali Kalaallit Nunaanni sakkutooqarpoq. Ullumikkut Amerikamiut illersornissamut sakkutooqarfigisaat ataasiinnaavoq, tassa sakkutoqarfik Pituffik Space Base. Siornatigut Thule-basemik taaguuteqarsimavoq.
Ritzaus Bureau
Saqqummersinneqarpoq

USA-p Kalaallit Nunaanni sakkutooqarnini annertusarniarlugu maannakkorpiaq pilersaaruteqanngilaq.

Taama USA-p Danmarkimi aallartitaqarfiani oqaaseqartartoq nutaarsiassaqartitsivimmut Reutersimut oqarpoq.

- USA-p maanna Kalaallit Nunaanni sakkutooqarnerulernissaanik pilersaaruteqanngilaq.

- siunnersuutit tamarmik isumannaallisaanikkut pisariaqartitatsinnik matussusiinissaat qulakkeerniarlugu Københavni Nuullu qanimut suleqatigiuassavavut, oqaaseqartartoq atersineqanngitsoq oqarpoq.

USA-mi præsidentinngortussaq Donald Trump Kalaallit Nunaata Amerikamiunit aqunneqalernissaanik soqutiginningaarnini erserseqqammeraalu taama oqarpoq.

Københavnimi aallartitaqarfik USA-mi maannakkut naalakkersuisuusut soqutigisaannut sinniisuuvoq. Tassa præsidentip Joe Bidenip siuttuuffigisai. Taanna ungasinngitsukkut atorfimminit tunuassaaq.

Donald Trump 2019-imi siullermeerluni præsidentiunermini Kalaallit Nunaata aqunneqarnissaanik siunnersuuteqaqqaarpoq.

Qinigaaqqereerluni maanna taamatut kissaateqaqqippoq.

Kingullertigut Trumpip kissaatigisani piviusunngortinniarlugu sakkutooqarnikkut aningaasatigullu pinngitsaaliilluni iliuuseqarnissani itigartitsissutiginagu marlunngornermi unnukkut oqarpoq.

USA-p præsidentinngortussaa naapertorlugu Kalaallit Nunaat USA-p isumannaatsuuneranut pingaaruteqartoq. Qeqertap Amerikap Avannarliup Europap Asiallu akornanni Issittumiinnera pissutaavoq.

USA sorsunnersuup kingulliup kingornali Kalaallit Nunaanni sakkutooqarpoq. Ullumikkut Amerikamiut illersornissamut sakkutooqarfigisaat ataasiinnaavoq, tassa sakkutoqarfik Pituffik Space Base. Siornatigut Thule-basemik taaguuteqarsimavoq.

Sakkutooqarfik Avannaata Kitaaniittoq ilaatigut radarimik, USA-mut rakettinik aallartitsisoqarpat kalerrisaarisinnaasumik, atortoqarpoq.

Sakkutooqarfik 2023-mi Pituffimmik atseqqinneqarpoq. Tassani Space Force-mut (sakkutuut silaannarsuarmik nakkutilliisut, aaqq.) ilanngutsinneqarpoq. Sakkutooqariaaseq nutaaq 2019-imi Donald Trumpip siullermeerluni naalakkersuisuunerani pilersinneqarpoq.

Januaarip 20-ani ivertinneqarpat præsidentiunera aallartissaaq.

Trumpip atorfinitsinneqarnini sioqqullugu niuertoq aallarnisaasorlu 49-nik ukiulik Ken Howery Danmarkimi aallartitassatut siorna decembarip 23-ani toqqarpaa.

Trumpip tamatumunnga atatillugu Kalaallit Nunaat pillugu isumani inuit nittartakkatigut attaveqaqatigiittarfianni, Truth Social-imi, saqqummiuteqqippaa.

- USA-p nunap isumannaatsuunissaa nunarsuarmilu kiffaanngissuseq eqqarsaatigalugit USA-p Kalaallit Nunaat apiginissaa aqunnissaalu pingaaruteqarluinnartutut isigai, Trump allappoq.

/ritzau/

militær tilstedeværelse inuiaqatigiit donald trump pituffik space base usa samfund

ATORFIIT Se alle jobs

Powered by Labrador CMS