USA Ukrainelu ukiuni qulini isumannaallisaanissamut isumaqatigiissuteqarput
Isumaqatigiissut G7-ip ataatsimeersuarnerani atsiorneqareersoq USA-mi naalakkersuisunngortussanut pisussaaffiliissaaq.
Siunissaq ungasinnerusoq eqqarsaatigalugu isumannaallisaanermut isumaqatigiissut sisamanngormat unnukkut Italiap kujataani Ukrainep præsidentiata Volodymyr Zelenskyjip USA-llu præsidentiata Joe Bidenip saqqummiuppaat.
Mandel Ngan/Ritzau Scanpix
G7-ip ataatsimeersuarnerani isumannaallisaanermut isumaqatigiissut ukiuni qulini atuuttussaq USA-p præsidentiata Joe Bidenip Ukrainellu præsidentiata Volodymyr Zelenskyjip atsiorpaat.
Tamanna Ukrainep Ruslandimut akiuunnerulernissaanut iluaqutaassaaq.
USA-mi naalakkersuisunngortussat Ukrainemik tapersersuinissamut pisussaaffilernissaannik isumaqatigiissut siunertaqarpoq. Aamma Donald Trump USA-mi præsidentinngussagaluarpat, atorfilittat oqarput.
Isumaqatigiissut naapertorlugu Ukrainep sakkutooqarneranik pisoqaavallaartunik siunissaq ungasinnerusoq eqqarsaatigalugu USA ineriartortitsissaaq, Ukrainellu Natomut ilaasortanngornissaanut USA alloriarfiussaaq.
Ukraine Ruslandip saassutissappagu sioorasaassappaguluunniit, Ukrainep imminut illersornissamut pisariaqartitai erseqqissarniarlugit ullup ataatsip ingerlanerani akissutissaq pillugu isumasioqatigiinnissamut USA-mi Ukrainemilu oqartussaasut qullersaasut ataatsimeeqatigiittassasut aamma allassimavoq.
Ukrainemut 50 milliardit dollarinik (346 milliardit koruuninik) USA-p taarsigassarsisitsinissaa isumaqatigiissutigineqartoq, USA-p nunanut allanut ministeria Mike Pompeo oqarpoq. Ruslandip præsidentianut Vladimir Putinimut tamanna mianersoqqussutaasoq Bidenip oqaatigaa.
Tamanna "taama ingerlaannartoqarsinnaannginneranik Putinimut ersersitsivoq. Avissaartissinnaanngilaatigut".
Nunat Nato-mut ilaasortaasut arlallit, ilaatigut Danmark, Norge Sverigelu, Ukraine sakkutooqarnikkut aningaasatigullu tapersersortuarumallugu siunissaq ungasinnerusoq eqqarsaatigalugu isumaqatigiissuteqarsimapput.
Zelenskyj piffissami sivisuumi sukkasuumik Natomut ilaasortanngornissamik oqariartuuteqartuarpoq.
NATO-mili ilaasortat tunuarsimaarput. Nunamut ilaasortaasumut saassussineq tamanut saassussinerusoq akiorneqarumaartorlu, Nato-p immikkoortortaani 5-imi allassimavoq.
Sorsunnerup nalaani Ukraine Natomut ilaasortanngorpat, Nato Ruslandimik akerleriilersitsisinnaavoq, atomimillu sakkussialinnik sorsunneq aseruisoq pisinnaalluni.
/ritzau/Reuters
