Utoqqalinersiaqarneq iluarsineqalersoq
Utoqqalinersiutit pillugit inatsip nutaap allanngortinnissaa Inatsisartut ullumi siullermeerlugu suliarissavaat. Inatsisip siunertarinngisaanik kinguneqarnikuunera aallaavigalugu IA-p aalajangiiffigisassatut siunnersuutaa Naalakkersuisunit iluarineqapallanngilaq.
Utoqqalinersiat Inatsisartuni ullumi oqaluuserineqassapput.
Leiff Josefsen
Utoqqalinersiaanut tunngasut arlallit Inatsisartut ullumi oqaluuserissavaat.
Naalakkersuisut utoqqalinersiutit pillugit inatsimmi 2023-mi ukiakkut ataatsimiinnermi akuerineqartumi kinguneri inatsimmi siunertarineqanngitsut aaqqinniarlugit allannguutissatut siunnersuuteqarput.
- Ajoraluartumik utoqqalinersiallit eqimattat immikkut ittumik kisermaanut tapeqarnermiit
appasinnerusumut aappaqartumut tapeqarnermut nuunneqarnerannik siunnersuut
siunertarineqanngitsumik kinguneqarpoq. Siunnersuummut tamanna siunertarineqanngilaq.
Naalakkersuisunit kissaatigineqanngilaq utoqqalinersiallit annikinnerusumik
pensioneqarnissaat, naalakkersuisiq Jess Svane inatsisip saqqummiunnerani paasititsivoq.
Isertitakinnerpaat utoqqalinersianik qaffasinnerusunik suli tigusisarnissaat qulakkeerniarlugu, soorlu 2023-mi taamatut pisoqartoq taavalu siunnersuutip malittarisassat 2023-mut sanilliullugit pisariinnerulersinnissaat anguniarneqarpoq.
IA-p siunnersuutaata naligiinnginneq annerulersissagaa
Inuit Ataqatigiinnit Inatsisartuni ilaasortap Mariane Paviasenip aalajangsiifffigisassatut siunnersuutaani pingaarnerpaaq tassaavoq "isertitat annertussusaat malillugit utoqqalinermi soraarnerussutisiat
ilanngarneqartarunnaarlutilluunniit atorunnaarsinneqartarunnaarsillugit".
Siunnersuut Jess Svanep tigulluarnagu kingunerisinnaasai taakkartorpai.
- Maannakkut malittarisassiat inuiaqatigiinni akuuffigisatsinni naligiissuunermik
qulakkeerinneqataapput. Isertitaqqortunerpaanut ilanngaateqartarneq peerneqarpat
naligiissuunnginneq malunnartumik annertuseriassaaq. Inuiaqatigiinni pisuujunerpaat suli
pisuunngoqqinnerussapput. 2023-mi Inatsisartut ukiakkut ataatsimiinneranni
pilersuisussaaqatigiinnerup atorunnaarsinneratigut tamanna aamma pivoq.
Inuiaqatigiit annertusiartuinnartumik naligiissoqanngiffiusoq aallaaviatigut Naalakkersuisut
kissaatiginngilaat, siunnersuutillu naligiissuunnginneq suli annertusassavaa, Jess Svane isumaqarpoq. Taassuma siunnersuutigineqartup aningaasartuutissai matussusernissaat pingaaruteqartoq tikkuarpaa.
Utoqqalinersianik aaqqissuusseqqinnermi suliami takkuttussami utoqqalinersialinnut
isertitanut killingititanik piigaqarnissaq Naalakkersuisut ilaatikkusukkaat Jess Svanep tunngavilersuutigaa.
Naatsorsuutit Inatsisartut ukioq manna ukiaanerani ataatsimiinnissaannut saqqummiunnissaat naatsorsuutigineqartoq Jess Svanep ilanngullugu paasissutissiissutigaa.
