KL

DK

Venstremeersup nuimasup kalaallit EU-mut ilaasortanngornissaannik kajumissaarpai

Kalaallit Nunaat ukiuni 40-ni ilaarsortaanngereerluni EU-mut ilaasortanngoqqittariaqartoq Venstremeersoq Morten Løkkegaard isumaqarpoq.

Morten Løkkegaard (V) Kalaallit Nunaat pillugu oqallinnermut ilannguppoq. (Assi toqqorsivimmit).
Ritzaus Bureau
Saqqummersinneqarpoq

Naalakkersuisut Kalaallit Nunaata siunissaa kalaallit namminneq aalajangigassarigaat oqariartuutigineqarpoq, maannali Venstrep Europaparlamentimi ilaasortaatitaa Morten Løkkegaard oqallinnermut akuliuppoq. Kalaallit Nunaat EU-mut ilaasortanngoqqittariaqartoq taanna isumaqarpoq.

Tusagassiivik Politicomut oqarpoq.

USA-p præsidentiata Donald Trumpip Kalaallit Nunaata oqartussaaffigilernissaanik kissaateqarnini arlaleriarluni oqaatigisareeraalu taamatut oqariartuuteqarpoq. Kalaallit Nunaat EU-mut ilaasortanngorpat nuna "illersugaalluarnerulissasoq" Løkkegaard oqarpoq.

- Nunarsuarmi inuuvugut qanorluunniit nammineerusutsigigaluaraanni nunanik allanik ileqarnissaq pisariaqartoq, Løkkegaard tusagassiorfimmut oqarpoq.

Kalaallit Nunaat 1979-imi Namminersornerullutik Oqartussaqalerpoq 1985-imilu EU-mit, taamani EF-imik taaneqartumit, anilluni.

Løkkegaard naapertorlugu EU-mi ilaasortaaneq "ataatsimoorfiuvoq pitsaanerpaaq". Tamanna Danmarkimut Kalaallillu Nunaannullu atuuttoq erseqqissaavoq. Illersorneqarnissap eqqartornerani aningaasaqarneq politikkilu eqqarsaatigai.

Ministeriuneq Mette Frederiksen (S) Europami marlunngornermi angalavoq. Tysklandip kanslerianut Olaf Scholzimut tikeraaqqaariarluni kingorna Frankrigip præsidentianut Emmanuel Macronimut naggataatigullu NATO-p generalsekretærianut Mark Ruttemut pulaarpoq.

Europami ataatsimoortoqarneranik Trumpimut takutitsinissaq siunertarineqarpoq. USA-p præsidentiata piumasani anguniarlugu sakkutooqarnikkut pissaaneqarnermik atuinissaq akitsuusiinissarluunniit tunuarsimaarfiginagu oqariartuutigereerpaa.

Trump Kalaallit Nunaat pillugu pisortatigoortumik januaarip 26-ani kingullermik oqaaseqarpoq. Air Force One-mi Las Vegasimiit Miamimut timmisartornerani tamanna pivoq. Danmarkip Kalaallit Nunaata tuniniarneqarnissaanut itigartitsinera præsidentip akuerisinnaaneraa CNN-imi tusagassiortup Trump aperivaa. Tamanna tusagassiuutini Forbes-imi immiussaq tusarnaarneqarsinnaavoq.

- Kalaallit Nunaat pillugu apeqqut uatsinni aaqqikkumaarpoq.

- Isumaqarpunga pissarsiariumaaripput, Trump oqarpoq, Kalaallit Nunaannilu innuttaasut 57.000-ingajaat "uagutsinniikkusuttut" ilanngullugu oqaatigaa.

"Nunarsuarmi kiffaanngissuseqarnerup illersornissaa“ pineqartoq Trumpip uteqqippaa. Kinamiut Ruslandillu umiarsuaat tassaniittut, aamma "pissutsit ajorluinnartut“ oqaatigai.

- USA apeqqutaanngilaq, uagulliuna kiffaanngissuseqartitsisinnaasugut. Taakku (Danmark, aaqq.) taamaaliorsinnaanngillat. Sapaatit-akunneri marluk matuma siorna qimussit marluk tassungaappaat isumaqarlutillu illersuinerusoq.

- Inuiaat Danmarkip iliusai aamma iluarinngilaat, uagullu nuannaraatigut, Trump oqarpoq.

Verianip Berlingske aamma kalaallit aviisiat Sermitsiaq sinnerlugit marlunngornermi isumasiuinerata takutippaa kalaallit 85 procentiisa naalagaaffeqatigiinnermiit anillutik USA-mut ilanngunnissartik naaggaaraat.

Kalaallit 6 procentiisa Kalaallit Nunaat USA-mut ilaalissasoq kissaatigaat, 9 procentillu apeqqut tamanna isummerfiginngilaat.

samfund inuiaqatigiit grønland forsvars- og sikkerhedspolitik eu udenrigspolitik udland venstre

ATORFIIT Se alle jobs

Powered by Labrador CMS