Video takujuk: Nanoq Qoornumiittoq
Nanoq Kujataanit Nuup tungaanut nalulluni ingerlaareerluni Nuup avannaani nunaqarfimmut Qoornumut pingasunngornermi unnukkut apuuppoq. Marloriarluni igitsisoqareersorlu nanoq nunaqarfimmit qimaavoq.
Minik Gerstrømip mobilia pingasunngornermi unnukkut qulip missaani sianerpoq.
- Innalereertunga. Paasitinneqarpungali nanoq ulloq naallugu alapernaaffigisarput Qoornumut pisimasoq. Sukkaannaq makeriarlunga igalaakkut marsipallappunga, Minik Gerstrøm oqarpoq, nangillunilu:
- Uumasumik taama ittumik takunninneq misigisaavoq nuannersoq. Nanumik aatsaat taama qanitsigisumi takuvunga. Takoqqaarakku uumasutut qaasuttuunera eqqarsaatiginngilaraluunniit. Alapernaalaariarluni aasarsiortarfitsinniillu ingerlaqqippoq, Minik Gerstrøm, ataatani peqatigalugu Qoornumiittoq, oqarpoq.
Aalisakkanik panertunik nerisoq
Mia Motzfeldt Nielsen Qoornumi aamma najugaqarpoq. Taanna aamma innareerami sianerfigineqarpoq. Taanna aamma innareerluni sianerfigitippoq. Illumi qalianiit igalaakkut alakkapallappoq.
- Sissamiittoq takusinnaavara. Taava silaannamut naamasaqaleriasaarpoq, eqqarsarpungalu aalisakkat illuma silataani qatanngutima panersigai naamagai. Taava arriitsuararsuarmik illuma tungaanukarusaalerpoq, Mia Motzfeldt Nielsen oqaluttuarpoq.
Mia Motzfeldt Nielsen Qoornumi illumini kisimiilluni najugaqarluni Sermitsiamut oqaluttuaraa. Nanullu qanilliartortillugu annilaangasimaqaluni nassuerutigaa. Nanoq Mia Motzfeldtip illuata eqqaaniittoq qui kaajallallugu naamaarpoq.
- Taava qassutit aalisakkanut panertunut assiaqutit siippai, soorlulusooq qassutit suunngitsut. Taamaasilluni nanorsuaq piliatsinnik nerriserpoq, illarluni oqarpoq.
Mianersoqqusilluni marloriarluni igittoq
Siullermik igittoqarmat nanoq Mia Motzfeldt Nielsenip illuata eqqaaniippoq.
- Nanoq eqqaminut qinerpoq, navianartoqarnersorli maluginngilaa aalisakkallu nereqqilerlugit. Aappassaanillu igittoqarmat qimaavoq, takusinnaavaralu nunaqarfimmiit nalulluni qimaguttoq, Mia Motzfeldt Nielsen oqaluttuarpoq.
Sisamanngorpat ullaap tungaani najugaqartut allat angerlarpata aalisakkat panertut sinneri tiguniarlugit Mia Motzfeldt Nielsen oqarpoq
Qoornumi illuaralik alla, Cuno Jensen, ullaaq manna Qoornumi kikkut tamarmik nanoq eqqartoraat oqarpoq.
- Ullaaq manna nanoq taanna kikkut tamarmik eqqartorpaat. Aammami immitsinnut sianeqattaatipallattaratta ippassaq unnukkut kikkut tamarmik kalerrinneqarput. Tamatta takusinnaavarput nanoq nunaqarfitsinni angalaartoq meeqqallu angerlarsimaffiannut ingerlaartoq. Tamanna pissanganartutut nipeqarsinnaagaluarpoq, uagulli misigisarput taama pissanganartiginani eqqissisimanarneruvoq, Cuno Jensen illarluni oqarpoq.
