Video takuuk: Imminut illersorniarluni nanoq Ittoqqortoormiini toqunneqartoq
Ittoqqortoormiini nanoq aallaaneqarsimasoq Kalaallit Nunaanni Politiit marlunngornermi unnukkut nalunaarfigineqarput. Nanoq qimmit ineqarfiannut qanillattortoq illoqarfiullu iluaniittoq aallaaneqarpoq.
Ittoqqortoormiini nanoq aallaaneqarpoq. Ittoqqortoormiini nanoq illup eqqaanniittoq aallaaneqartorlu nittartakkatigut inuit naapittarfiini maannakkorpiaq siaruarterneqarpoq. (Assi toqqorsivimmit).
Aalborg Zoo
Nanoq Ittoqqortoormiini imminut illersorniarluni toqunneqarpoq, Kalaallit Nunaanni Politiini pigaartut pisortaat Anette Ostenfeldt Sermitsiamut paasissutissiivoq.
- Arnap nanoq illoqarfimmiittoq uimi aallaasimagaa politiinut marlunngornermi unnukkut nalunaarutigalugu. Illoqarfimmi tamanna pivoq. Nanoq illoqarfimmukartinnagu qanittumiittoq arlaleriarluni takuneqartareersimasoq paasissutigisinnaavara, Anette Ostenfeldt oqarpoq.
Nanoq aallaaneqarsimasoq politiinut marlunngornermi unnukkut nalunaaqutaq 19:30 nalunaarutigineqarpoq.
Politiit sumiiffimmut ornigupput, aamma aalisarnermut piniarnermullu naalakkersuisoqarfik pisumut tunngatillugu ilisimatinneqarpoq, pigaartut pisortaat oqarpoq.
- Politiit suliani taamaattuni nanoq imminut illersorniarluni aallaaneqassanersoq imaluunniit taamaaliortoqassannginnersoq nalilersussavaat. Suliami matumani nanoq arlaleriarluni qanittumiissimasoq ilisimavarput. Suliaq naammassineqareersoq takusinnaavara, tassanilu pinerluttoqarsimanngitsoq nalilerneqarsimalluni, Anette Ostenfeldt oqarpoq.
Nannup aallaaneqartup immiunneqarnera inuit nittartakkatigut naapittarfiini maannakkut siammarterneqarpoq. Politiillu nalunaarput aamma namminneq takusimallugu.
