Visit Greenlandip pisortamut isumaqatigiissutini sivitsoraa

Namminersorlutik Oqartussat takornariaqarnermut siuarsaanermut ingerlatseqatigiiffianni Visit Greenlandimi siulersuisut Anne Nivíka Grødemip suleqatiginera sivitsorpaat.

Nivíka Grødemip Kalaallit Nunaata angalaffissatut akisussaassuseqartutut pilerinartutullu inissisimalernissaanik – nunami namminermi aamma nunani tamalaani – siunnerfeqarluni sulisimasoq siulersuisuni siulittaasup Anette Lingsip tusagassiorfinnut nalunaarummi erseqqissarpaa:

- Siulersuisut isumaqatigiissummik sivitsuinermikkut kissaatigaat Kalaallit Nunaanni takornariartitsisarnerup annertuumik ineriartorfiunerani soqutigineqarnerulerneranilu Visit Greenlandip periusissiatigut anguniagaata piviusunngortinnissaannut aqutsisoqarnikkut tunngavissaq pisariaqartoq qulakkiissallugu, siulersuisut aalajangiinermut tunngavilersuillutik allapput.

Anne Nivíka Grødemip sulinermi ingerlateqqinnissaa qilanaaraa:

- Siulersuisunit tatiginninnermik takutitsivigineqarnera qujamasuutigaara, aaqqissuussaanerullu taama tunniusimatigisup suliatigullu pikkorissuseqartigisup siuttuuffiginera tulluusimaarutigalugu.

- Nunatsinni takornariartitsineq periarfissarpassuaqarpoq, kalaallillu naleqartitaasa isumaliutigilluarnerisigut aallaaviginerisigullu takornariartitsinerup nunamut tamarmut iluaqutigineqartussanngorlugu ineriartortinnissaanut pitsaasunik periarfissaqarpugut. Tamannalu innuttaasut, inuussutissarsiortut oqartussallu oqaloqatiginissaannik suleqatiginissaannillu pisariaqartitsivoq – suliallu taassuma ingerlateqqinnissaa qilanaareqaara, Anne Nivíka Grødem oqarpoq.