Vivian Motzfeldt: Illersornissaq pillugu isumaqatigiissut Kalaallit Nunaannut iluaqutaassaaq
Issittumi piginnaasaqarnerulernissamut pilersaarut illersornissamut isumaqatigiissutigineqartorlu suliffeqarfinnut innuttaasunullu tamanut iluaqutaassapput, naalakkersuisoq Vivian Motzfeldt oqarpoq.
Namminiilivinnermut nunanullu allanut tunngasunut naalakkersuisoq sapaatip akunnerani matumani danskit illersornissamut ministeriat Troels Lund Poulsen ataatsimeeqatigaa illersornissamut isumaqatigiissut pillugu suliap ingerlateqqinnissaa, ilaatigut aningaasaliinerit suliniutillu qanoq inuiaqatigiinnut iluaqutaasinnaanerat, eqqartorniarlugu.
Foto: Naalakkersuisut
Nunanut allanut tunngasunut Naalakkersuisup Vivian Motzfeldtip (S) danskit illersornissamut ministeriat Troels Lund Poulsen marlunngornermi oktobarip ulluisa 29-anni ataatsimeeqatigaa, Naalakkersuisut illersornissamut isumaqatigiissummut peqataajuarnissaannut atatillugu.
- Qanoq eqqarsaateqarnerluta Troels Lund Poulsen ilisimatissallugu kissaatigaara. Isumaqatiginninniarnerni tulliuttuni suut kissaatiginerigut piareersarpara, Vivian Motzfeldt Sermitsiamut oqarpoq.
- Isumaqatiginninniarnissatsinnut piareersartinnata danskit ministeriat aalajangiusimasavut pillugit illersornissaqarnermullu isumaqatigiissutip inuiaqatigiinnut kalaallinut qanoq pingaaruteqarnera pillugu sukumiisumik ilisimatinneqarnissaa qulakkeerusuppara.
- Isumaqatiginninniarnerit aallartippata oqaloqatigiinnissamut piffissaqanngingajalluinnarpoq, taamaattumik nuannaarutigaara tamanna piviusunngortissimagakku, Sermitsiamut oqarpoq.
Vivian Motzfeldtip ataatsimut isigalugu inuiaqatigiinnut, suliffeqarfinnut innuttaasunullu pitsaanerpaamik sinaakkuteqarnissaq pingaartippaa.
- Suliniutit inuiaqatigiinnut tamanut iluaqutaasut sammisarpakka, suliassallu sapinngisamik Kalaallit Nunaanni inuiannit namminerlu suliffeqarfinnit suliarineqartartut, Vivian Motzfeldt oqarpoq erseqqissarlugulu:
- Sapinngisamik nunatta isumannaallisaaneranik nakkutilliisinnaasariaqarpugut, ilaatigut sinerissami alapernaarsuinermik, soorlu Islandimi Canadamilu atorneqartoq, aamma Sirius-imik, sinerissami takisumi atorneqartoq, aaqqiissuteqarnikkut.
- Sakkutooqarneq pineqanngilaq, inuiaqatigiilli ineriartornerat pineqarpoq, ilanngullugu oqaatigaa.
