Vivian Motzfeldt Naalagaaffiit Peqatigiit ataatsimeersuarnerata ammarneqarnerani peqataassaaq
Naalakkersuisoq Vivian Motzfeldt (S) Naalagaaffiit Peqatigiit septembarip 23-ani ataatsimeersuarnerisa ammaanersiornermi peqataassaaq. Piffissami erloqinartorsiorfiusumi Naalagaaffiit Peqatigiinni suleqatigiinneq Kalaallit Nunaannit tapersersorneqartoq taassuma takutissavaa.
- Naalagaaffiit Peqatigiit ilungersunartorsiorpoq, tunngaviusumilli nunat tamat akornanni inatsisinik toqqammaveqartumik ingerlatsinermi qulakkeerinnittuupput. Naalagaaffiit peqatigiit aatsaat taama ullumikkut pingaaruteqartigilerput, Vivian Motzfeldt Naalagaaffiit Peqatigiit ataatsimeersuarnerata ammarneqarnerani peqataanissani pillugu oqarpoq.
Arkivfoto: Leiff Josefsen
Naalagaaffiit Peqatigiit ukiumoortumik ataatsimeersuarnerat New Yorkimi aallartingajalesoq kalaallinit peqataaffigineqassaaq.
Nunanut allanut ilisimatusarnermullu naalakkersuisoq Vivian Motzfeldt (S) najuulluni pisussaq malinnaaffigissavaa, naalakkersuisut tusagassiuutinut nalunaarummi allapput.
Vivian Motzfeldt New Yorkimukarpoq, tassanilu Naalagaaffiit Peqatigiinni suleqatigiinneq Kalaallit Nunaannit tapersersorneqartoq takutinniarneqartoq nassuiaatigaa:
- Naalakkersuisunut Kalaallillu Nunaannut piffissaq manna naleqqulluinnarpoq peqataanitsigut Naalagaaffiit Peqatigiinni nunat tamat akornanni suleqatigiinnermik tapersersuinerput takutissallugu, suleqatigullu qaninnerpaat peqatigalugit akisussaaqatigiinnermik takutitsillutalu naalagaaffiit innuttanut pisussaaffii namminerlu aalajangiisinnaatitaanerup nunat tamat akornanni aalajaatsumik tunngaviusuusut aalajangiusimallugit ersarissassavarput, oqarpoq nangipporlu:
Aatsaat taama pingaaruteqartigisoq
- Piffissami nalorninartumi inuuvugut, taamaammallu peqataanissaq isumalu tamanna pillugu nunanik allanik ingerlaavartumik oqaloqateqarnissarput pingaaruteqarpoq.
Angalanermut nunanillu allanik ataatsimeeqateqarnissamut pilersaarutit inississorneqaleruttortut Naalakkersuisut nalunaarput.
Kalaallit Nunaata oqaluttuarisaanerata siunissamilu anguniagaasa nammineerluni oqaluttuarinissaat pingaaruteqartoq, aamma Naalagaaffiit Peqatigiit aatsaat taama pingaaruteqartigilersut, Vivian Motzfeldt tamatumunnga atatillugu oqarpoq:
- Naalagaaffiit Peqatigiit ilungersunartorsiorpoq, tunngaviusumilli nunat tamat akornanni inatsisinik toqqammaveqartumik ingerlatsinermi qulakkeerinnittuupput. Naalagaaffiit peqatigiit aatsaat taama ullumikkut pingaaruteqartigilerput, Vivian Motzfeldt oqarpoq.
