Vivian Motzfeldt sapaatip-akunnerani
kingullermi pingasunngornermi ullaap tungaani Siumup ataatsimiittarfianut
iseqqusivoq.
Kinguninngua partiip allattaa Ole Aggo Markussen takkuppoq
kaffiliorlunilu.
Vivian Motzfeldt sapaatip-akunnerani
kingullermi pingasunngornermi ullaap tungaani Siumup ataatsimiittarfianut
iseqqusivoq.
Kinguninngua partiip allattaa Ole Aggo Markussen takkuppoq
kaffiliorlunilu.
- Ulapippallaarunnaarnera timima qarasaralu sungiunniarsareqqaassavaat.
Tamanna Naalakkersuisutut ulapitereerluni ilikkagassaaqqaassagunarpoq.
Ulluinnaat nalinginnaanerusut sungiunnissaat ajornakusoorluinnarpoq, Vivian
Motzfeldt, maanna Namminiilivinnermut Nunanullu Allanut Naalakkersuisutut tunuartussaq,
oqarpoq.
Issittumi Atlantikullu avannaani
illersornissaq isumannaatsuunerlu pillugit danskit illersornissamut ministeriat
januaarimi isumaqatigiissuteqarfigaa.
Siumut marsip 11-ani Inatsisartunut
qinersinermi aatsaat taama kinguariartigaaq, qinigaaffimmut kingullermut
sanilliullugu arfinilinnik ilaasortaatitaqarunnaarluni. Maanna Inatsisartuni
sisamanik ilaasortaatitaqarput: Erik Jensen, Kim Kielsen, Lars Poulsen aamma
Vivian Motzfeldt. Partii siornatigut taama inissisimasimanngisaannarpoq.
- Siumut oqaluttuarisaanermi
pingaaruteqarluinnarpoq, anguniagaanut tunngatillugu aammalu partiitut
naalakkersuisuutitaqartutut. Inuiaqatigiit unammilligassarpassuaqarlutillu
nunanut tamalaanut mittarfinnut nutaanut sanaartornernullu allanut
aningaasaliisoqareersoq aningaasaqarnikkut assigiinngisitaartitsiniarlutik
nutaanik isertitassarsiortariaqarput. Tamanna aningaasat allaniit
pissarsiarineqarnerannik aamma isumaqarpoq. Siumup tunualaarnissaminut, imminut
qiviarnissaanut iluarsaaqqinnissaanullu immaqa piffissanngortoq qinersinermi
kingullermi innuttaasut taasinerisa takutippaat, Vivian Motzfeldt oqarpoq.
Siumumi ilaasortaatitaqatini peqatigalugit
qinersinermi ajorsarnermut suna pissutaanersoq aamma nalilersussavaa.
- Inuit attaveqaqatigiittarfii
allarpassuillu qinersinerup nalaani ulapissimagatta naammattumik
sammisimanngilagut. Aamma aalisarnermut inatsit, imminermini ajunngitsuusoq,
pissutaasinnaavoq, innuttaasulli toqqissisimanerusumik ikaarsaariarnissaminnik
kissaateqarsimasinnaapput. Tamanna qulakkeerlugu oqaatigisinnaanngilarput,
Vivian Motzfeldt oqarpoq.
Partiimi siuttuusut tamarmik
Naalakkersuisuni ilaasortaanerat, taamaammallu partiimi sulinerup
samminissaanut naammattumik nukissaqarsimannginnerat partiip
sanngiissutigisinnaasaatut taaneqarsinnaasoq aamma isumaqarpoq.
KNR ajornartorsiortoq tamallu
oqartussaanerat
Inatsisartunut qinigassanngortittut inuit attaveqaqatigiittarfii atorlugit
takorluukkatik saqqummiuttaraat, tamatumalu saniatigut tusagassiorfik
innuttaasunut kiffartuussisoq KNR ukiut arlallit ajornartorsiortoq
qinersisoqarnerani ingerlasinnaajunnaapajaartoq partiimi allatsi Ole Aggo
Markussen oqarpoq.
- Qineqqusaarnermi politikerit inuit
attaveqaqatigiittarfii atorluartarsimagaat, tusagassiuutilli ukiuni arlalinni
ajornatorsiorsimasut partiip allattoqarfianiit takusinnaavarput. Siumut
tusagassiuutinut isumaqatigiissummik, maannakkut pisariaqartinneqartumik,
pissarsiniarluni politikkikkut sulissuteqarsimavoq, Ole Aggo Markussen oqarpoq,
tamannalu pissutigalugu qineqqusaarnermi KNR-ip qineqqusaartut oqaaseqaataat
misissorsinnaasimanngikkai, tamannalu tamat oqartussaaqataanerannik
sanngiillisitsisoq erseqqissarpaa.
- Qineqqusaartut akerlilersorneqaratik
oqaaseqaatitik saqqummiuttarpaat. Siunissami tamanna pinngitsoortissagutsigu,
aamma tamat oqartussaaqataanerat pillug,u tusagassiuutigut tamallu
oqartussaaqataanerannik nakkutilliisut nukittorsartariaqarpagut. KNR-ip ajalusooqqanera
takullugu artornarpoq, Ole Aggo Markussen oqarpoq, taassumalu Inatsisartunut
qinersinissamut tv-kkut oqallinnermi kingullermi tusagassiuutit sammineqarmata
nuannaarutigaa, tassani tusagassiuutit nukittorsarniarlugit tusagassiuutinut
isumaqatigiissuteqartoqartariaqartoq partiit isumaqatigiissutigimmassuk.
Qinersisartut Siumup imminut qiviarnissaa
piumasarigaat
Naleraq naalakkersuisooqatigiinnissamut isumaqatiginninniarnernit anisoq
Demokraatit siulittaasuat Jens-Frederik Nielsen ataasinngornermi nalunaarpoq.
Demokraatit partiinik allanik suli isumaqatiginninniarput.
- Qinersisartut tusarnaarusuppakka,
qinerneqarnerpaallu isummatik pillugit isumaqatigiinngissuteqarsinnaanerlutik
paasiniartariaqarpaat. Siumut tunuassasoq, imminut qiviassasoq, partiilu
imminut iluarsaqqissasoq qinersisartut qinersinerisa takutippaat. Qinersisartut
qinersinera taamatut paasivara. Isumaqatiginninniarnerilli suli ingerlapput,
qanorlu pisoqassanersoq takussavarput, Vivian Motzfeldt oqarpoq.
Erik Jensen Inatsisartunut
qinersisoqarneranit ullut marluk qaangiuttut ajorsarnermut akisussaaffimmik
tigusilluni siulittaasutut tunuarpoq, siulittaasullu tullia Vivian Motzfeldt
siulittaasunngorpoq.
Angutit arnallu naligiisinneqarnerat
Vivian Motzfeldtip partiimi siulittaasutut siulittaasussamik qinersiutigaluni
immikkut ittumik ataatsimeersuarnissami aasamut ingerlanneqartussami
teknikkikkut annikitsualuit suli oqaatigiumanngilai, pingaarnerpaamilli angutit
arnallu partiimi naligiissitaanissaat sulissutigissavaa, tamatumalu saniatigut
meeqqat, inuusuttut utoqqaallu oqimaaqatigiissumik sammineqarnissaat
pingaartilluinnakkani qulakkeerniarpai.
Partiimi siulittaasussatut 2020-mi
siullermeerluni qinigassanngorteqqaarnini, qinersisitsinermili siullermi
peernini eqqaamavaa. Erik Jensen taamanikkut siullittaasuusumut Kim Kielsenimut
ajugaavoq.
- Naggataarutaasumik oqalugiaatima nalaani
ilaasortat 70-it taasisinnaatitaasut najuuttut, taakkunanngalu
arfineq-marluinnaat arnaasut oqaatigaara. Angutit assortornianngilakka,
partiilli angutit arnallu naligiinnerulernissaat qulakkeertariaqaraa kisitsisit
namminneq takutippaat. Naligiinneruleraangatta angusaqarluarnerusarpugut,
maannalu taama inissisimanitsinnut tamanna pissutaasinnaavoq, Vivian Motzfeldt
oqarpoq.
Naalakkersuisut siuliisa nunaqarfiit
ineriartortinneqarnissaat pillugu Ilulissani isumasioqatigiinnerini meeqqat,
inuusuttut arnallu atugaat allaat sammineqanngillat.
- Ilulissani isumasioqatigiinnermi
inoqarfinni aqquserngit, ullukkut unnuakkullu eqqagassanik isumaginninneq,
kuuffissat umiarsualiviillu arlaleriarlutik eqqartorneqarnerat uannut
maluginiarnartuuvoq. Angutit tamakku inuussutissarsiornerminnut attuumassuteqarmata
oqaloqatigiissutigisarpaat, kisiannili arnat meeqqallu atugaat
puigorneqartarlutik. Soorunami inuussutissarsiornermut aningaasarsiornermullu
tunngasut eqqartornissaat pingaaruteqarpoq, arnalli atugaat taamatulli
pingaaruteqartigaat, aamma aningaasarsiornissamut periarfissaat, oqaluuserinninnermi puigorneqakulasartut,
Vivian Motzfeldt oqarpoq.
