Vivian Siriusimut assingusunik aaqqiissutissanik ujartuisoq

– Kalaallit Nunaanni nakkutilliinermut isumannaallisaanermullu tunngatillugu innuttaasut tamarmik suliassamut peqataatinneqarnissaat pingaaruteqarpoq – pingaartumik innuttaasut isorliunerusuni najugallit.

Taama oqarpoq naalagaaffinngornissamut nunanullu allanut tunngasunut naalakkersuisoq Vivian Motzfeldt (S).

Taamaattumik Siriusip suliaanut assingusunik suliaqarnissamut piffissap ingerlanerani amerlanerusunik ilinniartitsinissaq sulissutigilerpaa.

– Kangerlussuarmi upalungaarsimanermut ilinniarneq maanna ingerlanneqartoq nuannaarutigeqaarput. Inuusuttorpassuit oqaasiisa takutippaat inuusuttut upalungaarsimanermut peqataatinniarlugit iliuuseqarnitsinni eqqortuliorsimasugut, oqarpoq.

Kalaallit Nunaannili nakkutilliineq kalaallinut inuiaqatigiinnut attuumassuteqarnerulersinneqarnissaa Vivian Motzfeldtip kissaatigaa, taamaalilluni kalaallit namminneq oqartussaassutsiminnik atuinissaat qulakkeerneqarniassammat.

Siriusimi sulisuusimasoq naapissagaa

Siriusi isumassarsiorfigalugu naalakkersuisup Vivian Motzfeldtip Kalaallit Nunaanni isorliunerusuni innuttaasut namminersulivinnissamut tunngatillugu aalajangiinernut peqataatinneqarsinnaanersut misissorniarpaa.

– Kalaallit Nunaanni innuttaasut nuna tamakkerlugu oqartussaassuseqarnerup aalajangiunneqarnerani peqataatinneqarnerunissaat pisariaqartipparput.

Sineriak tamarmi angalaffigineqanngilaq, taakkunanilu nakkutilliisinnaanngilagut, Vivian Motzfeldt isumaqarpoq.

Siriusimi suliniut pillugu paasisaqarnerorusuppoq, taamaattumillu Alfred Olsen, Siriusimi nakkutilliisuusimasoq, naapinniarpaa.

– Siriusip sulinera pillugu kalaallit sammiviannik paasisaqartissavaanga, ataqatigiinnerusumillu aaqqiissutissamik isumassarsisillunga. Siriusip periaasia sinerissami isorartuumi qanoq atorsinnaavarput. Maannakkut Siriusip alapernaarsuiartortartuinik suleqatiginnissinnaasunik Siriusip periaasiattut ittut qanoq pilersitsisinnaavugut, Sermitsiamut oqarpoq.