Vivian: Trumpip tigussaasumik siunnersuuteqarnissaa qilanaaralugu utaqqivarput

Maluginiagassaq: Naalagaaffinngornissamut Nunanullu allanut Naalakkersuisoq, Vivian Motzfeldt ippassaq Trumpip præsidentitut ivertinngitsiarnerani apersorneqarnera aallaavigalugu una allaaserisaavoq. Toqqarparput allaaserisaq ilusimisut isikkoqartoq saqqummiutissallutigu, Motzfeldtip apersorneqarnermini akissutai ullumikkut tusagassiortunik katersortitsinermi saqqummiunneqartunut sanilliullugu itisiliinertaqarmata.

Ullumikkumiit Trump sulinissaminut alloriarpoq nunarsuarmi nunat nukittunersaanni, USA-mi, præsidentitut ivertinneqartussanngorami.

Taamaattorli suli ivertinneqanngikkaluarluni, nunarsuarmi nutaarsiassaqartitsiviit saqqaanni saqquminerpaavoq, ernerminit, Donald Trump Jr.-imit aamma ikiorneqarluarluni, oqariartuuteqarami USA-p "Kalaallit Nunaannik piginnittuulernissaa aqutsilernissaalu" aqqutissiuukkusullugu, tamanna qanorluunniit iliorluni piviusunngortinneqassanersoq apeqqutaatinnagu.

Suleqatigiinneq pitsaasoq aqqutaani ikkarloqartaraluartoq

Taamaattorli taanna politikkikkut taamak ilimasaarigalaluartoq,  oqariartuutai eqqissisimasumik Kalaallit Nunaanni tiguneqarput, minnerunngitsumik Naalagaaffinngornissamut nunanullu allanut Naalakkersuisumit Vivian Motzfeldtimit:

- Kalaallit Nunaata USA-llu akornanni suleqatigiinneq ukiorpassuarni ingerlavoq. Taamaattorli aamma suleqatigiinneq piffissap ingerlanerani siunertat ajunngittaraluartut timitalersorniaruminaatsinneqartarpoq, pingaartumik amerikamiut Thule Air Baseannut, maanna Pituffik Space Basemik taaguutilimmut kiffartuussineq amerikamiunut isumagisassanngortinneqassasoq amerikamiunit toqqarneqarmat. Kisianni tamanna iluarsineqarpoq, amerikamiut paasimmassuk qanoq pingaaruteqartigisoq suliffeqarfinnit nunatsinneersunit suliassap isumagineqarnissaa.

- Amerikamiut nassueruteqarnerisa kingunerisaanik, pingaartumik piffissami nutaajunerusumi, maanna iluatsilluartumik suleqatigiinneq ineriartortinneqarpoq, minnerunngitsumik suliassat, Kalaallit Nunaata nammineq akisussaaffigisaat aallaavigalugit. Tassaasinnaapput ilinniartitaaneq, ilisimatusarneq, silap pissusaa, aatsitassarsiornermi pissutsit, peqqinnissaqarfimmi kiffartuussinerit allarpassuillu suliassat tigussaasut pillugit suleqatigiinnermik ineriartortitsisoqarluni.

- Nunanut allanut sillimaniarnermullu tunngasutigut suliassat eqqarsaatigalugit, Danmarkimik peqateqarnissatsinnik pisussaaffeqarpugut, tamannalu malittariaqarparput, nammineerluta namminersorneq pillugu inatsit akuerinikuugatsigu taannalu aallaavigalugu sulinissarput akuerinikuugatsigu, taamaammat nammineerluta inatsit akuerisimasarput naapertorlugu sulisariaqarpugut, Vivian Motzfeldt (S) naqissusiivoq.

Taamaattorli Vivian Motzfeldt tunuarsimaanngilaq nassuerutigissallugu pissutsit allanngorsimasut piffissap sivikitsuaqqap iluani, tassa Trumpip nalunaarutigisimasai pissutaallutik, aammalu ernumanermik pilersitsisimasoq nunat iligiit akornanni  allanngorsimanersut suli paasinarsinngimmat, siunertarisaq pillugu USA-mit suli tigussaasumik saqqummiunneqanngimmat.

Ajornerpaamik pisoqassappat suna aarlerinarpa?

- Erseqqissaatigiinnavinnikuuara pingaaruteqartoq ersarissumik tigussaasumillu siunnersuummik aallaavilimmik takusaqaqqaartariaqartugut, tamannalu aatsaat pisinnaavoq Trump USA-mi præsidentitut sulilerpat, tamannalu ullumikkut aallartippoq. Tassanngaaniit aallartissaagut, taamaattumik pissanganarpoq qanoq siunnersuuteqassanersoq suleqatigiinnerup nukittorsarnissaa eqqarsaatigalugu.

Pinngitsaaliinermik atuilluni ingerlatsisoqarsinnaaneranik aarlerinaateqarsinnaasut pillugit, Vivian annilaannganngilaq, aamma pisut ilungersunartutut isigigaluarlugit:

- Naleqartitat demokratiimik tunngaveqartut pillugitt ikinngutivut suleqatigullu  avitseqatigaagut, aamma nunat killiit suleqatigiiffianni ilaavugut. Imaappoq ippassaq suleqatigiippugut, ullumikkut suleqatigiippugut, siunissamilu aamma taamaassalluta. Tamanna isumaqarpoq NATO-mi nunat iligiit suleqatigiiffianni ilaasugut ilaajuarumaartugullu, aamma Kalaallit Nunaat naalagaaffinngoreerpat taamaassaaq, Vivian Motzfeldt naqissusiivoq.

Kisiannimi USA-p pissaaneq atorlugu Kalaallit Nunaat USA-mut ilanngutsinnialissagaluarpagu?

- Nunat tamalaat isumaqatigiissutaat inatsisaallu kiffaanngissuseqarnermik aallaaveqartut illersorneqartullu USA-p mangiarnialissagai annilaanngatiginagulu ersigissanngilarput, aamma ersigissanngilarput ilimagissanagulu naalagaaffik demokratimik ingerlatsisoq allamik nunamik tigusiniarluni pinngitsaaliinialissasoq.

- Taamaattumik USA-p tungaanit suleqatigiinnerup nukittorsarnissaanut siunnersuutinik tigussaasunik pisariaqartitsivugut. Naatsorsuutigaara USA-p maanna paasisimassagaa Kalaallit Nunaat aamma inui tassani nunaqartut tuniniarneqarsinnaanngitsut, aamma naatsorsuutigaara paasisimassagaat Kalaallit Nunaat namminersulernissamik anguniagaqarluni sulissutiginnittoq, aammalu minnerunngitsumik Kalaallit Nunaat nunat killiit suleqatigiinneranni nangittumik ilaajuassasoq.

Sunaassava pitsaanerpaamik pisoqarsinnaasoq?

Maannamut paasissutissat erseqqinnerusut, kalaallit politikerit innuttaasullu nutaamik pisoqarsinnaaneranik tigussaasumik aallaavissaqartoqanngikkallarpoq, suli saqqummiussisoqanngimmat, kisianni pitsaanerpaamik pisoqassappat qanoq pisoqarsinnaassava?

Vivian Motzfeldt akivoq nammineq tusaasani naapertorlugit Trumpip nalunaarutigisimasai maannamut ikittuinnaasut tunngavigalugit, soorlu suleqatigeeriaaseq free association imaluunniit allatut aaqqissuussamik suleqatigiinnissamik aaqqissuussisinnaaneq killiffigineqarsinnaasoq, nunatta USA-llu akornanni qanittumik suleqatigiittoqarsinnaasoq. Taassumali aamma  erseqqissaatigaa suli tigussaasumik siunnersuummik aallaavigineqarsinnaasumik saqqummiussisoqanngimmat Kalaallit Nunaata ullumikkut Kunngeqarfiup Danmarkip ataani inissisimanera tunngavigalugu tamanna qanoq sunniuteqassanersoq. Pitsaanerpaamik pisoqarsinnaaneranut tunngatillugu inuiaqatigiit kalaallit tusaaneqarnissaat ataqqineqarnissaallu pingaaruteqartoq, Vivian Motzfeldt erseqqissaavoq.

- USA-mik annertunerusumik toqqaannarnerusumillu suleqatigiinnissaq sivisuumik kissaatigisimavarput. Misigisimavunga kissaat tamanna qanillattorsimasoq. Tamanna oqaatigaara suli saqqummiussisoqanngikkaluartoq, kisianni pitsaanerpaamik pisoqassappat USAp iliuuseqarnermigut Kalaallit Nunaannut, nunatut namminersulerusuttumut innuttaanullu ilumoorussilluni ataqqinninnermik takutitsissaaq, taannalu aallaavigalugu siunissami iliuutsit qularnaatsumik suleqatigiinnerup nukittorsarnissaa aqqutissiuunneqarsinnaassaaq.