Watson eqqartuussivimmi: Qitornannit avissaaqqatinniarparsinga
Arfanniarnermut akerliusoq Paul Watson tigummigallarneqaannassaaq. Tunniussinissaq pillugu piaartumik aalajangiinissamik eqqartuussiviup Inatsisinik atortitsinermut ministereqarfik kajumissaarpaa.
Assiliisoq: Leiff Josefsen.
Nuummi sakkortuumik nittaallerneranit kinguaattoortoqarluni Nunatta Eqqartuussiveqarfiata pingasunngormat ullaakkut nalunaaqutaq 09.15 missaani arfanniarnermut akerliusup Paul Watsonip tigummigallarneqarnissaa suliarilerpaa.
Unnerluussisussaatitaasup Mary Khalilip eqqartuussineq aallartippaa Watsonip ulluni 21-ni, decembarip sisamaat tikillugu, tigummigallarneqarnissaa piumasaralugu.
Unnerluussisussaatitaasoq oqarpoq Japanip piumasaqaataatut Paul Watson Japanimut tunniunneqarnissaa pillugu suliami inatsisinik atortitsinermut ministereqarfiup aalajangernissaa suli utaqqineqartoq.
Iperagaanissaq naleqqutinngitsoq oqarpoq, aamma Watson iperagaassaguni qimaanissaanik isumaqarnissamut suli pissutissaqarnerarpaa.
Illersuisoq Finn Meinel Watsonip iperagaanissaanik piumasaqarpoq.
Iperagaanissaanik illersuisoq piumasaqartoq
Taakku marluk isummaminnik naatsumik oqaluttuareermata, naggataarutaasumik oqaaseqaatit tikinneqarput.
Unnerluussisussaatitaasup illersuisullu tunngavilersuutit ilisimaneqarluartut namminneq isiginnittaatsiminnit saqqummiuppaat.
Eqqartuussinerni siusinnerusuni illersuisup eqqartuussisoq iperagaasitsinissamik qularunnaarsissimanngilaa, Finn Meinelili oqariartuuteqaqqippoq Paul Watson iperagaasariaqartoq, illersuisup isumaa naapertorlugu pinerlunnermut pasillerneqarneranut tigummigallarneqarnera naleqquttuunngimmat.
- Pisimasoq qangali naammassineqareersimasussaagaluaq pissutigalugu Watsonip tigummigallarneqarnera naleqqutinngilaq, eqqartuussivimmi Finn Meinel oqarpoq.
Watson aalassaqqasoq
Watson naggataatigut nammineq ima oqaaseqarpoq:
- Japanimiut arfanniarnerat 2014-imi inerteqqutaalerpoq. Meeqqannik juullisioqateqartinnaveersaarparsinga. Taamani ajoqusertoqanngilaq. Tamanna quianaannarpoq, eqqartuussivimmi Paul Watson oqarpoq nangillunilu:
- Japanimiut unioqqutitsillutik piniaannarsinnaasut, uanga Kalaallit Nunaanni parnaarussaaqqavunga. Japaniuna pinerluttuliortoq, Danmarkillu tapersersorpaa. Uanga meeqqakkalu pillagaavugut.
Eqqartuussisoq aalajangiipallaqqusisoq
Suliami eqqartuussisoq Lars-Christian Sinkbæk oqarpoq tigummigallarneqarneranut tunngavissaqarluarneq naleqqulluartuusoq, tigummigallarneqarneralu decembarip aappaanut sivitsorneqartoq.
Aammali Inatsisinik atortitsinermut ministereqarfik kajumissaarpaa piaartumik aalajangeeqqullugu, suliammi suliarinissaanut sapaatip-akunneri pingasut missaat piffissaqarfigineqareermata.
Eqqartuussisup aalajangiinera illersuisup ingerlaannaq suliareqqitassanngortippaa.
