Watsonip illersuisua Finn Meinel: Suliaq ilungersunartoq

Avatangiisinik illersuiniaq Paul Watson Nuummi umiarsualivimmi juulip 21-ani tigusarineqarnermi kingorna qaammatini tallimangajanni tigummigallarneqareerluni maanna iperagaavoq.

Eqqartuussissuserisoq Finn Meinel Kalaallit Nunaanni Eqqartuussivimmi qaammatini kingullerni Watsonip tigummigallarneqarnera pillugu eqqartuussinerni arlalinni Paul Watsonimik illersuisunut ilaavoq.

Eqqartuussissuserisoq Finn Meinel tamatumunnga atatillugu Kalaallit Nunaanni Politiit suliamik suliarinninnerannik isornartorsiuivoq.

Inatsisinik atortitsinermut ministereqarfiup tunniussinissamut piumasaqaatit naammassineqanngitsut paasigaa Finn Meinelip Sermitsiamut uppernarsarpaa.

Finn Meinel nuannaanngilaq, ministereqarfiulli kiisami aalajangiinera oqiliallaatigaa:

- Aalajangiineq ajugaanertut isiginngilara, piffissarmi sivisuallaaq atorneqarpoq.

- Suliaq ilungersunarsimavoq, maannali iperagaanera oqiliallannaqaaq, Finn Meinel oqarpoq.

Sivisuumik suliarineqaraluartoq ministeriaqarfik nersualaaraa

Tunniussinissaq pillugu apeqqut tamakkiisumik inatsisinik atortitsinermut ministereqarfiup nalilersorsimagaa taassuma nassuiarpaa.

Suliap pisoqaassusia, suliap qanoq ittuunera aamma Watsonip Nuummi tigummigallarneqarnerata sivisussusaa aallaavigineqarlutik.

Paul Watsonip Kalaallit Nunaanni tigummigallarneqarnerata sivisussusaa Japanimi pillagaangaluarpat ilanngaatigineqarsinnaanersoq ministeriaqarfiup aamma misissorsimagaa Finn Meinel nangilluni nassuiaavoq.

- Ministeriaqarfiup tamanna qulakkeersimanngilaa, Finn Meinel oqarpoq.

Finn Meinelip suliap qaammatini tallimangajanni suliarineqarnerata sivisuallaarnera isornartorsiorpaa, ministerialli suliamik ingerlatsisimanera nersualaarlugu:

- Oqartoqarsinnaavoq Inatsisinik atortitsinermut ministereqarfik peqqissaartumik suliamik pimoorussilluni iliuuseqarsimasoq. Taamaattoqarneralu toqqissisimanarpoq, Finn Meinel oqarpoq.

Inatsit tunniussinissamut killissaliisoq

Suliap nunanit tamalaanit malinnaaffigineqartup naliliiffigineqarsimanera Naalakkersuisut aamma arajutsinngilaat. Inatsisit atuutsinneqarnerannut suliassaqarfik suli qallunaat akisussaaffigigaat aamma inatsit atuuttoq tunniussinissamut killissaliisoq 1967-iminngaanneersuunera Naalakkersuisut tikkuarpaat.

- Inatsisit nutarterneqarnissaat pillugu naalagaaffiup oqartussaasuinik ingerlaavartumik oqaloqatiginninnernut atatillugu malittarisassat ullutsinnut naleqquttunngortillugit nutarterneqarnissaat Naalakkersuisut Inatsiseqarnermut ministereqarfimmut noqqaassutigissavaat, Naalakkersuisut allapput.

Naalakkersuisup Naaja H. Nathanielsenip eqqartuussiveqarnermut tatiginninnini oqaatigaa:

- Suliaq Naalakkersuisut saneraanit malinnaaffigaat, kisianni suliap aalajangiiffigineqarnerani arlaannaatigulluunniit sunniuteqarsimanatillu suliap takussutissartaanik takunnissinnaasimanngillat.

- Kalaallit Nunaat nunaavoq inatsisitigut illersugaanermik pingaartitsisoq. Inatsiseqarnermut ministereqarfiup nunallu eqqartuussiviisa suliamik tunngavilersugaasumik suliarinnissimanerat aamma inatsisit atuuttut malillugit tunniussinissamut tunngaviusumik piumasaqaatit naammassineqarnerisa qulakkeerneqarsimanissaat Naalakkersuisut tatigaat. Tamanna tunngavigalugu aalajangiineq Naalakkersuisut tusaatissatut tiguaat.