Watsonip tigummigallarneqarnikuunera Eqqartuussiviit qullersaannit attatiinnarneqartoq
Avatangiisinik illersuiniap Paul Watsonip qaammatini tallimangajanni Nuummi pineqaatissinneqarsimasunut inissiisarfimmiitsinneqartumut suliaq Eqqartuussiviit qullersaanni suliarineqarpoq.
Paul Watson arlaleriarluni eqqartuussivimmi sassartinneqartarpoq, tigummigallarneqarneralu sivitsorneqartarluni.
Assi: Leiff Josefsen
Avatangiisinik illersuiniamut Paul Watsonimut suliaq pillugu Eqqartuussiviit qullersaannit maanna aalajangiisoqarpoq. Taanna siorna juulip 21-ani tigusarineqarpoq decembarillu 17-iata tungaanut Nuummi pineqaatissinneqarsimasunut inissiisarfimmi tigummigallarneqarluni. Inatsisinik atortitsinermut ministereqarfiup Japanimut tunniunneqassanngitsoq aalajangermagu iperagaavoq.
Avatangiisinik illersuiniap tigummigallarneqarnera pineqartup illersuisuisa eqqartuussiviit qullersaannut suliareqqitassanngortinneqarpoq.
Nunatta Eqqartuussisuuneqarfiani tigummigallarneqarnissaanik aalajangiineq Eqqartuussiviit qullersaannit attatiinnarneqarpoq, tassa avatangiisinik illersuiniap qaammatini tallimangajanni Nuummi pineqaatissinneqarsimasunut inissiisarfimmiinnera ajunngitsoq.
Eqqartuussiviit qullersaannit eqqartuussineq pillugu nittartakkami ima allassimasoqarpoq:
- Avatangiisinut illersuiniap tigummigallarneqarnissaanut Kalaallit Nunaanni eqqartuussiviup Kalaallit Nunaata Eqqartuussisuuneqarfianilu piumasaqaatit naammassineqarsimasut Eqqartuussiviit qullersaata aalajangiuppaa, tassalu Inuit Pisinnaatitaaffii pillugit Isumaqatigiissutip immikkoortuanut 5-imut naapertuuttumik suliarineqarsimasoq, eqqartuussivik nittartakkamini allappoq.
Naleqqunnersoq apeqquserneqartoq
Paul Watson Japanimi tigusarinninnissamik peqqussut tunngavigalugu Nuummi tigusarineqarpoq. Arfernillu illersuisoq Sikuiuitsumi kujallermi 2010-mi pisimasumut atatillugu tunniunneqassasoq piumasarineqarpoq.
Japanip Paul Watson arfannianik akornusersuisimasutut aamma umiarsuarmi arfanniummi inuttamut ajoqusiisimasutut unnerluutigaa.
Watsoni Japanimut tunniunneqarsinnaanersoq pillugu apeqqut oqartussaanit suliarineqarnerani tigummigallarneqarnera unnerluussummut naapertuunnersoq eqqartuussinermi Watsonip illersuisuisa apeqquserpaat.
Tamanna pillugu eqqartuussiviit qullersaat ima allappoq:
- Inatsisinik atortitsinermut ministereqarfiup tunniussinissamik suliamik suliarinninnera naleqquttuusoq Eqqartuussiviit qullersaannit aalajangerneqarpoq.
- Suliamut tunngatillugu tunniussinissaq qulakkeerniarlugu tigummigallarneqarnera naleqqutinngitsutut isigineqarsinnaanngilaq.
Aalajangiineq pillugu uani atuarsinnaavutit.
