Zelenskyj: Ruslandimut pillaatissat Trumpilu oqaluuseraagut
Zelenskyj-ip Trumpimik oqaloqatiginninnini iluaqutaasutut taavaa aammattaaq Danmarkip Ukrainamut amerikamiut sakkussaanik pisiniarnera eqqaavaa.
Ukrainemi præsidenti, Volodymyr Zelenskyj, marlunngornermi nalunaarpoq, USA-p præsidentia, Donald Trump, telefonikkut oqaloqatigisimallugu Ruslandimut pillaatissat pillugit.
Asseq (toqqorsivimmit): Handout/Ritzau Scanpix
USA-p præsidentia, Donald Trump, aamma Ukraine-p præsidentia, Volodymyr Zelenskyj, telefonikkut oqaloqatigiinnerminni russinut pillaatissat (sanktioner, aaqq.) aammalu illersornissamut suleqatigiinneq eqqartorpaat.
Ukraine-p præsidentia X-imi marlunngornermi allakkamini taamak nalunaarpoq
- Soorunami Ruslandimut pillaataasinnaasut eqqartorpavut. Aningaasaqarniarnerat suli ajornerulerpoq, tamannalu pissutigalugu Moskva eqqarsaatersuutinik taakkuninnga præsident Trumpip aalajangiussimaneranik misikkarissorujussuuvoq. Taamaattoqarneralu pissutsinik allanngortitsisinnaavoq, Zelenskyj allappoq.
Præsidentip aamma marluullutik oqaloqatigiinnertik pissarsiaqarnartutut oqaatigaa aammalu Danmarkip Ukraine-mut amerikamiut sakkussaanik pisinissaanik aalajangiussaq taavaa.
- Europami ataatsimoorussamik aalajangiussat eqqartorpavut, illersornissatsinnut nukittorsaasinnaasut. Hollandimiit, Sverigemiit, Norgemiit aamma Danmarkimiit - amerikamiut sakkussaanik, Ukrainemut tunniunneqartussanik, milliardit dollarit sinnerlugit nalilinnik ataatsimoorussamik neriorsorneqareerpugut. Qujanaq! Nato-mut ilaasortat suleqatigiissutigisartagaannik nanginneqassaaq, allappoq Zelenskyj.
Danmark, Sverige aamma Norge ataatsimoorlutik USA-miit sakkussanik Ukrainemut nassiussassanik pisiniaqatigiipput, Nato-p suliniutaa nutaajusoq tunngavigalugu.
Marlunngornermi Danmarkimit nalunaarutigineqarpoq, 580 millioner koruunit nalinganut tapersersorlugu aallartissallugu. Illersornissamut ministeriaqarfik nittartakkamini taamak allappoq.
Aningaasat ilaatigut atorneqassapput aalajangiisuusunut sakkussianut Patriotitut taasanut, tassa Amerikamiut qaartartuinut pitsaanerpaanut.
- Ukraini sakkortuumik saassunneqartuarpoq pingaartumik russit timmisartorsuarnik saassussinerisigut, aammalu maanna sakkussanik tapersersorneqarnissamik pisariaqartitsivoq. Taamaattumik pitsaasuuvoq, Amerikamiit sakkunik nassiussinissamut ammaqqittoqarmat, illersornissamut ministeri Troels Lund Poulsen (V) nalunaarummi oqarpoq.
Naatsorsuutigineqarpoq Danmarkip tapiissutaa Amerikamiit silaannakkut illersornissamut aammalu nunami sakkutuut sakkussaannut atorneqassasut, aningaasallu Ukraine-p aningaasaateqarfianit matussuserneqassapput.
Holland, tassa nunat Nato-mi ilaasortaasa siullersaattut, ataasinngornermi 3,7 milliardit koruuninik tunissuteqarpoq, aammalu Nato-miit uppernarsarneqarpoq, nunat amerlanerit suliniummut peqataajumaartut.
Skandinaviamit katillugit 3,2 milliardit koruuninik nalilimmik ataatsimut tunissuteqartoqassaaq.
