Zelenskyjip tikeraarnera: Reykjavikimi isumannaallisaanerit annertuut
Ukrainep præsidentia Volodymyr Zelenskyj aqagu Nunat Avannarliit Siunnersuisoqatigiivisa Reykjavikimi ataatsimiinneranni peqataajartussaaq, tassani Issittumi eqqissineq isumannaassuserlu sammineqassallutik.
Ukrainep præsidentia Volodymyr Zelenskyj aqagu Reykjavikimut tikeraassaaq Nunallu Avannarliit Siunnersuisoqatigiivisa ataatsimiinneranni oqalugiartooqataassalluni.
Assiliisoq: Ida Marie Odgaard/Ritzau Scanpix
Ukrainep præsidentia aqagu Islandimut mippat isumannaallisaaneq annertussaaq, tassanimi oqalugiartooqataassamaarpoq. Nunat avannarliit ministeriunerinik aamma ataatsimeeqateqassaaq.
Islandimi oqartussaasut qaammatini kingullerni Nunat Avannarliit Siunnersuisoqatigiivisa ataatsimeersuarnissaannut isumannaallisaanermik isumaginninnermik ulapputeqarput. Volodymyr Zelenskyjillu peqataanissaa nalunaarutigineqarmat isumannaallisaanerit sukaterneqarnerupput, tamannalu Islandimi oqartussaasunik ulapinnerulersitsipput.
Politiit sakkulisartut
Ullumimiit Islandip illoqarfiisa pingaarnersaanni aqquserngit matuneqarumaartut sumiiffinnilu aalajangersimasuni dronenik timmisartuussineq inerteqqutaassasoq, Islandimi tusagassiorfik visir.is allappoq.
Politiit 300-t missaat isumannaallisaasussaapput.
Innuttaasut politiinik sakkisartunik takusassaqarumaartut, politiit pisortaat Karl Steinar Valsson tusagassiuutinut nalunaaruteqarpoq. Oqarpoq Islandimi aaqqissuussinermut atatillugu navianartorsiortitsisut annersaat tassaasoq internetikkut isumannaallisaanermut ulorianartorsiortitsisut, tamatumunngalu atatillugu innuttaasut suliffeqarfiillu immikkut mianersornissaannik kajumissaarneqarput.
