๐๐๐๐ญ๐ญ๐ฎ๐๐ง๐ข๐ค ๐ฎ๐ฎ๐ฆ๐๐ฌ๐ฎ๐ง๐ข๐ค ๐ง๐๐ฌ๐ฌ๐ข๐ฎ๐ฌ๐ฌ๐ข๐ง๐๐ช ๐ข๐ฅ๐ฎ๐๐ญ๐ฌ๐ข๐ฉ๐ฉ๐จ๐ช
Saattuat pisarineqaqqammersut sulilu uumasut Danmarkimi Hanstholmimi aalisakkanik akitsorterussisarfimmut iluatsittumik Air Greenlandimit nassiunneqarput.
Nuummi aalisartut peqatigalugit saattuat pisarineqaqqammersut sulilu uumasut 500 kiilut Danmarkimi Hanstholmimi aalisakkanik akitsorterussisarfimmut sisamanngormat iluatsittumik nassiunneqarput.
Air Greenlandip oqaluttuarisaanerani saattuanik suli uumasunik taama annertutigisunik Atlantikoq qulaallugu nassiussineq siullermeerutaasoq, Air Greenland Facebookimini allappoq.
- Saattuat innarlernatik apuunneqassanersut pissangagisimavarput. Saattuat Hanstholmimi aalisakkanik akitsorterussisarfimmut apuunnerini 500 kiiluniittunit 13-niinnaat toqusimapput, tamannalu ilimagisatsinniit pitsaaneroqaaq, Cargo Sales Manager Sรธren Stรธvhase Nรธrsรธ tulluussimaarluni oqaluttuarpoq.
Ajornaatsumik assartorneqartut
Nuummi Kangerlussuarmilu isumagineqarnerat ingerlalluarpoq, pilersaarutillu malillugit sisamanngormat marsip 14-ianni saattuat Nuummiit Kรธbenhavnimut nassiunneqarput.
Saattuat Kรธbenhavnimut tikiunneqarnerini nillataartumiitinneqarsimasut, nalunaaquttallu akunneri marluk qaangiunnerini tigusisussanut tunniunneqarsimasut, timmisartortitseqatigiiffiit ilisimatitsipput.
- Oqaluttuarisaanermi, aalisarnermi alloriarneq annertooq iluatsippoq. Ullut kingulliit nal. 06:00 makikkaangama unnuakkut 03:00 aatsaat innartarpunga oqaluttuarisaanermi aqqutissiueqataanera 100%-mik malinnaaviginiarlugu.
- Ullumi kaattaassivimmi saattuat uumasut tuniniarneqarmata minutsit tallimat ingerlanerini tamarmik tunipput. Tuniniaanermi kg-mut 100-150 koruunilerlugit tunineqarput. Misiliineq siulleq ingerlalluarpoq, naatsorsuutigaarpulli periutsit atorneqartut ilikkarluarneqarpata kg-mut akia suli qaffasinnerungaatsialissasoq, aalisartut aalajangersimasut avammut tuniniaanissaannut siunnersorti Mads Petersen, oqarpoq.
Tuniniaasartut arlaqartut suleqatigalugit, aalisakkanik qalerualinnillu pisarineriniit suli uumasunik, aalisakkanik akitsorterussisarfinnut aammalu sutorniartarfinnut, siunissami nunatsinniit toqqaannaq nassiussisalernissaq Air Greenlandip sulissutiginiarpaa.