Aalborgip umiarsualiviata kommunillu takornarialerinermik ingerlatsiviata Visit Aalborgip/Destination Nordip umiarsuarnik takornariartaatinik Aalborg takornariarfissatut ussassaarutigiunnaarsimavaat. Umiarsuit takornariartaatit mingutsitsivallaarput – ilaasullu aningaasanik atuinngippallaarput, taakku isumaqarput.
Aalborg ukiorpassuarni umiarsuarnik takornariartaatinik takornariarneqarluarsimagaluarpoq. Amerlanerpaammata ukiualuit matuma siorna Limfjordsby ukiumut 40-nit tikinneqarsimavoq.
Aalborgip umiarsualiviata kommunillu takornarialerinermik ingerlatsiviata Visit Aalborgip/Destination Nordip umiarsuarnik takornariartaatinik Aalborg takornariarfissatut ussassaarutigiunnaarsimavaat. Umiarsuit takornariartaatit mingutsitsivallaarput – ilaasullu aningaasanik atuinngippallaarput, taakku isumaqarput.
Aalborg ukiorpassuarni umiarsuarnik takornariartaatinik takornariarneqarluarsimagaluarpoq. Amerlanerpaammata ukiualuit matuma siorna Limfjordsby ukiumut 40-nit tikinneqarsimavoq.
- Umiarsuit takornariartaatit Aalborgimut tikinnissaat sulissutigiunnaarsimavarput. Aalborg umiarsualivittut takornariartaatinut tulluarsarniarlugu ukiuni 15-ini Port of Aalborg aamma Visit Aalborg/Destination Nord suleqatigiipput, Destination Nordimi pisortaq Tonny Thorup Sermitsiamut oqarpoq.
Atuinngippallaarput
- Inuussutissarsiornikkut takornariartitsinermik salliutitsinitsigut nittarsaassinermut aningaasartuutit pissarsiffiginerusinnaavavut, Visit Aalborgimi/Destination Nordimi pisortaq Tonny Thorup oqarpoq.
Assiliisoq: Jesper Hansen
- Suliniut ajunngivissimavoq, maannali pissutsit allanngorput, uagutsinnilu inuussutissarsiornikkut takornariartitsineq aningaasaliiffigerusunneruarput. Aalborgimi umiarsuit takornariartaatit aningaasanik pissarsiffiuallaarneq ajorput. Kangerlukkut ingerlaartarneq pissutigalugu Aalborgimiinnerat sivikitsuinnaasarpoq, nalinginnaasumik nalunaaquttap-akunnerini tallimani arfinilinniluunniit.
- Taarsiullugu inuussutissarsiornikkut takornariartitsisarnerput, tassa ataatsimeersuariartortartut ataatsimiigiartartullu, nukitsinnik atuiffigineruavut. Taakku illoqarfik pitsaanerusumik atortarpaat, tamannalu nunani avannarlerni Parisitut tusaamaneqarnitsinnut naapertuunneruvoq. Inuussutissarsiornikkut takornariaq ullormut 3.000 koruuningajannik atuisarpoq, Tonny Thorup oqarpoq, taannalu taamatut aalajangernini pillugu isornartorsiorneqanngilaq.
- Siorna suliniummik unitsitsereernerup kingorna takornariartitsisartup naammagittaalliortup ataatsilluunniit oqarasuaatikkut sianerfigisimanngisaannarpaanga, taamaattumik Aalborgimi taamatut takornariartitsisarnerup piffissaajaataaneranut tamanna takussutissaavoq.
Umiarsuarnut umiarsualivinniittunut nunami innaallagissiorfimmit innaallagialersuiffimmik pilersitsinissaq taamaatinneqartoq
Umiarsuit takornariartaatit mingutsitsinerat aamma Visit Aalborgip/Destination Nordip Aalborg Havnillu aalajangiinerannut peqqutaaqataavoq.
Umiarsuarnut umiarsualivinniittunut nunami innaallagissiorfimmit innaallagialersuiffimmik pilersitsinissaq 42 millionit koruuninik akeqassasoq 2022-mi nalilerneqarpoq, 2018-imilu umiarsuarnik takornariartaatinik 40-nik tikittoqarmat umiarsualiviup sinneqartoorutai katillugit 500.000 koruunit missaanniipput. Tamanna Aalborg Havnip mingutsitsinnginnerunissamik anguniagaanut naapertuutinngilaq:
- Ikummatissanik qanoq ittunik umiarsuit atuisarnersut uagut sunniuteqarfigiuminaatsipparput. Allannguissinnaaffivut ukkataraavut, Aalborg Havnimi tuniniaanermut pisortaq Michael Lind qanittukkut Nordjyske.dk-mut oqarpoq.
- Sumi ineriartorsinnaanerluta, sumi suliffissanik nutaanik pilersitsisinnaanerluta sumilu suliffeqarfinnik nutaanik pilersitsisinnaanerluta ukkatariartuinnarparput. Østhavnimi (siornatigut Grønlandshavnimi, aaqq.) mingutsitsinngitsumik suliffissuaqarneq eqqarsaatigalugu periarfissaqarnerungaarpugut.
