Aalborgimit timmisartukkut aqqut nutaaq

Air Greenlandip Aalborgimit Kangerlussuarmut timmisartuussineq nutaaq marlunngorpat atoqqaarfissiussavaa. Toqqaannanngitsumik, Københavnili aqqusaarlugu aqqutaa tamaat timmisartoq ataaseq atorlugu timmisartuussisoqartassaaq.

Taamaalilluni ilaasut Kastrupimi sivisuumik pisuttariaqassanngillat – aamma SAS-imut Norwegianimulluunniit ilaallutik Kastrupimut timmisartornissaminnut pisarnertut ullaaralaakkut makiaartariaqassanatik. Timmisartoq Aalborgimit nalunaaqutaq 10.30 qangattassaaq Kastrupimukaqqaassallunilu, tassanilu teknikikkut isumannaallisaanermik taaneqartumik nalunaaquttap akunnerani ataatsimi uninngassalluni Københavnimiillu ilaasussat ikineqassallutik – kingornalu Kangerlussuarmut ingerlaqqissaaq, nalunaaqutaq 14.05 missalluni.

Utimut timmisartuussinermi Kangerlussuarmit nalunaaqutaq 16.05 qangattassaaq, timmisartorlu nalunaaquttap akunneri arfinillit qaangiunneranni nalunaaqutaq 01.15 Aalborgimut missalluni. Tamanna kingusikkaluartoq angalaneq ilorrisimaarnartuussaaq, tassami ilaasut Kastrupimi timmisartumut allamut ikinissaraluartik piffissamik sipaarfigissammassuk. Kastrupimi timmisartumut allamut ikinissamut piffissaq sivikitsuinnaasarmat tamanna uippakajaarnartaqaaq. Timmisartuussinermi nutaami ilaasut minnerunngitsumillu nassataasa Aalborgimut apuussinnaanerat qulakkeerneqassaaq.

Aasaanerani marlunngornerit tamaasa aggustip 20-ata tungaanut timmisartuussineq nutaaq atuutissaaq.

Qanoq soqutigineqartiginersoq takoqqaarniaraat

- Aalborgimit timmisartuussisoqartalernissaanik soqutiginninneq paasiniarlugu timmisartuussineq nutaaq aallartipparput. Suliffeqarfiit inuillu ataasiakkaat oqaloqatigigaangatsigik Aalborg eqqaaneqartuartarpoq. Taamaattumik maannakkut marlunngornerni tulleriinni qulingiluani timmisartuussisarluta misilinniarparput, qanoq soqutigineqartiginersoq takuniarlugu – taava timmisartuussisarnissaq kingusinnerusukkut aallarteqqinneqarsinnaanersoq eqqarsaatigissavarput, Air Greenlandimi ussassaarinermi pisortaq Katja Vahl oqarpoq.

- Jyllandimit ilaarusuttut amerlanissaat qularnanngilaq. Tamanna siorna Billundimut timmisartuussisarnitta aallartinneratigut takuarput, ukioq mannalu ingerlatiinnassavarput. Tamanna ingammik ilaqutariinnit iluarineqarpoq – tamatuma Aalborgimut aamma atuunnissaa ilimagaarput.

Boeing 737

Aalborgimut timmisartuussineq Air Greenlandip qanimut suleqatigisaata Jettimep, Billund-Kangerlussuaq-Københavnimullu timmisartuussisareersup isumagissavaa. Jettimep timmisartuussisarneri allat assigalugit timmisartoq Boeing 737-800, 189-inik ilaasoqarsinnaasoq atorneqassaaq.

Tamanna aamma pissutigalugu timmisartuussineq nutaaq Aalborgimit Københavnimut ingerlatinneqaqqaartassaaq kingornalu Kangerlussuarmut, Aalborg qulaatiinnarlugu ingerlaartinneqassalluni. Jettimep timmisartuutai sulisuilu arlallit Aalborgimiipput – timmisartuussinerlu Kastrupimukartinneqaqqaartassagaluarpat, timmisartoq ilaasoqanngitsoq illoqarfiit pingaarnersaannut ingerlaartariaqartassagaluarpoq. Aalborg-Kastrup-Kangerlussuakkoorluni taakkulu aqqusaarlugit utimullu ingerlaarnermini siumut utimullu aqqummini ilaasoqarani ingerlaartarnissaa sipaarneqassaaq.

Allannguutaalaartutut aamma taaneqarsinnaavoq, Air Greenlandimut billetinik inniminniinermi, taamaallaat Aalborgip Københavnillu akornanni utimullu aamma inniminniisoqarsinnaammat. Air Greenland aamma taamaalilluni Danmarkimi namminermi timmisartuussisassaaq. Maannamut Danmarkimi illoqarfiit pingaarnersaannit Jyllandimi illoqarfiit pingaarnersaannut timmisartuussisarneq SAS-imit aamma Norwegianimit isumagineqartarpoq.