Aalisarnermi atortunik annaaneqarsimasunik ujaasineq avannaani annertusineqarpoq
KNAPK-p Upernavimmi Uummannamilu immikkoortortaqarfiinut Qalut Vóninip aningaasaleeqataaneratigut aalisartut immap naqqani aalisarnermi atortut annaaneqarsimasut piiarnissaannut piareersimapput.
Aalisarnermi atortunik annaaneqarsimasunik imaani aalisartut saliinissaannut Qalut Vólinip aningaasaliinera KNAPK-p siulittaasuata Nikkulaat Jeremiassenip nuannaarutigaa.
Leiff Josefsen
Nunatta imartaata naqqani aalisarnermi atortut annaaneqarsimasut amerlaqaat, aamma ajornartorsiut aalisakkanut, imaani avatangiisinut minnerunngitsumillu imaani uumassusilinnut annertuumik ajornartorsiortitsisinnaavoq.
Ajornartorsiut qaangerniarlugu suliniut maanna annertusineqarpoq, tassami Upernavimmi Uummannamilu aalisartut aamma suliniummut maannamut Ilulissat Nuullu eqqaani ingerlanneqarsimasumut peqataaleramik.
Atortunik nissiiniutinik, allunaasanik, savinnik aammalu atortunik allanik atortussanik aningaasaliisoqartoq, aalisartut piniartullu kattuffiat KNAPK tusagassiutinut nalunaarummi ilisimatitsivoq.
- Upernavimmi Uummannamilu aalisartunut piniartunullu iluaqutaasumik Qalut Vónin suliniummut aningaasalersueqataalluni akisussaaffimmik tiguseqataammat nuannerpoq, tassami KNAPK-p immikkoortortaqarfii oktobarimi 2024-mi immap naqqani saliinissamik pilersaaruteqarput. Sapinngisamik amerlasuut akisussaaffimmik tiguseqataanissaat pingaaruteqarpoq, taamaattumik kattuffiup imaani avatangiisinik saligaatsuutitsinissamik suliniuteqarneranut Qalut Vónin aningaasatigut tapiissuteqarmat KNAPK-mit nuannaarutigivarput, taakkumi aalisagaqassutsimut uumasoqassusianullu illersuinermik annertusaaqataassammata, KNAPK-p siulittaasua Nikkulaat Jeremiassen oqarpoq.
Inuussutissarsiutit siunissaat
Aningaasat tapiissutit 100.000 koruunit sinnerlugit naleqartut ilisimatitsissutaavoq.
Hans Pavia Brandt Ilulissani Qalut Vónin-imeersoq sooq saliinermut peqataaniarlutik aalajangersimanerlutik nassuiaavoq:
- Immap naqqanik saligaatsuutitsinissamik suliniummut Qalut Vónin tapersersuivoq, imatta minguitsuunissaanut aalisagaqassutsimullu qulakkeerinninniarnermi aalisarnermik suliaqartut suliffeqarfiit tamarmik attuumassuteqartut akisussaaffimmik tiguseqataasariaqartut isumaqaratta. Najukkani nunallu immikkoortuini suliniutit suulluunniit iluaqutaapput.
