Aalisarnermut
inatsisip nutaap atuutilerneranut atatillugu aqutsiveqarfik 47-mi Qeqertarsuup
Tunuani, Uummannami Upernavimmilu qaleralinniarluni aalisarnermi
umiatsiaararsiorlutik aalisartut 450-it paggatassiissutiniit Pisassiissutinut
Niuerutigineqarsinnaasunut Nammineq Pigisanut, PNNP-mut, nuupput, tamannalu
taamanikkut Aalisarnermut Piniarnermullu Naalakkersuisup Kim Kielsenip, Siumut,
pitsaasutut nalilerpaa.
Taamaakkaluartoq piffissap ingerlanerani
umiatsiaarartut amerliartuinnartut PNNP-mut nuussimanerminnik apeqqusiisut
Inatsisartunut ilaasartoq aamma Avannaata Kommuniani 1. viceborgmesteri Jens
Napãtôᴋ', Naleraq, oqarpoq. Taamatullu oqariartuuteqarnera Uummannami
aalisartut piniartullu peqatigiiffiannit ilalerneqarpoq. PNNP-mut nuussimasut
paggatassiilluni aalisarnermut utersinnaanngillat, tamannali inatsisitigut
qanoq periarfissarsiuunneqarsinnaanersoq pillugu paragraf 37 naapertorlugu Jens
Napãtôᴋ' Naalakkersuisunut apeqquteqarpoq.
Aalisarnermut
inatsisip nutaap atuutilerneranut atatillugu aqutsiveqarfik 47-mi Qeqertarsuup
Tunuani, Uummannami Upernavimmilu qaleralinniarluni aalisarnermi
umiatsiaararsiorlutik aalisartut 450-it paggatassiissutiniit Pisassiissutinut
Niuerutigineqarsinnaasunut Nammineq Pigisanut, PNNP-mut, nuupput, tamannalu
taamanikkut Aalisarnermut Piniarnermullu Naalakkersuisup Kim Kielsenip, Siumut,
pitsaasutut nalilerpaa.
Taamaakkaluartoq piffissap ingerlanerani
umiatsiaarartut amerliartuinnartut PNNP-mut nuussimanerminnik apeqqusiisut
Inatsisartunut ilaasartoq aamma Avannaata Kommuniani 1. viceborgmesteri Jens
Napãtôᴋ', Naleraq, oqarpoq. Taamatullu oqariartuuteqarnera Uummannami
aalisartut piniartullu peqatigiiffiannit ilalerneqarpoq. PNNP-mut nuussimasut
paggatassiilluni aalisarnermut utersinnaanngillat, tamannali inatsisitigut
qanoq periarfissarsiuunneqarsinnaanersoq pillugu paragraf 37 naapertorlugu Jens
Napãtôᴋ' Naalakkersuisunut apeqquteqarpoq.
PNNP-miit
paggatassiissutinut uterneq aalisartut atugaannik ajornerulersitsissasoq,
taamaattumillu nuunnissaq inatsisitigut periarfissarsiuunneqassanngitsoq
Aalisarnermut, Piniarnermut, Nunalerinermut Imminullu Pilersornermut
Naalakkersuisoq Peter Borg, Demokraatit, akissuteqarluni allappoq.
Kingunerlutsitsissasoq
PNNP-mik
aaqqissuussinermiit paggatassiilluni aalisartitsinermut aaqqissuussinermut
ikaarsaartitsinissamik periafissiineq aalisartunut arlalitsigut annertuumik
kingunerlutsitsissasoq Peter Borg akissuteqarluni ilaatigut allappoq.
- PNNP-mik
aaqqissuussinermik atuutilersitsinerup siunertarivaa aalisartunut
nammineersinnaassusermik, isumannaassusermik, sivisussusermik aamma
pisassiissutiniit pigisanit atatillugu nuussuisinnaassutsimik, aalisartunut
periarfissiissutit iluini qulakkeerinninneq.
- Aalisartunut pisinnaatitaaffiit taakku aalisarnerup
pilersaarusiukkamik aqqissuunneqarsinaannissaanut periarfissiipput,
taamaasilluni aalisarnerup ingerlanera naleqquttumik ingerlasinnaaqqullugu. Tamannalu
aamma minnerunngitsumik aalisartup annertunerpaamik pissarsinissaa
qulakkeerniarlugu piffissami sivisuumi aalisarsinnaanerminik
pilersaarusiorsinnaaneranik periarfissaqalersitsissaaq.
- Aaqqissuussinerup
matuma aamma kingunerivaa, inuiaqatigiinnut piffissamut ungasissumut,
atuiffigineqarsinnaanerisa anguneqarsinnaanerat, tassa imaappoq suliaqartunut
ataatsimut isumalluutit nalingi qaffappata, inuiaqatigiinnut tamanut
qaffariartitsinerussaaq, Aalisarnermut Naalakkersuisoq oqarpoq.
Pitsaaqutit
annaaneqassasut
Aalisartut
paggatassiilluni aalisarnermik aaqqissuussinermut uterartinneqassappata
pitsaaqutit amerlasuut annaaneqassasut Peter Borg erseqqissaavoq,
tamatumunngalu aalisartut akunnerminni annertuumik unammilleqatigiinnerat
aalisarnermillu pilersaarusiorsinnaanerup annikinnerulernissaa ilaatigut
peqqutaasoq taassuma oqaatigaa.
- Aalisartut
kikkulluunniit paggatassiilluni aalisarnermut aaqqissuussamut ikaarsaarniartut,
naatsorsuuteqarsinnaajunnaassapput amerlassutsit qulakkeeriikkatik
aalisarsinnaanissaannik periarfissaarutissallutik, siusinnerusukkut
periarfissaqarfigeriikkamisut aamma PNNP-mik aaqqissuussinerup iluani
qulakkeerneqarsimasutut. Tamatuma kinguneriinnassavaa inuup namminerisamik
aningaasaqarneranut inuiaqatigiillu aningaasaqarnerinut annaasaqaateqarneq.
- Pisassiissutinit
pisassatut pigisaq aalisartup PNNP naapertorlugu aalisarnermini pigisaa,
aningaasatigut naleqarpoq, taannalu aalisartumit annaaneqassaaq
paggatassiilluni aalisarnermut aaqqissuussinermut ikaarsaariarluni
ilanngutissaguni.
- Nalitussuseq
taanna arlalitsigut sunniuteqarpoq, tassungalu atatillugu pingaarneruvoq,
aningaasanik attartorsinnaanermut qulakkeeruteqarnissamut
tunngavissiisinnaammat, aalisartup aalisarnini naammassiuminarsarniarlugu
siunertaqarluni aningaasanik attartornissaminut atorsinnaasaa, Peter Borg
oqarpoq.
PNNP
pillugu nalunaarut ukioq februarimi atuutilersinneqarpoq.
Amerlasuut
eqqarsarnartoqartikkaat
Uummannami
aalisartut piniartullu peqatigiiffianni siulersuisuni ilaasortap aamma
Avannaata Kommuniani kommunalbestyrelsimi ilaasortap Ole Møllerip, Naleraq,
oqarnera naapertorlugu aqutsiveqarfik 47-mi umiatsiaarartut PNNP-mut
nuussimasut amerliartortut aaqqissuussamut tassunga nuussimanerminnik
eqqarsarnartoqartippaat.
- Aalisarnermut
inatsit tamakkiisumik naammassineqanngitsoq PNNP-mut nuunneq pitsaanngitsumik
kinguneqarsinnaasoq takusinnaalereerparput. Taamatullu pisoqaqqunagu
aalisarnermut inatsisissap atuutilersinneqarnissaata kinguartinneqarallarnissaa
peqatigiiffitsinniit kissaatigisimagaluarparput.
- PNNP-mut
nuunneq aalisartut ilaannut aalisarnermi toqqissisimanartumik pilersitsivoq,
kisianni aamma ilaannut pitsaanngitsumik kinguneqarpoq, taanna oqarpoq.
Umiatsiaararsortut
PNNP-mut nuussimasut pisassaatiminnik tamakkiisunik tuniniaasut qaammatini
kingullerni amerliartorput, tamannalu PNNP-mut nuunnerup tamakkiisumik
iluatsissimannginneranut takussutissaasoq, Ole Møller isumaqarpoq.
