Naatsorsueqqissaartarfiup
kisitsisaatai naapertorlugit 2023-mi Avannaata Kommuniani
inuussutissarsiutigalugu piniartutut allagartallit 1.012-iupput, taakkunanngalu
amerlasoorpassuit aqutsiveqarfik 47-mi qaleralinnik saarullinnillu aalisartuupput.
Taamaakkaluartoq
Avannaata Kommuniani umiatsiaaraarsortunut atugassarititaasut pitsaasuunngitsut,
tamannalu iliuuseqarfiginiarlugu suliniutit assigiinngitsut
aallartinneqassasut, Avannaata Kommuniani kommunalbestyrelsimi Siumup
Naleqqallu ukiuni tulliuttuni sisamani suleqatigiinnissamut isumaqatigiissutaanni
allaqqavoq.
Naatsorsueqqissaartarfiup
kisitsisaatai naapertorlugit 2023-mi Avannaata Kommuniani
inuussutissarsiutigalugu piniartutut allagartallit 1.012-iupput, taakkunanngalu
amerlasoorpassuit aqutsiveqarfik 47-mi qaleralinnik saarullinnillu aalisartuupput.
Taamaakkaluartoq
Avannaata Kommuniani umiatsiaaraarsortunut atugassarititaasut pitsaasuunngitsut,
tamannalu iliuuseqarfiginiarlugu suliniutit assigiinngitsut
aallartinneqassasut, Avannaata Kommuniani kommunalbestyrelsimi Siumup
Naleqqallu ukiuni tulliuttuni sisamani suleqatigiinnissamut isumaqatigiissutaanni
allaqqavoq.
Umiatsialeriviit
puttasullu pilersinneqassasut
Avannaata
Kommuniani kommunalbestyrelsimi Siumup Naleqqallu suleqatigiinnissamut
isumaqatigiissutaanni, aalisartut atugaasa sumiiffinni tamani
pitsanngorsarneqarnissaat pingaartinneqartoq, 1. viceborgmester Jens Napãtôᴋ',
Naleraq, aamma Inatsisartunut ilaasortaasoq oqarpoq.
- Umiatsiaararsortut
Avannaata Kommunianut taamaallaat iluaqutaanatik aammali nunatta
aningaasarneranut annertuumik iluaqutaapput, taamaattumik taakkununnga
atugassarititaasut maannakkorniit pitsaanerusariarput.
- Avannaani
illut umiatsianut motorinullu eqqussiffiusinnaasut iluarsaaffiusinnaasullu,
kiisalu neqitsersuiviit amigaataapput, taakkulu sumiiffinni assigiinngitsuni
sanaartorneqassapput, taanna oqarpoq.
Illoqarfinni
nunaqarfinnilu puttasut kommunit akisussaaffigivaat, taakkulu
inerisaaffigineqaqqissasut, Jens Napãtôᴋ' erseqqissaavoq.
- Illoqarfiit
nunaqarfiillu ilaanni puttasulersuereernikuuvugut, kisiannili
pisariaqartitsineq suli annertummat sumiiffiit ilaanni puttasulersueqqissaagut,
taanna oqarpoq.
Aalisartut
piniartullu asimi unnuiffigisinnaasaannik illuaqqanik sanaartornissaq aamma pilersaarutaavoq.
Nunagissaaneq
talittarfiillu pitsaanerusut
Angallatit
piniutillu illoqarfinni nunaqarfinnilu nunap qaani
inissaqartinneqartannginnerat aamma iliuuseqarfigineqassaaq.
- Nunaminertat
umiatsianut piniutinullu ilitsiviusinnaasut amigaataapput, taamaattumik
sumiiffiit ilaanni nunagissaanissaq pisariaqarpoq.
- Talittarfeqarnikkut
aamma inerisaasoqassaaq, tamannalu Namminersorlutik Oqartussat suleqatigalugit pilersaarusiorneqassaaq,
1. viceborgmesteri oqarpoq.
Upernavimmi
talittarfik annertuumik tattorliuuffiuvoq, illoqarfiullu eqqaani
umiatsialivissamik aamma illuliorfigineqarsinnaasumik pilersitsinissaq
siunertaralugu nunagissaanissaq aqquserniornissarlu aamma pilersaarutigineqarpoq.
Piniutaarsiutinik
saliinissaq pisariaqartoq
Aqutsiveqarfik
47-mi aalisarfiit ilaanni qassutaarsiutit ningittagaarsiutillu
ajornartorsiutaanerat annertusiartortoq, tamannalu
iliuuseqarfigineqartariaqartoq, aalisartut piniartullu peqatigiiffiissa
oqaatigisarpaat. Ajornartorsiullu Avannaata Kommunianit
arajutsisimaneqanngitsoq, Jens Napãtôᴋ' erseqqissaavoq.
- Susassaqartut
suleqatigalugit qassutaarsiutit pillugit ajornartorsiut piaarnerpaamik
iliuuseqarfigineqassaaq, tassungalu atatillugu inuussutissarsiutigalugu
qassusersorluni ileqqoreqqusaq aamma nalilersorneqassaaq.
- Qassutaarsiutinik
saliinissaq kommunip akisussaaffiginngikkaluaraa, taamaattoq Qaanaaq
ilanngullugu saliinissamut 850.000 koruunit missaannik aningaasaliinikuuvugut,
taanna oqarpoq.
Qassutaarsiutit
ningittagaarsiutillu qimaannarneqartarnerat akuersaarneqarsinnaanngitsoq,
tassungalu tunngatillugu sakkortunerusumik Avannaata Kommunia piumasaaqateqartalissasoq,
Jens Napãtôᴋ' erseqqissaavoq.
Aalisakkerinermik
ilinniarfik pilersinneqassasoq
Qalerallit
ilivitsuutillugit qerititsikkat maannakkut annerusumik tunisassiarineqartarput,
tamannali allanngortinneqartariaqartoq Avannaata Kommuniani
kommunalbestyrelsiani suleqatigiilersut isumaqarput.
- Aalisarneq
avannaani inuussutissarsiutit pingaarnersaraat, taamaattumik pitsaasunik
nioqqutissiornissaq aamma aalisakkat tamakkiisumik atorluarneqarnissaat
aqqutissiuukkumallugu, aalisakkerinermik ilinniarfimmik pilersitsisoqarnissaa
sulissutigineqassaaq, Jens Napãtôᴋ' oqarpoq.
Taassuma
saniatigut Avannaata Kommuniani aalisarnermut siunnersortimik atorfinitsitsisoqassaaq.
