Aallarnisaasut Palli Fleischer aamma Aqqa Lange Sisimiuneersut Youtubemi videot atorlugit illup iluani naatitsivinni qullernit qinngornerit atorlugit naatitaaqqanik, tuluttut micro-greensinik taaneqartartunik, qanoq naatitsisoqartarnersoq ilinniarpaat. Ilikkakkatik suliffeqarfimminni Sisimiut Fresh Farmimi, siorna aallartitaminni, atorpaat.
Tunisassiornerli akikitsuinnaanngilaq, tassami inimik attartornermut innaallagissamullu akiliutit qaffasipput. Aningaasartuutit qaffasissut atortunut elektroniskiusuneersut naatitaaqqanik naatitsinermi pingaaruteqarluinnartut annertuumik unammillernarput.
PISARTAGAQARTUNUT
Allaaserisaq una Nutaarsiassaqartitsivimmi aviisit naqitat
ilaanni allaaserisaavoq.
Allaaserisat pisartagaqartunit taamaallaat atuarneqarsinnaapput.
Atuarluarna.
Aallarnisaasut Palli Fleischer aamma Aqqa Lange Sisimiuneersut Youtubemi videot atorlugit illup iluani naatitsivinni qullernit qinngornerit atorlugit naatitaaqqanik, tuluttut micro-greensinik taaneqartartunik, qanoq naatitsisoqartarnersoq ilinniarpaat. Ilikkakkatik suliffeqarfimminni Sisimiut Fresh Farmimi, siorna aallartitaminni, atorpaat.
Tunisassiornerli akikitsuinnaanngilaq, tassami inimik attartornermut innaallagissamullu akiliutit qaffasipput. Aningaasartuutit qaffasissut atortunut elektroniskiusuneersut naatitaaqqanik naatitsinermi pingaaruteqarluinnartut annertuumik unammillernarput.
Aningaasartuutit Palli Fleischer Lyberth naapertorlugu aalisakkanik tunisassiorfinnut tapiissuteqarluni akigitinneqartussatut neqeroorutaasut illuatungeraat. Taamaammat aallarnisaasut apeqquteqarput: Sooruna aalisakkanik tunisassiorneq innaallagissamut akinut akikilliliiffigineqartartoq?
– Uagut tunisassiortullu allat innaallagissamik atuisuusut eqqarsaatigineqarpiarneq ajorpugut. Suliffeqarfitta allilernissaa ilaatigullu agurkinik tomatinillu, salatiniit sivisunerusumik naatinneqartartunik innaallagissamullu aningaasartuutinik qaffatsitsisussanik, naatitsisalerusuppugut. Kalaallit Nunaannippugut, ukiumilu issittarmat pissaatit annertunerusut pisariaqartippagut, Palli Fleischer Lyberth oqarpoq.
Tapersersorneqarnissaq pingaaruteqarpoq
- Aalisakkerinerli maani inuussutissarsiutit pingaarnersaraat. Sooq assinganik atugassarititaqassavisi?
– Nalunngilarput aalisakkanik tunisassiorneq nunatsinni inuussutissarsiutit pingaarnersarigaat, naatitagulli atorlugit imminut pilersorsinnaaneq kissaatigalugulu tapersersorneqarsinnaalluta isumaqarpugut. Illoqarfiit amerlanerit erngup nukinganik mingutsitsinngitsumik pilersorneqarput, taamaammat aaqqissuteqarnissamut periarfissaqarsimassaaq, Palli Fleischer Lyberth oqaluttuarpoq.
Sisimiut Fresh Farmip Naminersorlutik Oqartussat tapiissuteqarnikkut akigititat annertusinissaat ullumikkullu aalisakkerinermik tapersersuinermisut nunalerinermi suliffeqarfiit tapersersornissaat siornatigut noqqaassutiginikuuaa, Palli Fleischer Lyberth oqaluttuarpoq.
– Qinnuteqaatinik nassiussinikuugatta akissutissat utaqqiinnarpagut. Tunisassiornermi innaallagissamut akinut tapertinnissaq siunissami aallussinissatsinnut pingaaruteqarluinnarpoq, oqarpoq.
Naatitaaqqat naatsumik oqaatigalugu naalerlaajupput, naasunit naaqqaartuusut, tunisassiornerlu tamarmi ilup iluani ingerlanneqartarpoq. Suliffeqarfik siorna Sisimiuni naluttarfikumut nuuppoq, tassani Palli Fleischer Lyberth Aqqa Langelu naatitaaqqat atorlugit eertanik, broccolinik, solsikkenik radiserinillu tunisassiorlutik aallartipput.
Kingorna nutaamik naatitsivittaarput, maannalu aallarnisaasut tunisassiornertik annertusillugu salatinik pupinnillu, ilaatigut Pisiffimmut Brugsenimullu tunineqartartunik, naatitsisalerput. Sisimiut Fresh Farmilli pisisartuisa annersaat tassaavoq Sisimiut Hotel.
Kikkut tamarmik akissaqarfigissavaat
Naalakkersuisut Kalaallit Nunaanni imminut pilersorsinnaanermut periusissiamik siullermik maanna suliaqarput, taannalu 2024-p naannginnerani naammassineqarumaartoq naatsorsuutigineqarpoq. »Innuttaasut tamarmik pitsaasunik peqqinnartunillu nunatsinni nerisassaqarnissamut periarfissaqassapput nerisassanillu pilersuinermik pitsanngorsaataasumik misigisaqassallutik kalaallit tunisassiaatigut“ periusissiami pingaarnertut anguniarneqarpoq.
– Kalaallit Nunaanni tunisassiat akikitsuunissaat takorluugaraarput, taamaalillutik kikkut tamarmik salatinik pisinissamut akissaqarsinnaaniassammata.
– Salatinik avataaneersunik pisinermut aningaasarpassuit atortarpavut, aningaasallu nunamiiginnarnissaat pingaartipparput, Palli Fleischer Lyberth oqarpoq.
- Aningaasartuutit annikillisinniarlugit qanoq iliorsimavisi?
– Siorna salatinik naatitsivik pisiaraarput, taannalu inissaqartinniarlugu ujaasisimalluta. Salatinik naatitsivik inimut kommunimit pigineqartumut inissinniarlugu aalajangerpugut, nutaamilli sanaartornialermata inimik allamik 5000 koruuninik akisunerusumik nassaarpugut. Init akikitsut nassaariniarnerat ajornakusoorpoq, Palli Fleischer Lyberth nassuiaavoq.
Piffissaq tamakkerlugu sulisartoq
Naatitaaqqanik soqutiginnittunik siunissami ilinniartitsisinnaalissallutik Aqqa Lange Palli Fleischer Lyberthilu neriuutigaat.
– Tamanna nutaajuvoq peqqinnartorujussuullunilu. Ineriartortitsilluta imminullu pilersornerulernerput innuttaasunut ilisimatikkusukkatsigit aamma aallartippugut, aallarnisaasut oqarput.
Suliffimmi saniatigut SIsimiut Fresh Farms maanna aallutaraat. Palli Fleischer Lyberth ulloq naallugu sulisussaagaluarpoq, aningaasarsiorfigisinnaanaguli.
– Imeq ilajartorlugu, naasut nutserniarlugit paarilluarniarlugillu ullut unnuillu tamaasa maannartarpugut. Akissarsineq ajorama unammillernarpoq, kisianni aamma ilikkagarpassuaqarpunga, neriuppunga siunissami oqinnerulissasoq.
Tunisassiortunut tapiissutit annertusarneqassasut Naalakkersuisut ilisimatitsipput.
Imminut pilersornermik suliaqartut tamarmik tapiissutinut qinnuteqarsinnaanissaat qulakkeerniarneqarpoq. Ingerlatsinermut aningaasartuutit matussuserneqassanngillat. Kinaluunniit nunap imminut pilersorsinnaaneranik annertusaanissamik suliniuteqartoq tapiissutinut 2024-mi aggustip aallaqqaataata tungaanut qinnuteqarsinnaassaaq.
