- Niuernerup tungaatigut immikkut ittumik
neqerooruteqalerpugut, siullermeerlutalu sullissigatta
ingerlalluarsimaqaaq. Qularinngilluinnarparalu aappaagu
ulapaarnerussalluta.
Aallarnisaasoq
Casper Frank Møller Nuummeersoq oqarpoq. Ikinngutigiilluakkani
pingasut peqatigalugit aasap aallartilaarnerani
takornariartitsisarnermik ingerlatsivik Raw Arctic pilersippaa. Ukiup
affaa siulleq ingerlalluarujussuarput.
- Niuernerup tungaatigut immikkut ittumik
neqerooruteqalerpugut, siullermeerlutalu sullissigatta
ingerlalluarsimaqaaq. Qularinngilluinnarparalu aappaagu
ulapaarnerussalluta.
Aallarnisaasoq
Casper Frank Møller Nuummeersoq oqarpoq. Ikinngutigiilluakkani
pingasut peqatigalugit aasap aallartilaarnerani
takornariartitsisarnermik ingerlatsivik Raw Arctic pilersippaa. Ukiup
affaa siulleq ingerlalluarujussuarput.
-
Niviugaasalerluni qissattarnermi immikkut ilinniarnikuuvugut. Nuup
eqqaani ulluinnarlugu angalaartitsisarpugut – aamma
Kangerluarsussuarmi sapaatip-akunnerani ataatsimi
tammaarsimaartitsisarluta. Illoqarfiit pingaarnersaanni
kisiartaalluta niviugaasalerluni qissattartitsinermik
neqerooruteqartarpugut, tamannalu nunarsuarmi tamarmi aliikkutaralugu
aalisartartunit timersuutitut pitsaasutut isigineqarpoq.
Akikinngitsumillu akilerumaneqartarluni.
Niviugaasalerluni qissattarneq
Niviugaasalerluni qissattarneq
aliikkutaralugu aalisariutaavoq. Aalisarneq qissatuuserluni,
amuaaserluni, allunaasamik qissattaaneruvoq tassani niviugaasaq
imaanut igeriunneqartarluni.
Aalisariuseq
piuleqqaarmat sullinerit ilaarlugit ingerlatitsisoqarniartarpoq,
maannali niviukkat aalisagaaqqallu tamarmik ilaarneqartarlutik –
aalisakkap pisariniarneqartup suut nerisarnerai
apeqqutaatinneqartarlutik.
Niviugaasamik
erngup qaavaniittussiamik aalisarnermi sullinerit immap
qaavaniittussiat ilaarlugit aalisartoqartarpoq, tassani eqaluit
kapisiliillu ilaat aalisarneqartarlutik. Aalisarneq kuummi
ingerlanneqakkajunnerusarpoq, niviugaasarlu aalisakkap
sumiiffigigunagaani nikisinneqarani uninngatinneqartarluni.
Aalisartup aalisaat nakkutigerusaarlugu allunaasaq assaminik
tallisinngikkuniuk naalisittarpaa.
Niviugaasamik
kuummi sarfaq malillugu aalisarnermi aalisartup niviugaasaq
nakkutigiinnartussaavaa. Periuseq niviugaasamik aalisarnertulli
pisoqaatigaaq aalisartalerlaanullu naleqqulluni.
Niviugaasalerlutik
qissallattaartartut aalisanngiffiup nalaani meqqut qiviullu ilaatigut
atorlugit sapinngisamik ilumoorpalaartitsiumallutik namminneq
niviugaasaliortarput. Nammineq eqqumiitsuliaakkajuttarpoq.
Paasisat:
Wikipedia
Nioqqutissaq
immikkut ittoq
-
Iluatsilluassagaanni allatulli iliornani niuernermi immikkut ittumik
neqerooruteqarsinnaasariaqarpoq. Tamannali pissutaaqataaginnarpoq,
tassami allanik suleqateqarnissamut piareersimanissaq aamma
pisariaqarmat, Casper Frank Møller oqarpoq.
-
Takornarialerisutut mikisutut immikkuullarissumik nioqquteqarnermi
allanik suleqateqarsinnaanissarput aamma pingaaruteqarpoq. Nammineq
Targa 25-mik angallateqarpugut, tamannali naammanngilluinnarpoq.
Taamaattumik inuppassuarnik angallassissatilluta Nuummi umiatsianik
attartortitsisartut allat suleqatigisarpavut.
-
Suliffeqarfiit suleqatigiissinnaanerat Kalaallit Nunaanni
takornariaqarnerup siunissami iluatsilluarnissaanut
apeqqutaasorujuuvoq, Casper Frank Møller oqarpoq.
Raw
Arctic pilersitsisuni sisamaniit pigineqarpoq. Casper Frank Møller
pisortaanertut, Isak Brandt Hansen ingerlatsinermut pisortatut,
Rasmus Brandt aningaasaqarnermut pisortatut kiisalu Lars Nikolajsen
piginneqataallunilu aningaasaliisutut.
Niviugaasalerluni qissattarneq timersuutigalugu aalisartartumut pinngortitamut qanimut attaveqartitsilersarpoq.
Assi: Nammineq pigisaq
Angallassisartut
Piginneqatigiit
sisamat saniatigut Raw Arctic aalajangersimasumik atorfeqanngitsunik
angallassisartoqarput. Casper Frank Møller
takornariaqarfiunerpaanerata nalaani angallammik angallassisartut
inuttallu amerleriarujussuassasut naatsorsuutigaa.
-
Pilersaarusiorlutalu tuniniaalluta aallartereerpugut.
Oqaatigereersinnaavaralu piffissami takornariarfiusumi tullermi
kalaallinik igasunik marlunnik maannangaaq atorfissaqartitsissalluta
takusinnaareeratsigu. Kangerluarsussuarmi tammaarsimaartarfimmi
paarlakaajaallutik sulisassapput – tikeraallu
nerisassaqartinnissaat isumagissallugu. Aammali unnuiartortut
aalisakkanik nammineq pisaannik nerisassiornissaannik
ikiuuttassallutik. Taamaattumik igasunik kalaallinik piumaneruvugut,
taakkumi kalaallit kulturiannik aamma paasititsiisinnaammata.
- Qaqortumi Campus Kujallermi issittumi
misigisassarsiortitsilluni takornariartitsisartunngorniartut
angallassisartuusinnaasarnerat iluareqaarput. Pisariaqartitavut
tunniuttarpaat.
-
Naak niviugaasalerluni qissattarneq kalaallinit
aalisariutaanngikkaluartoq, nunami illoqarfinnit ungasissumi
ingerlanneqartarpoq. Taamaattumik takornarianut
toqqissisimalersitsisunik angallassisartunik – aamma nunatta
pinngortitaa kulturialu pillugit oqaluttuassanik nuannersunik
oqaluttuarsinnaasunik – peqarnissaq pineqarpoq.
Naak
ukioq manna niviugaasalerluni qissallattarneq qaangiutereeraluartoq
Raw Arctic takornariartitsisarnini ukiukkut unitsinneq ajorpaa.
-
Pinngortitaq pinngortitamillu atuineq. Taamaattumik ukiuunerani aamma
sammisassarpassuaqarpoq. Arsarnernik takuniaalluni angalaneq,
miterniarnerit aqisserniarnerillu. Sullitattali piumasaat
tusarnaarniarlugit piareersimajuaannarpugut. Pinngortitami arlaannik
misigisassanik kissaateqaraanni oqartoqaannassaaq. Amerlanersaat
piviusunngortissinnaasarpagut, Casper Frank Møller oqarpoq.
Pinngortitamik
paasinninneq
Raw
Arcticip niviugaasaqarluni qissattartitsisarnerata immikkut ittumik
neqeroorutaanera piaarinaatsoornerinnaanngilaq.
Casper
Frank Møller Nuummi inunngorpoq, ukiunili arlalinni Danmarkimi
najugaqarsimavoq, tassanilu niviugaasaqarluni qissattarnermik
aalisarneq ilinniarnikuullugu.
-
Aalisariaaseq alutornartuuvoq, tassani sullernit immap qaavani
ingerlaartarnerat ilaarlugu eqalunnik kiititsiniaaneq ilumut
aalisariaasiuvoq itsarnisaq, pinngortitamik paasinninnermut
tamatumunngalu naleqqussarnermut tunngasoq.
-
Nunarsuaq tamakkerlugu kuunni tatsinilu niviugaasaqarluni
qissattarneq ingerlanneqartarpoq, aalisariuserlu taanna atorlugu
annertuvoq unammisitsisoqartarluni. Niviugaasalerluni qissattarneq
nunatsinni aalisarnermit nalinginnaasumit allaanerulluinnarpoq,
tassami aalisarneruvoq nerisassanik pissarsinissamik
siunertaqartariaqanngitsoq. Niviugaasalerlutik qissattartut
amerlasuut pisatik assiliseqatigeriarlugit aalisagaq imaanut
avalatseqqittarpaat. Taamaattumik qissattarneq aamma pinngortitamut
mianerinnittuuvoq, taamaammallu Kalaallit Nunaanni
takornariartitsinermik pinngortitamik ajoqusiinngitsumik
takorluukkamut naapertuulluinnarluni, Casper Frank Møller
nassuiaavoq.
