Aappariit inuusuttut savaatillit Kujataani ineriartortitserusuttut: – Akisussaaffimmik tigusissaagut

Naasu Lundip nerisassat sinnikut aneerasaartarfimmiit igippai, kukkukuullu ingerlaannaq nerriserput, kinguninngualu savaateqarfiup qimmii pingasut aamma neriartorput. Nukarlequtini Malik qaammatit marluk sinnerlugit utoqqaassusilik kissumiarpaa.

Ukiut aqqaneq-marluk matuma siorna Naasu uinilu Piitaq Lund nunaatiminnut Inneruulalimmut nuupput, taanna Qassiarsummiit nalunaaquttap akunnerata affaa UTV-mik ingerlaaarluni orninneqarsinnaavoq. Tassani nunaateqarneq savaatinillu 600-t missaanniittunik akisussaaffeqarneq tiguaat. Kingorna aappariit hestinik 17-inik, kukkukuunik 18-inik, qimminik pipput pingasunillu meerartaarlutik.

Taamani marluullutik 22-nnarnik ukioqarput, nunaateqarfimmut qorsooqqissunik qaqqalimmut nuukkamik. Innerulalimmit ungasissumi ilinniagaqarnissartik pilersaarutigigaluarpaat, kisianni nunaateqarfimmut akisussaaffiup tigunissaa aporfiuvoq. Taamanikkut allanngorneq annertusimaqisoq Naasu Lund oqaluttuarpoq.

- Ajornartoornikkut ilikkakkanik ulikkaarpunga, taamani nerisassiorsinnaanngingajappungaluunniit, Naasu Lund, maanna 34-nik ukiulik, oqarpoq.

Piitaq Lund Innerualalimmi savaateqartut kinguaariit pingajoraat. Aappariit savaateqarnerup saniatigut Qassiarsummi unnuisarfimmik aamma ingerlatsipput, suliffeqarfimmilu Riding Greenlandimi nuannarineqarluartumik hiistertitsinermik aaqqissuisarlutik.

- Akisussaaffimmik tigusineq qanoq nassataqarnersoq nalunngilarput. Immaqa aamma taamaammat suliffeqarfiuterput iluatsilluarpoq, tassa akisussaaffimmik tigusilluta, nutaaliorluta ineriartoratta, Naasu Lund oqarpoq.

Siunissamut pilersaarutit annertuut

Aappariit savaatillit Qassiarsummi aasat pingajussaannik unnuisarfimmik ingerlatsippoq, ukiullu arfineq-pingasut matuma siornatigut siullerpaamik hestinik takornarianillu angalatitsisalersimapput.

- Aasat tamaasa angallassisarnerput annertusisarparput. Angallassinerit assigiinngitsut marluk neqeroorutigaavut: iluliarsuarnut angalaneq aamma ’farm to farm’ (nunaatilinniit nunaatilinnut aaqq.) angallassineq, tassani nunaatillit angerlarsimaffii pulaarneqartarput, taamaalilluni misigisaq piviusorpalaarnerusarluni. Soqutiginnittorpassuaqarpoq amerlasuunillu utaqqisut allattorsimaffianniittuuteqarpugut, tassa neqeroorutigut tamakkerlugit inniminninneqarnikuupput sulilu amerlanerusut utaqqillutik. Soqutiginninneq annertuvoq, Naasu Lund oqarpoq.

Naasu Lundip Kujataa pillugu oqallinnermi peqataasarnini pingaartippaa, takornariartitsinermik suliaqarnini pissutigiinnarnagu aammali nammineq inuttut pingaartikkamiuk. Narsarsuarmi peroriartorpoq, siunissarlu nalorninartoqarmat inuit tassanngaanniit nussortut isigalugit artornarpoq.

- Nuunnissamik pilersaaruteqanngilagut, siunissamullu annertuunik pilersaaruteqarpugut. Immitsinnuinnaq eqqarsaatiginata Kujataali tamaat ineriartortikkusukkatsigu.

- Utoqqaat amerlasuut sumiiffitsinni ineriartortitseqataasimasut ilisarisimavakka, maannalu pisoqqat attatiinnarsinnaavavut ingerlateqqillugillu. Isumaqarpunga utoqqaat uagutsinnik isumassuisimasut isumassornissaannut peqataasinnaasugut, Naasu Lund oqarpoq.

 Ineriartorneq siuarsarneqartoq

Qassiarsummi hiistinik angalaarnermik feeriartitsineq nunarsuarmit tamarmeersunit soqutigineqarluarpoq. Naasup Piita Lundillu ukiut tamaasa hiistinut atortussanik aamma unnuisarfinnik aningaasaliisarput. Savaateqarnerli aappariit ulluinnaanni initunerupput.

- Ulloq unnuarlu suliffiuvoq. Suliffittut isiginagu, inuunerulli ilaatut misinnarpoq. Tassa inuunerput tamarmi.

Illoqarfissuarni biilit, illut atortussanillu aaqqissuunneranni ikiorneqarsinnaanerup illuatungaani savaatilittut suut tamaasa nammineq isumagisariaqartut Naasu Lund oqaluttuarpoq.

- Illu, traktorit sanaartornerillu tamaasa nammineerluta suliarisarpavut.

- Siunissami aaqqiissutissat eqqarsaatigeqqissaarsinnaasariaqarpatit siumullu piareersimasariaqarlutik. Kingoraartissamik amigaateqaruit inniminnerneraniit qaammat ataaseq utaqqisoqarsinnaasarpoq. Atortorissaarutit aserorpat qaammallu utaqqeqqaartariaqaruit kingusinaarsinnaavutit, Naasu Lund oqarpoq.

Kujataata pingaaruteqassusia inuit amerlanerusut takusinnaassagaat tassanilu aningaasaleerusussuseqassasut neriuutigaa.

- Naliga nalunngilara, periarfissai takusinnaavakka naak piffissaq innuttaasunut artornaraluartoq maani aallartitsinissamut periarfissaqarpoq. Misigiartorpunga uagut inuusuttut aallartitsisinnaasugut.

 Allannguutinut naleqqussarneq

Silap kissatsikkiartuinnarnera silarlunnerusalerneralu nunarsuarmi tamarmi inuit pinngortitami inuussutissarsiuteqartut amerlasuut eqqorpaat. Aamma maani aalisartut, piniartut savaatillillu kinguneri misigaat, ukiunilu kingullerni aningaasatigut taperneqarnissamik ujartuillutik. Tassa silap pissusiata allanngoriartornera ajunaarnersuartut sunniuteqassappat aningaasarsiorsinnaajunnaarunik ikiorserneqarsinnaarusupput.

Naalakkersuisut silap pissusiata allanngoriartorneranit eqqugaasut ajunaarnersuaqartillugu ikiorsiissutinik ukiup nikinnerani qinnuteqarsinnaanngortippaat.

Naasu Lundip aamma eqqarsaatigaa allannguutinut qanoq naleqqussartoqartariaqarnersoq.

- Inuit kulturiat allanngortunut pissutsinullu nutaanut naleqqussarneq ilaavoq. Siunissamut siooranani.

- Taamaakkaluartoq ima eqqarsalerpugut: Aasaq panerpa? Siallerpallaarpa? Savat qanoq ippat? Tamanna oqaloqatigiissutigisinnaavarput kingunerilu eqqarsaatigisinnaallugit, pinngortitami savaateqarnerlu inuunitsinnut tunngaviupput, tamannalu ingerlatiinnarusupparput, Naasu Lund oqarpoq.