Aappaagu aasakkut Aalborgip Nuullu akornanni timmisartuussisoqartalerpat billetsi siumuinnaq angalanermut 1.998 koruuninit aallartissaaq.
Angalatitsivik Ruby Rejser Aarhusimeersoq timmisartuussinermut nutaamut akisussaasuuvoq, timmisartuutileqatigiiffillu Airseven timmisartumik Boeing 737-800-mik 189-inik ilaasoqarsinnaasumik timmisartuussissaaq.
Aappaagu aasakkut Aalborgip Nuullu akornanni timmisartuussisoqartalerpat billetsi siumuinnaq angalanermut 1.998 koruuninit aallartissaaq.
Angalatitsivik Ruby Rejser Aarhusimeersoq timmisartuussinermut nutaamut akisussaasuuvoq, timmisartuutileqatigiiffillu Airseven timmisartumik Boeing 737-800-mik 189-inik ilaasoqarsinnaasumik timmisartuussissaaq.
Angalatitsivimmi ingerlatsisup Morten Meyerip, Ruby Rejserineersup, Aalborgimiit Nuummut
toqqaannartumik timmisartuussiffissaq nutaaq pingasunngornermi saqqummiuppaa.
Assi: Jesper Hansen
Nuummi mittarfissuaq nutaaq ammarpat Ruby Rejser Nuummut angalanernik pilersaarusiorniarpoq – aasaaneranilu angalasoqarnissaanut ima neriuuteqartigaaq, allaat juunip aqqaneq-aappaaniit septembarip aallaqqaataanut sapaatip akunneranut marloriarluni Kalaallit Nunaanni illoqarfiit pingaarnersaata Jyllandillu avannaani illoqarfiit pingaarnersaata akornanni timmisartuussisalerniarpoq.
Timmisartut takornariartaatit ulikkaartinniarlugit angalatitsiviit inissat inuttaqarfigineqanngitsut akikitsumik tunisarpaat.
- Angalanerit ataatsimoortillugit neqeroorutigisarpavut, taamaammat timmisartuussisarnitsinni tamanna pingaarnertut anguniagaraarput, kisianni aamma angalasinnaasunik amigaateqarpugut, taakkulu akikitsuararsuarmik tuniniartarpavut, Morten Meyer, Ruby Rejser-imi ingerlatsisoq oqarpoq..
Akigitinneqartartut allanngorartut
Billetsit Ruby Rejsersip nittartagaani tuniniarneqalereerput. Morten Meyerip erseqqissarpaa bilitsi siumuinnaq aallarniutitut 1.998 koruuninik akeqartoq – timmisartortullu timmisartumi nerisassat namminneq akilertassagaat..
- Akit allanngorartuutittarpagut, taamaalillutillu billetsit akii piumaneqartunut naapertuuttuaannarput. Tassa piffissani angalaffiusunilu piumaneqarluartuni billetsit akii qaffasinnerusinnaapput, Morten Meyer nassuiaavoq
Timmisartuussinerit ataasinngornerit sisamanngornerillu Aalborgimiit nalunaaqutaq 06.00 aallartittassapput, Nuummut nalunaaqutaq 07.50 tikissattapput, Nuummullu uteqqittassallutik nalunaaqutaq 08.50, Aalborgimut nalunaaqutaq 16.20 tikittassapput. Timmisartuussineq nalunaaquttap akunnerinik sisamanik sivisussuseqassaaq, ullumikkullu pissutsinit allaanerulluinnarluni, tassami Aalborgimiit Nuummut Kastrup Kangerlussuarlu aqqusaarlugit ulloq naallugu timmisartuussisoqarsinnaasarpoq.
Aalborgip mittarfianit Jyllandillu avannaani inuussutissarsiortunit anguniagaqartoqarneratigut timmisartukkut aqqut pilersinneqarpoq. Arctic Importimi, Aalborgimi qullersaqarfeqartumi Nuummilu allaffeqarfeqartumi, pisortaaneq Thomas Hjort aamma isumalluaqaaq.
Allannguilluinnartoq
- Suliffeqarfitsinnut allannguissaaq – akia pissutiginagu piffissarli pissutigalugu. Nuummi sulisut Aalborgimi ulluni marlunni sulinissaat ajornannginnerulissaaq, Aalborgimi sulisut Nuummut ingerlaannaq suliartorsinnaalissapput, taamaalillutik allaffiit taakku marluk qaninnerusumik suleqatigiilersinnaapput, Thomas Hjort oqarpoq, taannalu aqqummut nutaamut arlaleriarluni angalanissaminik pilersaaruteqareerpoq..
Pisortaanerup Thomas Hjortip Aalborgip Nuullu akornanni timmisartuussivissaq nutaaq
nuannaarutigeqaa.
Assi: Jesper Hansen
- Maanna aasaanerani taamaallaat angalasarnissaa pilersaarutaavoq, neriuppugulli Ruby Rejser 2026-mi ingerlaannarnissaminut sapiissuseqalerumaartoq, immaqalu aasaanerani qaammatit pingasuniit sivisunerusumik.
Timmisartortitseqatigiiffimmut nutaamut aningaasatigut tunngavissaq pingaarneq tassaavoq timmisartukkut assartuineq. Timmisartornerni tamani minnerpaamik 3 tonsinik assartuisoqarsinnaavoq. Matumanittaaq Arctic Import atorluaassaaq
- Aalborgimiit Nuummut assartugassarpassuaqarluarpugut, taamaammat assartuinissap ilaa inniminnereerparput, Thomas Hjort oqarpoq.
Timmisartuussinermi pineqartumi Ruby Rejser-ip assartuinissamut Blue Water Shipping suleqatigissavaa.
Nalorninartoqarnera ilisimagaa
Kalaallit Nunaannut Kalaallit Nunaanniillu timmisartuussinerit sila pissutigalugu nalorninartorsiortinneqartartut ilisimaneqarpoq, Morten Meyerili Ruby Rejser-imeersoq isumalluartuuvoq.
- Hurtigrutenimut Danmarkimi sullissisuuvugut, taamaammat ukiut ingerlaneranni takornariarpassuarnik Kalaallit Nunaannut angalatitsisarpugut. Aamma Skandinaviap avannaani Svalbardimut timmisartuussisaratta nalorninartoqarsinnaanera ilisimareerparput. Tamanna aamma aasaanerani taamaallaat timmisartuussisarnitsinnut pissutaaqataavoq.
- Nuummi mittarfissuartaamut timmisartuussinerit maannamut naleqqiullugu amerlanerujussuunissaat naatsorsuutigaarput. Ajortumilli pisoqassagaluarpat aamma tamanna eqqarsaatigereerparput. Missinnaanngikkutta soorunami mittarfiit allat, soorlu Keflavik, atorsinnaavagut – ilaasugut Nuummiit aallarneq ajulissagaluarpata suliffeqarfissuaq HHE, akunnittarfiutimini marlunni inissaqarluartoq, qanimut suleqatigissavarput. Tamatuma saniatigut Hotel Nordbo aamma Hotel Aurora isumaqatigiissuteqarfiginikuuagut, Morten Meyer oqarpoq.
Ruby Rejsersip aasaanerani Nuummut timmisartuussisalerneratigut Air Greenland kisimiilluni Danmarkip Kalaallit Nunaatalu akornanni atlantikoq qulaallugu timmisartuussisarunnaassaaq. SAS-ip 2002-mi taamaatilluni aqqut nunami timmisartuutileqatigiiffimmut tunniummaguli kisimiissimagaluarpoq.
Aallarnisaasup Gert Braskip Greenland Express aqqutigalugu Air Greenland 2014-imi unammillerniaraluarpaa – aamma Aalborgimit aallartartumik – ingerlatseqatigiiffilli taanna aallartilluanngitsoormat aningaasat nungullutillu ilaasussaagaluit pakatsisut aningaasat annaavaat.
Air Greenland aasap siuliani Aalborgip Kalaallit Nunaatalu akornanni timmisartuussisarnermik misiliisimavoq, marlunngornerit tamaasa København aqqusaarlugu timmisartuutileqatigiiffik Jettime atorlugu aallartarluni.
