Nunani allani niuerfinni qalerallit piumaneqarnerulernerat pissutigalugu, Aasianni Polar Raajat A/S-ip aalisakkanut suliffissuaataani, qaleralinnik tunisinermit kilomut akigitinneqartoq 3 koruunimik qaffanneqarmat, tunisinermi aki maannakkut 30 koruuninngortoq, suliffeqarfiup pisortaa Jan Weinreich oqarpoq. Tamannalu Aasianni eqqaanilu aalisartunit iluarisimaarneqarpoq.
Qalerallit piumaneqarnerulertut
Nunani allani niuerfinni qalerallit piumaneqarnerulernerat pissutigalugu, Aasianni Polar Raajat A/S-ip aalisakkanut suliffissuaataani, qaleralinnik tunisinermit kilomut akigitinneqartoq 3 koruunimik qaffanneqarmat, tunisinermi aki maannakkut 30 koruuninngortoq, suliffeqarfiup pisortaa Jan Weinreich oqarpoq. Tamannalu Aasianni eqqaanilu aalisartunit iluarisimaarneqarpoq.
Qalerallit piumaneqarnerulertut
Polar Raajani qalerallit kilomut akii siorna 24 koruunit missaanniipput, kisiannili Polar Raajat niuerfigisartagaani Asiami qalerallit piumaneqarnerulernerisa kingunerisaanik akit qaffassimagitik Jan Weinreich oqarpoq.
- Coronap ajornartorsiutaanerata nalaani qalerallit kilomut akii 20 koruunit missaannaaniileraluarput, tamatumali kingorna akit qaffakkiartuaarput, maannakkullu 30 koruuneqalernerat aalisartunit iluarisimaarneqarpoq. Imaaratarsinnaavorlu ukiup ingerlanerani akit qaffaqqittut.
- Qalerallit sinerissap qanittuaniit tulaanneqartartut amerlassusaat ukiumut nikerarput, kisianni Polar Raajat Aasianni Nuummilu aalisakkanut suliffissuaataanut tulaanneqartartut ukiumut katillugit 500-600 tonsillu missaanniipput, taanna oqarpoq.
Upernaap ingerlernani sikuerpat nipisaat suaanik tunisineq aallartissaaq. Aasianni Polar Raajani suaat aallaqqaammut kilomut 32 koruuneqassasut, piffissalli ingerlanerani qaffaallaqqinnissaat ilimanarsinnaasoq, Jan Weinreich oqarpoq. Nipisat suaat nappartat 1.000-it missaat Aasianni Polar Raajanut ukiumut tunineqartarput.
Qeqertarsuup Tunuani Royal Greenlandip aalisakkanut suliffissuaataani, soorlu Qeqertarsuarmi Saqqamilu, qalerallit kilomut 25,50 koruuneqarput, Halibut Greenlandillu Ilulissani aalisakkanut suliffissuaataani qalerallit angissusaat suminngaanneernerallu apeqqutaatillugu kilomut 24 koruunimiit 30,50 koruuneqarput.
Aalisarneq annertusiartortoq
Ukiut siuliini Aasianni aalisarneq tusiapittumik ingerlasimagaluartoq, ukiut qulit kingulliit ingerlaneranni qaleralinniarluni aalisarneq malunnaatilimmik annertusiartorpoq, tamannalu ilaatigut aalisarfiit siornatigut aalisarfigineqarneq ajortut qaleraleqarluartullu aalisarfigineqartalernerannik akillu qaffakkiartornerannik peqquteqarpoq.
Assersuutigalugu Aasiaat Kitsissuarsuillu akornanni Maniittup avannaani qaleralinniarneq annertuumik ingerlanneqalernikuuvoq, tamannalu ilaatigut aalisakkanut suliffissuarmi tunisassiat amerleriarnerannik kinguneqarpoq. Qalerallit aalisakkanut allanut naleqqiullugit akigissaarnerupput, tamaattumillu Aasianni umiatsiaararsortut qaleralinniarnermik ingerlataqartut amerliartortut, Aasianni aalisartut piniartullu peqatigiiffianni siulittaasup tullia, Marius Larsen oqarpoq.
- Aasiaat avataaniik aalisariartartut ilanngullugit umiatsiaararsortut qaleralinniat 30-t sinneqartarput, qaleraleqassuserlu aalisartunit pitsaasumik nalilerneqartarpoq, taanna oqarpoq.
Aasianni umiatsiaararsortut ukiut siuliini Akunnaap eqqaanut aalisariartaraluarput, pisatillu Aasianni aalisakkanut tunitsivimmut assartortarlugit.
3 koruunit aningaasarpaasuusut
Aasianni Polar Raajani qaleralinnik tunisinermi akit maannakkut 30 koruuneqarnerat aalisartunit iluarisimaarneqarpoq.
- Tunisinermi akigitinneqartup 3 koruunimik qaffanneqarnera aalisartut aningaasaqarnerannut annertuumik sunniuteqassaaq, tamannalu qujanarpoq Marius Larsen oqarpoq.
Kitsissuarni umiatsiaararsortut ukiorpassuarni qaleralinniarnermik ingerlataqarput. Nunaqarfimmi ukiuni amerlasuuni tunitsiveqarnikuunngilaq, ukiulli marluk matuma siornatigut Halibut Greenland tunitsivimmik ammaavoq, taannali upernaakkut ammaraangami ukiakkut silap unerisimajunnaartaleraangat matusarpoq. Kitsissuarsunni tunitsiviup matoqqanerata nalaani umiatsiaararsortut Aasiannut tunisiartortarput, qalerallillu akiisa qaffannerat iluarisimaarneqartoq, aalisartut piniartullu peqatigiiffianni siulersuisunut ilaasortaq, Tom Mølgaard oqarpoq.
- Tunisinermi akit qaffanneqaraangata tamanna umiatsiaarsortut aningaasaqarnerannut pitsaasumik sunniuteqarpoq, taamaattumik 3 koruunit aningaasarpassuanngortartut oqartoqarsinnaavoq, taanna oqarpoq.
Halibut Greenlandip Kitsissuarsunni tunitsiavianut upernaakkut nipisat suaat tunisaalertarput. Kitsissuarni nipisat suaat qalerallillu tulaanneqartartut Halibut Greenlandip Ilulissani aalisakkanut sulifissuaataanut assartorneqartarput.
