Aatsitassarsiorneq Kalaallit Nunaata iluaqutigisinnaavaa

Donald Trump USA-mi præsidentinngortussatut qinersinermi ajugaasoq ilisimavarput, taannalu 2025-mi januaarip 20-aniit nunarsuarmi pissaaneqarnerpaanngussaaq. Taassuma pissaaneqarnini qanoq atorniarneraa – ilaatigut Kalaallit Nunaat pillugu suniarnersoq… aamma Kalaallit Nunaata USA suniarneraa immikkut ilisimasallit ilisimatuullu maannakkut eqqarsaatersuutigaat. 

Danmarkimit iperagaaneq 

USA-p præsidentiata Donald Trumpip Danmarkip nunanut allanut politikkia misilinniarlugu Københavni taarsiullugu Nuuk toqqaannartumik oqaloqatigilersimagaa politikkikkut ilisimatuup Mikkel Vedby Rasmussenip Weekendavisen-imi allaaserisami allassimavaa.

USA-p præsidentiata Donald Trumpip Danmarkip nunanut allanut politikkia misilinniarlugu Københavni taarsiullugu Nuuk toqqaannartumik oqaloqatigilersimagaa politikkikkut ilisimatuup Mikkel Vedby Rasmussenip Weekendavisen-imi allaaserisami allassimavaa.

“Præsidentitut atuuffimmini siullermi Kalaallit Nunaat pisiarisinnaanerlugu Danmarkimut aperigami kukkuvoq; maanna Nuuk tuniserusunnersoq aperiniarpaa. Kalaallit Nunaata aatsitassaanut soqutiginninnera annikinnerulersimanngilaq, Kalaallit Nunaatalu pingaaruteqarnera annertusiartuinnarpoq. Trump aatsitassanut sakkutooqarfeqarsinnaanermullu ima neqerooruteqartigissava allaat Nuummi naalakkersuisut Danmarkimit tapiissutinik pisartagaqarunnaarsinnaallutik? Taama pisoqarpat Kalaallit Nunaata Danmarkimit avissaarnissaa ajornarunnaassaaq, Manerassuarmilu qeqertat arlallit, pappiaqqatigut namminersortut, kisiannili USA-mit pilersorneqartut, inuiaqatigiit inatsisitigut inissisimanerattut inissisimalersinnaallutik.”

Issittoq pingaartinneqarnerpaanngitsoq 

USA-p Kalaallit Nunaat tiguarniarlugu soqutiginninnersoq illersornissamut ilisimatusarfimmi ilisimatuup Peter Viggo Jakobsenip qularutigaa. – Issittoq Donald Trumpip pingaartinngilaa. Aamma kingullermik præsidentiunermini pingaartinnikuunngilaa. Trumpip Kalaallit Nunaat pisiarineqarsinnaasoq paaseriataaginnarpaa. Atorfilittanik isumasioqqaarsimagunanngilaq imaluunniit sivisuumik eqqarsaatiginneqqissaarsimagunanngilaq. Apeqqutaavorlu maanna qanoq pisoqassanersoq.

USA-mit neqeroorut pitsaanerusoq

Peter Viggo Jakobsen naapertorlugu USA-p soorunami Kalaallit Nunaat Danmarkimit pisiariinnarsinnaanngikkaa qallunaat erseqqissumik oqarsimapput. – Tamanna silarsuarmi nutaaliaasumi naalagaaffeqatigiinnermilu aaqqissuussaanermi isumaqanngilaq. Taamaammat akerlerluinnaanik pisoqarpoq. Kalaallit Nunaata Danmarkimit namminiilivinnini nalunaarutigiguniuk kingorna USA-mik isumaqatigiissuteqarsinnaavoq.

– Kalaallit Nunaata USA-mik isumaqatigiissuteqarnissaminut tunngavigisaa tassaavoq, Danmarkimit naalagaaffimmiit tapiissutit, sakkutooqarnikkut nakkutilliineq il.il. pillugit pitsaanerusumik neqeroorfigineqarnissaq. Apeqqutaavorlu sooq Trumpip qallunaat naalagaaffiup tapiissutaanik akiliuteqartariaqarnersoq imaluunniit Kalaallit Nunaannik nakkutilliinerunissaq pillugu immaqa akiliuteqarnerusariaqarnersoq. USA-p Kalaallit Nunaat sumut atorniarpaa? Pituffimmi radareqartussaapput, isumaqatigiissullu ullumikkutut atuuttoq naapertorlugu USA sakkutooqarfinni qanorluunniit iliorsinnaavoq. USA-p aappaattut Issittumi immaqa pisoqarnerulerpat timmisartuminnik sumiiffinni amerlanerusuni missinnaanissartik kissaatigaat. Maannakkorpiaq takusatsigut qallunaat tungaannit Kangerlussuarmi mittarfiup allilerneqarnissaa sulissutigineqarpoq. Tamatumunnga atatillugu USA-p dronet radarillu atorlugit nakkutilliinerup annertusinissaa eqqartorsimavaa, tassanilu Danmark pitsanngorsaanissamut periarfissaqarpoq, tassami Issittumi piginnaasaqarnerulernissamut pilersaarut Danmarkip Trumpip præsidentiunerata nalaani akuersissutigisaa suli atuutilersinneqanngilaq, Peter Viggo Jakobsen oqarpoq.

Eqqartueqatigiinneq ajornakusoortoq 

Issittumi piginnaasaqarnerulernissamut pilersaarummut 1,5 milliardit koruunit immikkoortinneqarput, maannamulli Issittumi tunngaviusumik ilinniarfik Kangerlussuarmiittoq kisimi aningaasaliiffigineqarsimavoq.

– Tassa Danmarki iliuuseqarnerusariaqartoq Trumpip oqaatigiginiaraa erseqqippoq. Amerikamiulli isiginnittaasiat naapertorlugu amerlanerusunik akiliuteqartariaqanngikkaluarluni Kalaallit Nunaanni kissaatigisat tamarmik pissarsiarineqarsinnaapput. Aamma Danmarkip Nuummik politikkikkut oqaloqateqarneq isumagisarpaa, tamannalu qallunaat isiginnittaasiat naapertorlugu ajornakusuukannerpoq.

Aatsitassanik piiaanissamut kiffaanngissuseqarneq 

Peter Viggo Jakobsenip Donald Trumpimut “niuernermi isumaqatigiissutitut” pitsaasutut isigisatuaa tassaavoq Kalaallit Nunaata nunap iluani aatsitassarsiorfinnik USA-mut tunniussisinnaanera. – USA Kalaallit Nunaanni uranisiorsinnaalerpat, aatsitassanik qaqutigoortunik allanillu piiaasinnaalerpat tamanna USA-mut soqutiginaateqarsinnaavoq. Kalaallit Nunaata tamanna kisiat periarfissarigaa uanga isumaqarpunga. Apeqqutaavorlu Kalaallit Nunaat aatsitassarsiorfinngortinneqassanersoq? Isumaqanngilanga politikkikkut amerlanerussuteqartut taamaaliorusuttuusut, Peter Viggo Jakobsen oqarpoq.