Air Greenlandip timmisartuussinini allanngortippai – IA-p Greenland Airportsimi siulersuisut soraarsinneqarnissaat piumasaraa

Nuummi Mittarfimmi nunanut allanut angalasunut isumannaallisaanikkut nakkutilliineq Trafikstyrelsip pingasunngornermut unnuaani atorunnaarsippaa, taamaaliornermi nunanut allanut angalasut misissorneqartarnerinut sulisunik ilinniartitseqqiinerup piumasaqaatinut naammassinninnginnera patsisaavoq.

Atorunnaarsitsineq soorunami Air Greenlandimut sunniuteqassaaq, ilaasummi nunatsinnit aallartussat maanna Kangerlussualiarlutilluunniit Narsarsualiarlutik securitymut akuerisaasukkoortinniarlugit timmisartuunneqartartussanngorput.

Tassunga atatillugu Air Greenlandip Facebookikkut nalunaarut innersuussutigaa, tassanilu sapaatip akunnerani uani nunanut allanut angalanissamut pilersaarutit pingasunngornermut, sisamanngornermut tallimanngornermullu allanngortinneqartut timmisartortitseqatigiiffik allappoq.

Tamanna Iqalunnut, Keflavikimut, Billundimult kiisalu Københavnimut timmisartuussinernik eqquivoq, taakkununngalu angalasussat pilersaarutiminni allannguisoqarnissaa ilimagisinnaalissavaat.

- Timmisartuussinissamut periarfissat tamaasa atorlugit angalasut tamarmik apuunnissaat qulakkeerniarparput. Ajoraluartumik tamanna ima isumaqarpoq angalanissamut pilersaarutip nutaap allanngortinniarnissaa killilerujussuussammat – aamma angalasunik kiffartuussinerput aqqutigalugu. Taamaattumik innersuussutigissavarput angalanissamut pilersaarutip nassiunneqartup malinnaaviginissaa, maannakkorpiaq aallarnissamik allamik neqerooruteqarnissaq ajornakusoorsinnaammat, Air Greenland allappoq.

IA: Siulersuisut taarserneqassapput

Angalanissat allanngornerisa saniatigut aamma partii Naalakkersuisooqataasoq Inuit Ataqatigiit isumannaallisaanermik nakkutilliinerup atorunnaarsinneqarneranik oqariartuummut politikikkut qisuariaateqarpoq.

“Ingerlanerlunneq tassunga killeqartariaqarpoq” qulequtsiullugu, Greenland Airportsimi siulersuisut pisortaanerillu Nuummi mittarfiup ammarneqarneranik suliarinninnerminnut akisussaatinneqartariaqartut, partii allappoq.

- Mittarfimmi sulisut ilungersortut nersorpavut. Taakkuunngillammi ingerlanerlunnermi aqutsinerlunnermilu pisuusut.

- Inuit Ataqatigiit piumasaraat siulersuisut taarserneqarnissaat. Nukiit nutaat avaqqunneqarsinnaanngillat, ingerlatseqatigiiffiup tatiginassusaata utertinnissaanik ilorraallu tungaanut saatsissallugu sulisoqassappat. Tamanna piginnittut, inuiaqatigiit kalaallit pillugit pisariaqarpoq.

Atorunnaarsitsinermik nalunaaruteqarneq piffissami mittarfimmi isumannaallisaanermik ajornartorsiuteqartoqareersoq, sulisunillu amigaateqarnerup mittarfiup ammarneqartarneranik kingusinaartitsillunilu timmisartut aallarnissaannik kinguartoortitsisareersoq pivoq.

Qaammatip matuma qiteqqunnerani ingerlatsinermut pisortaq Henrik Estrupip suliunnaarnera ingerlatseqatigiiffiup nalunaarutigaa, tamannalu “mittarfiit ingerlanneqarneranni niuernikkut nukittunerusumik aallussinissap sammineqarneranik” ingerlatsisussamik atorfissaqartitsisoqarneranik tunngavilerneqarpoq.

Atorunnaarsitsinerup qaqugu atuukkunnaarnissaa suli erseqqissumik ullulerneqanngilaq, Greenland Airportsillu marlunngormat unnukkut pissutsit atorunnaarsitsinermut patsisaasut iliuuseqarfiginiarlugit, ingerlatseqatigiiffik Trafikstyrelsimik ilungersorluni suleqateqartoq oqariartuutigineqarpoq. Nunanut allanut timmisartuussinerup nalinginnaasunngoqqinnissaa sapinngisamik piaarnerpaamik anguniarneqartoq, ingerlatseqatigiiffik nalunaarpoq.