Aleqa Hammond Naajamut: Ilulissanukarlutit oqaloqatigiinnermik pilersitsigit

Siumup siulittaasua, Aleqa Hammond, maanna Ilulissani takornariaqarnermut tunngatillugu saqitsaannermut akuliuppoq. Taassuma "Naalakkersuisoq susassaqartup nunaqavissunut tunuliaqutaanini erseqqissarniarlugu tikillugit paaseqatigiinnissaq anguniartariaqaraa."

Saqqummersinneqarpoq

Inuussutissarsiornermut Naalakkersuisoq, Naaja H. Nathanielsen Ilulissani takornariaqarnermik sulialinnit, marlunngornermi akerliussutsimik takutitsisunut, borgmesterimillu Lars Erik Gabrielsenimik isornartorsiuinermi kingorna.

Allaaserisap suliarineqarnerata nalaani oqallinneq sakkortooq, pingaartumik inuit attaveqaqatigiittarfiisigut ingerlanneqarpoq, malinnaaginnarlunilu naapiffeqanngitsutut nalilerneqarsinnaasumik. 

Nunaqavissut takornarialerisut ilaat, nunap immikkoortuani nunaqavissut ataatsimoorfianni peqataasoq, Naaja H. Nathanielsen Naalakkersuisutut tunuassasoq allaat kaammattuivoq. Taanna isumaqarpoq Naaja nunaqavissunut tamaviaarlutik paasineqarnissaminnik noqqaasunut tunutsiinnarluni allanik illersuisoq.

Aleqa Naajamut kaammattuivoq iliuuseqaqqullugu

Piffissap ingerlanerani annertuseriartuinnartumik sakkortoorujussuarmillu akerleriittoqarpoq, piffissami takornariat amerlanerpaaffigisaanni, taamaattoqarneranilu Siumup siulittaasuatut qinigaaqqammertoq, Aleqa Hammond, Naaja H. Nathanielsenimut Ilulissanut angalaqqullugu kaammattuivoq:

- Takornariaqarneq nunaqavissunut iluaqutigisussanngorlugu siunertaavoq taamaammalli nunaqavissut takornarialerisut misigisimapput Naalakkersuisumit oqartussaaffigineqartumit nipangersarneqarlutillu tusaaneqanngitsutut misigisimanerat. Tamanna Siumumit tusaanngitsuusaarnagu iliuuseqarfigeqqullugu matumuuna Naalakkersuisoq akisussaasoq kajumissaarparput tusarneqarnissamik kissaateqartut ornillugit susassaqartutut qanimut oqaloqatiginninnerit paaseqatigiinnissarlu anguniarlugu orniguttariaqartoq.

- Pisoq ilungersunartutut isigaarput ukiunilu kingullerni pissutsit sakkortusiartornerata takutippaa aatsaat taama Naalakkersuisoq susassaqartup nunaqavissunut tunuliaqutaanera erseqqissarniarlugu tikillugit paaseqatigiinnissaq pisariaqarluinnartigaaq, Aleqa Hammond kaammattuivoq.

Sulisitsisut: Kalaallit Nunaata tusaamaneqarnera mianersuunneqarli

Aamma Sulisitsisut (GE) oqaloqatigiinnissamut kaammattuipput:

- Suliassaqarfimmi suliaqartut ataatsimoorfiattut erseqqissumik kissaatigaarput, Kalaallit Nunatsinni nungusaataanngitsumik takornarialerinermik ingerlatsineq taamaallat iluatsinneqarsinnaammat ammasumik oqaloqatigiinnikkut, ataqqeqatigiinnikkut inuiaqatigiillu siammasissumik suleqatigiinnerisigut. 

- Takornarialernermik suliaqartut ataasiakkaat kikkuuneri taallugit tunngavissaqanngitsumik oqallisissanngorlugit tikkuartorneqarpata, taava inuussutissarsiornermut tatiginninneq inuussutissarsiortunut nunatsinnullu angallavissatut isiginninneq innarlerneqassapput.

Sulisitsisut kaammattuipput:

  • Takornariaqarnerup ineriartornissaa pillugu tamanit peqataaffigineqartumik oqaloqatigiinnissaq, isummat siammasissut tusartillugit.
  • Aaliangiisartut inuussutissarsiortunut assigiimmik naligiissumillu inatsisinut naapertuuttumik tunngavilersuinissaat.
  • Sumiiffinni suliffeqarfiit aningaasaliisarnikkut piginnaaninngorsaanikkullu ineriatortinnissaat – ilaannik piaaniarneq aqqutiginagu.
  • Illersorlugu Kalaallit Nunatta ataatsimoorluni akisussaassuseqartumik sulinikkut angalaffissatut toqqissisimanartutut ingerlanneqarluartutullu tusaamaneqarnissaa.

- Akuersaarparput takornariaqarnerup ineriartornissaa oqallinnissamut tunngavissiimmat. Tamanna pingaartuullunilu pisariaqartuuvoq. Kisiannili aamma isumaqarpugut upperalugulu, nungusaataanngitsumik ingerlatsinissat isumaqatigiinneq tunngavigalugu suleqatigiissutaanissaat.

- Pisortat oqartussaaffeqarfii tassaassanngillat suliffeqarfinnik ataasiakkaanik namminersorlutillu ingerlatsivinnik naqisimanninniarnermi salliusussat. Taamaattumik maanna takornarianut takornarialerisunullu pissusilersorneq ajortissaarinerlu unitsinneqassasut ukuulluta kaammattuutigiumavarput, Sulisitsisut naggasiipput.

Inuussutissarsiornermut Naalakkersuisumit, Naaja H. Nathanielsen (IA) oqaaseqartitsiniarluta Sermitsiamit sulissutigaarput.

Powered by Labrador CMS