KL

DK

Allan Juhlip Fitnessgl tunivaa

Inuussutissarsiortoq Allan Juhl nalunaarpoq kinguaariit nikinnissaat pillugu aalajangersimalluni, aamma Fitnessgl Nuuk Jens-Jakob Sandgreenimut tunineqarsimasoq.

Allan Juhl (saamerleq) Fitnessgl-ip saniatigut aamma nukittuunik unammisitsisarnermik Greenland Strongest-imik pilersitsisutut ilisimaneqarpoq. Maanna Jens-Jakob Sandgreenip Fitnessgl-imi aqutsineq tiguaa.
Thomas Munk Veirum
Tusagassiortoq
Saqqummersinneqarpoq

Inuussutissarsiortoq Allan Juhl timigissartarfiutini tuniniarniarlugu aalajangerpoq.

Fitness.gl Nuuk, ullumikkut marlunnik Nuummi timigissartarfilik aammalu 3000-it missaannik ilaasortaqareersoq, 36-nik ukiulimmut inuussutissarsiornermut misilittagaqarluartumut Jens-Jakob Sandgreen-imut tunisoq, tusagassiuutinut nalunaarummi taanna ilisimatitsivoq.

Jens-Jakob Sandgreen aallarnisaasuuvoq ilaatigut Namminersorlutik Oqartussat umiarsuaatileqatigiiffianni Arctic Umiaq Linemi pisortaasimalluni.

Maanna ingerlatitseqqiinissamut piffissaasoq, Allan Juhl oqarpoq:

- Ukiut qulikkuutaat Fitness.gl-imi ilungersunartumik sulereerlunga aammalu puigunaatsumik misigisaqarfigereerlugu ullumikkut misigisimavunga akisussaaffiup ingerlateqqinnissaa piffissanngortoq. Qularinngilara Jens-Jakob Sandgreen nukissaqarluarlunilu, piginnaasaqarluartuullunilu suliaminut tunniusimasoq, Fitnessgl-ilu qaffasissumik piffik nutaamilu aggersumi ineriartortsilluarumaaraa.

- Tulluusimaarpunga suliffeqarfiup iluani angusatsinnut aammattaaq qilanaaraara suliffeqarfiup ineriartornera siunissami malinnaaviginissaa, Allan Juhl oqarpoq.

Timikkut tarnikkullu peqqissuuneq pingaartikkaa

Jens-Jakob Sandgreenip Fitnessgl Nuuk ingerlatissallugulu ineriartortissavaa, aamma Fitnessgl-ip suli orniginarnerulernissaanik takorluugaqarpoq, timikkut nukittuneq kisiat pinnagu aammattaarli tarnikkut peqqissuuneq eqqarsaatigalugu:

- Allanip sapiilluni aammalu qaqutigoortumik tuniniaanikkut ingerlatsinerup peqataaffiginerani timigissartarfinni atuisut aningaasaliinikkut utertiiviginissai pingaartissimavaa, soorlu takusinnaasatsitut Nukissivimmi timigissartarfik quleriiaanik pingasunik inissiartalik pilersissimagaa.

- Fitnessgl-i neriunaatilimmik ukua piffit nutaat aggersuni inissisimavoq, suliffeqarfiullu atuisunut tulluarsarnissaa aammalu eqeersimaartumik ataatsimoorfiunissaa siunertaraara, timigissarneq tarnikkullu peqqinneq ingiaqatigiisillugit, Jens-Jakob Sandgreen oqarpoq.

inuussutissarsiutit fitnessgl nuuk erhverv allan juhl iværksætter jens-jakob sandgreen salg

ATORFIIT Se alle jobs

Powered by Labrador CMS