Amerikamiut aatsitassanut aningaasaliisartut: Nunap namminiilivinnissamik anguniagaqarnera tapersersorparput

Amerikamiut suliffeqarfiata GreenMetip aatsitassanik pingaarutilinnik pilersuinermi aningaasalersuisarnermik immikkut ingerlatallip Kalaallit Nunaat ukkatarilerpaa.

Pilersitsisoq pisortaanerlu Drew Horn Nuummut tikeqqammerpoq, tassanilu sapaatit-akunnerini marlunni pingasuni Amerikamiut suliffeqarfiinut aningaasaliinissamik periarfissanik misissuissaaq. Tamanna GreenMetip tusagassiuutitigut nalunaarummi nassiussaanni atuarneqarsinnaavoq.

Aatsitassatigut pisuussutit milliardilikkaanik nalillit

Drew Horn, Det Hvide Husimi Amerikallu nukissiuuteqarnermut illersornissamullu ministereqarfiini pisortatut atorneqarsimasup, 2021-mi GreenMet pilersippaa. Suliffeqarfik Libra Groupimik, Lomar Shippingimik, nunani 60-ni silaannakkut angallannermi, imarsiornermi sullissinermi, illuutini il.il. ingerlatsinermik aallaaveqartumik suleqateqarpoq. Drew Hornip Fox Newsimi Kalaalit Nunaat nunatamini aatsitassanik pisuussutinik dollarinik milliarderpassuarnik pissamaateqartoq ”periarfissat nunaattut” ilaatigut taavaa,qanittumilu nittartakkakkut siusinnerusukkut uranimik piumanninnerup annertusiartoqqilernerannik taamatullu aamma nunarsuarmi uranip aatsitassiornikkut periarfissaaneranik nassuerutiginninnerup annertusiartulerneranik imaqartoq iverteqqippaa.

Nunap namminiilivinnissamik anguniagaqarnera tapersersoraa

GeenMET-ip tusagassiuutinut nalunaarutaani suliffeqarfiup ”kalaallit namminiilivinnissamik namminneerlutik toqqaasinnaanerannik naalagaaffittullu siunissami aqqutissaannik tapersersorniarai”, Drew Hornillu ”nunap namminiilivinnissamik anguniagaqarneranik tapersersueqqinniarluni” Kalaallit Nunaannut angalanera, ilanngullugu allaqqavoq. Oqaatigineqartut malillugit Drew Horn kalaallinik aatsitassarsiornermi, nukissiuuteqarnermi aningaasaliisarnermilu aqutsisunik naapitsissasoq oqaatigineqarpoq.

”Tikeraarneq manna Kalaallit Nunaata politikikkut kiffaanngissuseqarneranik Amerikallu avannaata aatsitassanik pingaarutilinnik pilersorneqarneranik akisussaassuseqartumik piujuartitsisumillu aatsitassarsiornermik immikkut aallussilluni annertusaanermi alloriarneruvoq pingaarutilik”.

Hornip angalanissamut pilersaarutaani Nuup avataatigut aamma Sisimiut tikinneqassaaq, tassanilu piffinni soqutigisaqartunik naapitsissanerarneqarpoq, naapinnermilu Kalaallit Nunaata aatsitassarsiornermi aningaasaqarnikkut periarfissai oqaluuserineqassapput.

Aningaasaliisussanut ammasoq 

Inuussutissarsiornermut, Niuernermut, Aatsitassanut, Inatsisit atuutsinneqarnerannut Naligiissitaanermullu Naalakkersuisoq Naaja H. Nathanielsen Drew Hornimik naapitsinissamik pilersaaruteqanngilaq, taassumalu namminiilivinnissamik suliniarnerup kalaallinit namminernit isumagineqartussaanera tikkuarpaa. – Tikeraarnera ilisimanngilaq. Tusaamaannarpara naapittussaanngilaralu. Nunap inatsisai malinneqartillugit Naalakkersuisut avataanit aningaasaliisoqarnissaa ammaffigaat. Aningaasaliisinnaanermik kalaallillu namminiilivinnissaanik siuarsaanissamik kissaateqarnera ingasattajaarnertut taavaa. Inuussutissarsiornikkut ineriartortitsinermi nunatta aningaasaqarneranik siuarsaanissaq, innuttaasullu atugarissaarneranni toqqammavik annertusaanissaq anguniagaavoq. Namminiilivinnissamik sulissuteqarneq nammineerluta isumagissagipput isumaqarpunga, Naaja H. Nathanielsen oqarpoq. 

Drew Hornip aatsitassarsiortut sorliit aningaasaliiffigineqarnerannik qulakkeerinninnikuunersoq aamma Nuummi Sisimiunilu kikkut ataatsimeeqatigissanerai paasisaqarfigerusullugu Sermitsiamiit pissarsiariniaraluarparput. Aamma sooq maannaqqissaaq Kalaallit Nunaanniinnersoq. Aviisilli suliarineqarnerani killigititap iluani akissutisinngilagut.