Aningaasaleeqqinnissamut kinguaattoorutit milliardilikkaat pissutigalugit akigititat qaffanneqarput
Nukissiorfiit aningaasaqarnikkut ajornartorsiorneri pissutigalugu innaallagissamut imermullu akigititat 2024-mi juulip aallaqqaataanit 3,5 procentimik qaffassapput, 2025-milu januaarip aallaqqaataanit 3,5 procentimik qaffaqqissallutik.
Nukissiorfiit 1,8 milliardit koruuninik aningaasaleeqqinnissamut kinguaattooruteqarput.
Assiliisoq: Leiff Josefsen
Imermut kiassarnermullu Nukissiorfiit akigititaanik qaffaanissaq Naalakkersuisut aalajangiussimavaat. Nukissiorfiit aningaasaqarnerata inissisimaneranik qaffaanerit tunngaveqarput.
Tusagassiuutinut nalunaarummi Nukissiorfiit taamatut ilisimatitsipput.
Aningaasaleeqqinnissamut 1,8 milliardit koruuninik naleqartut Nukissiorfiit kinguaattoorutigaat, tamatumalu saniatigut ukiuni tallimani kingullerni innaallagissamik imermillu tuniniaanermi aningaasanik annaasaqarsimapput, ingerlatseqatigiiffik ilisimatitsivoq.
- Aningaasartuutit isertitallu oqimaaqatigiinnginnerisa kingunerisaannik maskiinat, atortorissaarutit pilersuinermullu atortulersuutit naammattumik Nukissiorfiit aserfallatsaaliorsinnaasimanngilaat, taamaattumillu pinasuartumik aningaasaliisoqaqqittariaqarluni, Nukissiorfiit allapput.
Innaallagissamut imermullu akigititat marloriarlutik qaffassapput:
Tamatuma nassatarissavaa ulloq 2024-mi juulip aallaqqaataat aallarnerfigalugu innaallagissamut akigititaq kWh-imut 1,75 koruuninit 1,81 koruuninut qaffassasoq, imermut m3-mut akigititaq 21,20 koruuninit 21,94 koruuninut qaffassalluni.
2025-mi ulloq januaarip aallaqqaataat aallarnerfigalugu innaallagissamut akigititaq kWh-imut 1,87 koruuuninut qaffassaaq, imermut akigititaq m3-mut 22,71 koruuninut qaffassalluni.
Uuliamut akigititap qaffannera pissutigalugu 2024-mi juulip aallaqqaataanit kiassarnermut akit qaffanneqassapput:
Kiassarnermut aalajangersimasumut akigititaq kWh-imut 0,71 koruuninit 0,83 koruuninut qaffanneqassaaq.
Kiassarnermut qaminneqarsinnaasumut akigititaq kWh-imut 0,49 koruuninit 0,56 koruuninut qaffassaaq.
Aningaasanik tigusisinnaassuseq qaffanneqartoq
'Pinasuartussatut aningaasaleeqqinnissamik pisariaqartitanit taakkunanit malitsigisaasutut piffissami sivikitsumi akiliisinnaassusermi qaangigassat annertusiartortut' Nukissiorfiit isumagisinnaaniassammatigit, Nukissiorfiit aningaasanik tigusinissamut pisinnaatitaaffia 70 millionit koruuninit 105 millionit koruuninut annertusisinneqarpoq.
Nukissiorfiit aningaasaliinissamut aningaasanik pissarsinngippata pilersuinerup isumannaatsuunissaa navianartorsiorsinnaasoq, akit qaffannerat pillugu nukissiuuteqarnermut pisortap Cicilie Senderovitzip nassuiarpaa:
- Maannakkut akigitani qaffaanerit pinngitsuussagutsigit Nukissiorfiit pilersaarutigisaatut aningaasaleeqqinnermi suliniutit arlallit kinguarteqqinneqassapput. Qamittoornissamut aarlerinartoqarneq tamatuma nassatarissavaa, naggataagullu pilersuinerup isumannaatsuuneranik tamanna ajortisaasinnaavoq, oqarpoq.
Innaallagissamut, imermut kiassarnermullu akigititat maanna atuuttut aningaasaqarnikkut oqimaaqatigiissaarisinnaanngitsut erseqqissarpaa:
- Nunami innuttaasunut sapinngisamik appasinnerpaatut akigititat atorlugit pitsaalluinnartumik pilersuinerup qularnaarnissaa sulissutigiuarparput, taamaattorli akigititat iluarsaattariaqarpavut, taamaalilluta akigititanit isertitatsigut pisarialittut ingerlatsinermi, aamma aningaasaliinermut aningaasartuutinik oqimaaqatigiissitsinissarput qanillinerussagatsigu.
- Taamatuttaaq piffissaq eqqorlugu peqqissaaruteqarnissaq takutikkusupparput, taamaalilluni nunami tamarmi aamma taamaattuartutut pilersuisoqassammat, siunissami kinguaariinnut annertuumik akiligassaqarneq kingornussaritinnginniassagatsigu, Cicilie Senderovitz oqarpoq.
